The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​យូណេស្កូ និង​ក្រសួង​អប់រំ​យុវជន​ និង​កីឡា ​សម្ភោធ​​សម្ភារ​សម្រាប់គ្រូ​​បង្រៀន និង​ការ​សិក្សា​​គណិត​វិទ្យា​​​ថ្នាក់​ដំបូង




អង្គការ​យូណេស្កូ និង​ក្រសួង​អប់រំ​យុវជន​ និង​កីឡា ​សម្ភោធ​​សម្ភារ​សម្រាប់គ្រូ​​បង្រៀន និង​ការ​សិក្សា​​គណិត​វិទ្យា​​​ថ្នាក់​ដំបូង

Content image - Phnom Penh Post
មន្ត្រី​ជំ​នាញ​បង្ហាញ​កញ្ចប់​សម្ភារ​សម្រាប់គ្រូនិងគណិតវិទ្យា។ រូបថត យូណេស្កូ

អង្គការ​យូណេស្កូ និង​ក្រសួង​អប់រំ​យុវជន​ និង​កីឡា ​សម្ភោធ​​សម្ភារ​សម្រាប់គ្រូ​​បង្រៀន និង​ការ​សិក្សា​​គណិត​វិទ្យា​​​ថ្នាក់​ដំបូង

កំពង់ចាមៈ អង្គការ​យូណេស្កូ និង​ក្រសួង​អប់រំ​យុវជន​និង​កីឡា កាល​ពី​ថ្ងៃ​ទី ២៨ វិច្ឆិកា បាន​សម្ភោធ​​សម្ភារ​សម្រាប់គ្រូ​​បង្រៀន និង​ការ​សិក្សា​​គណិត​វិទ្យា​​​ថ្នាក់​ដំបូង នៅ​មជ្ឈមណ្ឌល​បណ្ដុះ​បណ្ដាល​គ្រូ ក្នុង​ខេត្ត​កំពង់​ចាម។

កញ្ចប់​សម្ភារ​ទាំង​នោះ​រួម​មាន​សៀវភៅ​ណែ​នាំ​សម្រាប់​គ្រូ សៀវភៅ​លំហាត់ សៀវភៅ​គាំទ្រ​ដល់​សិស្ស សម្ភារ​បន្ថែម​សម្រាប់​គ្រូ​បង្រៀន​ និង​សម្រាប់​សិស្ស​រៀន ព្រម​ទាំង​ឃ្លីប​វីដេអូ​ដែល​នឹង​ត្រូវ​ប្រើ​ប្រាស់​ជា​ធន​ធាន​បន្ថែម​ដល់​ការ​សិក្សា។ សម្ភារ​ទាំង​នេះ​គឺ​ជា​សមិទ្ធផល​នៃ​កម្មវិធី​ពង្រឹង​ការ​អប់រំ​គ្រូ​នៅកម្ពុជា ហៅកាត់​ថា STEPCam របស់​អង្គការ​យូណេស្កូ។

បើ​តាមសេចក្ដី​ប្រកាស​ព័ត៌មាន​របស់​អង្គការ​យូណេស្កូ កម្មវិធី STEPCam បាន​ចាប់​ផ្ដើម​អនុវត្ត​តាំង​ពី​ឆ្នាំ ២០១៨ ដើម្បី​ពង្រឹង​មូលដ្ឋាន​​គុណភាព​នៃ​ការ​អប់រំ តាម​រយៈ​ការ​អភិវឌ្ឍ​សមត្ថភាព​គ្រូ​បង្រៀន​ដែល​បង្រៀន​ថ្នាក់​ដំបូង ក្នុង​ផ្នែក​អនក្ខរកម្ម​ខ្មែរ និង​គណិត​វិទ្យា។

យូណេស្កូ​បញ្ជាក់ថា សម្ភារសម្រាប់គ្រូ និង​សម្រាប់​សិស្ស​ទាំង​អស់ ត្រូវ​បាន​ផលិត​ឡើង​​ឆ្លង​កាត់​សិក្ខាសាលា​ពិគ្រោះ​យោបល់​ជា​ច្រើន​លើក ដែល​នាយកដ្ឋាន​បឋម​សិក្សា​​នៃ​ក្រសួង​អប់រំ​បាន​ធ្វើ​ឡើង​កាល​ពី​ឆ្នាំ​កន្លង​ទៅ។ លោក​គ្រូ​អ្នក​គ្រូ​​ដែល​បង្រៀន​ថ្នាក់​ទី​១ និង​ទី២ ក៏​ជា​អ្នក​ចូលរួម​យ៉ាង​សកម្ម​ក្នុង​សិក្ខាសាលា​ទាំង​នោះ ដោយ​បាន​ផ្ដល់នូវ​មតិ​ត្រឡប់​ដើម្បីធ្វើ​ឲ្យ​សម្ភារ​សម្រាប់​បង្រៀន​និងសម្រាប់​សិស្ស​រៀន​មាន​ភាព​ទាក់​ទាញ​សម្រាប់​អ្នក​ប្រើ​ប្រាស់ និងអាស្រ័យ​ទៅ​តាមប្រធានបទ។

ការសម្ពោធ​សម្ភារទាំង​នោះ ធ្វើ​ឡើង​ក្រោម​អធិបតីភាព​លោក ណាត ប៊ុនរឿន រដ្ឋ​លេខា​ធិការ​ក្រសួង​អប់រំ​ យុវជន និង​កីឡា និង​លោក Sardar Umar Alam តំណាង​​អង្គការ​យូណេស្កូ ប្រចាំ​ប្រទេស​កម្ពុជា។

លោក ណាត ប៊ុនរឿន បាន​ថ្លែង​ក្នុង​ពិធី​សម្ភោធ​ថា ការ​ផ្ដោត​ការ​យក​ចិត្ត​ទុក​ដាក់​លើ​ការ​អាន​ ​ការ​សិក្សា​គណិត​វិទ្យា​ ​និង​ការ​គាំទ្រ​ដល់​គ្រូ​តាម​រយៈ​ការ​ចុះ​ណែនាំផ្ទាល់ មាន​សារៈ​សំខាន់​យ៉ាង​ខ្លាំង​សម្រាប់​​ការ​សិក្សា​នៅថ្នាក់​ដំបូង។

ចំណែក​លោក Sardar Umar Alam ក៏​បាន​ថ្លែង​ដែរ​ថា មូលដ្ឋាន​ដ៏​រឹង​មាំ​នៃ​ការ​សិក្សា​គណិត​វិទ្យា​នៅថ្នាក់​ដំបូង ពិត​ជា​មាន​សារៈ​សំខាន់​យ៉ាង​ខ្លាំង​សម្រាប់​ជួយ​ឲ្យ​សិស្ស​ក្មេងៗ​ទទួល​ជោគ​ជ័យ​នៅ​ថ្នាក់​បន្ទាប់ៗទៀត ហើយ​គ្រូ​បង្រៀន​គឺ​ជា​កត្តា​ជំរុញ​សម្រាប់​ការ​ផ្ទេរ​ចំណេះ​ដឹងទាំង​នេះ។

បើ​តាម​យូណេស្កូ ពិធី​សម្ពោធ​នេះ​ក៏​ជា​ការ​ប្រកាស​ចាប់​ផ្ដើម​ការ​សាក​ល្បង​សម្ភារ​សិក្សា​គណិត​វិទ្យា​សម្រាប់​ថ្នាក់​ទី២ នៅ​ឆ្នាំ ២០២១ ដែល​ការ​សាក​ល្បង​នេះ​នឹង​ធ្វើ​ឡើង​នៅ​ខេត្ត​សៀមរាប។ បន្ទាប់​ពី​ការ​សាក​ល្បង​នេះ នឹង​មាន​ការ​ផ្ដល់​ការ​បណ្ដុះ​បណ្ដាល​ដល់​គ្រូ ដើម្បី​ឲ្យ​ពួក​គាត់​អាច​ផ្សា​ភ្ជាប់​​សម្ភារ​ទាំង​នេះ​ទៅ​នឹង​ការ​បង្រៀន និង​ការ​សិក្សា​ប្រចាំ​ថ្ងៃ។

យូណេស្កូ​បញ្ជាក់​ដូច្នេះ​ថា៖ «ចាប់​តាំង​ពីបើក​ដំណើរ​ការ​ដំបូង កម្មវិធី STEPCam បាន​បំពាក់​ឧបករណ៍ និង​ធន​ធាន​ថ្មី​ដល់​គ្រូ​ថ្នាក់​ដំបូង​ចំនួន ២​ ៨០០ ​នាក់ អំពី​វិធី​ធ្វើ​ឲ្យ​ប្រសើរ​ដល់​លទ្ធផល​នៃ​ការ​អាន​ និង​ការ​សិក្សា​គណិត​វិទ្យា​សម្រាប់​ថ្នាក់​ទី​១ និង​ទី២»។

ក្នុង​យុគ​សម័យ​ឌីជីថល គណិត​វិទ្យា​គឺ​ជា​មូលដ្ឋាន​គ្រឹះ​សម្រាប់​នវានុវត្តន៍ (គំនិត​ច្នៃ​បង្កើត​ថ្មី) និង​ការ​អភិវឌ្ឍ​ប្រ​កប​ដោយ​​និរន្តរភាព។ ប្រទេស​កម្ពុជា ​បាន​ធ្វើ​ឲ្យ​មាន​ការ​រីក​ចម្រើន​គួរ​ឲ្យ​កោត​សរសើ​ក្នុង​ការ​សម្រេច​គោល​ដៅ​អប់រំ។ ទោះ​យ៉ាង​ណា សិស្ស​នៅ​តែបន្ត​តស៊ូ​ ដើម្បី​សម្រេច​បាន​នូវ​កម្រិត​គុណភាព​គណិត​វិទ្យា​មួយ​ដែល​អាច​ទទួល​យក​បាន នៅ​ថ្នាក់​ដំបូង។ នេះ​បើ​តាម​យូនេស្កូ។

លោក រស់ សុវាចារ អ្នក​នាំ​ពាក្យ​ក្រសួង​អប់រំ យុវជន​ និង​កីឡា បាន​ស្នើ​ឲ្យ​យក​ព័ត៌មាន​តាម​​សេចក្ដី​ប្រកាស​ព័ត៌មាន​របស់​អង្គការ​យូណេស្កូ៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ