ភ្នំពេញៈ អង្គការយូណេស្កូ ប្រកាសធ្វើយុទ្ធនាការបែបសិល្បៈមួយនៅក្នុងប្រទេសកម្ពុជា ដើម្បីប្រឆាំងនឹងការរើសអើងជនបរទេស ការមាក់ងាយ និងការផ្សព្វផ្សាយព័ត៌មានមិនពិតអំពីការរីករាលដាលនៃជំងឺកូវីដ ១៩ បន្ទាប់ពីបានដំណើរការសាកល្បងយុទ្ធនាការនេះទទួលបានជោគជ័យរយៈពេល ២ ខែរួចមក។
ព្រឹត្តិការណ៍នេះត្រូវបានប្រកាសជាផ្លូវការកាលពីម្សិលមិញនៅទីស្នាក់ការអង្គការយូណេស្កូ ដោយមានមន្ត្រី យុវជន និងអ្នកសារព័ត៌មានជាច្រើនរូប ដើម្បីចូលរួមគូសរូបចេញពីបេះដូងរបស់ពួកគេ ដោយដីសបង្ហាញនៅលើផ្ទាំងពណ៌ខ្មៅ ក្នុងន័យរួមគ្នាទប់ស្កាត់ការរើសអើង និងការភ័យខ្លាចអ្នកមានជំងឺកូវីដ ១៩។
យូណេស្កូ ឱ្យដឹងក្នុងសេចក្តីប្រកាសព័ត៌មានថា យុទ្ធនាការនេះគឺនឹងធ្វើឡើងដោយប្រើប្រាស់សិល្បៈមួយដែលប្រើដីសគូសជាគំនូរបង្កប់នូវអត្ថន័យដ៏ធំធេង ឬប្រើប្រាស់ជារូបផ្ការីកពាក្យខ្លីៗមានន័យមួយចំនួនទាំងភាសាខ្មែរ ភាសាអង់គ្លេស និងរូបសញ្ញាផ្សេងៗ។
យូណេស្កូបន្តថា៖ «ពាក្យពេចន៍ដែលប្រើនេះត្រូវបានជ្រើសរើសដើម្បីបង្ហាញពីការប្រឈមដែលកំពុងកើតមានក្នុងអំឡុងនៃការរីករាលដាលនៃជំងឺកូវីដ១៩ និងពាក្យពេចន៍វិជ្ជមាន និងលើកទឹកចិត្តមួយចំនួនពីប្រធានបទនៃយុទ្ធនាការ បើកបេះដូងអ្នក»។
កញ្ញា វន មករា មន្ត្រីកម្មវិធីផ្នែកសារគមនាគមន៍ និងព័ត៌មាននៃអង្គការយូណេស្កូបានប្រាប់ ភ្នំពេញ ប៉ុស្តិ៍ ពីម្សិលមិញថា អង្គការយូណេស្កូ បានចាប់ផ្តើមធ្វើយុទ្ធនាការសាកល្បងបែបសិល្បៈនេះអស់រយៈពេល ២ ខែមកហើយ ដោយសង្កេតឃើញថា មានក្រុមមនុស្ស អង្គការ ស្ថាប័នមួយចំនួនបានស្ម័គ្រចិត្តនៅក្នុងការចូលរួមសហការដើម្បីផ្សព្វផ្សាយពីការសន្ទនាបែបអន្តរវប្បធម៌ ការយោគយល់ និងអធ្យាស្រ័យគ្នាទៅវិញទៅមកនេះ។
យុទ្ធនាការនេះក្នុងគោលបំណងលើកកម្ពស់ការយោគយល់គ្នាទៅវិញទៅមក ដើម្បីទប់ស្កាត់ និងប្រឆាំងជាមួយនឹងការរើសអើង និងការខ្លាចជនបរទេសដែលមានជំងឺកូវីដ ១៩ និងទប់ស្កាត់ការផ្សព្វផ្សាយព័ត៌មានមិនពិត ដែលធ្វើឱ្យជំងឺនេះកាន់តែរីករាលដាលបន្តទៀតនៅទូទាំងសកលលោក និងប្រទេសកម្ពុជា។
កញ្ញា មករា ថា៖ «ធម្មជាតិរបស់ដីសគឺងាយនឹងរលុបដូច្នេះយើងសង្ឃឹមថា ផលប៉ះពាល់អវិជ្ជមានចំពោះសង្គម ដែលបណ្តាលមកពីជំងឺកូវីដ១៩នឹងរសាត់បាត់ទៅនៅចុងបញ្ចប់នៃរដូវវស្សានេះ»។
បើតាមអង្គការយូណេស្កូយុទ្ធនាការនេះទទួលបានការសហការពីបណ្តាហាងល្បីៗមួយចំនួនដូចជា ហាងកាហ្វេប្រោន អគាររ៉េនទ្រីកម្ពុជា ហាង Farm to Table និងហាងកាហ្វេ Dutch&Bean ក្នុងការផ្តល់នូវទីតាំង ដើម្បីដាក់បង្ហាញនូវរូបគំនូរដីស និងការគូររូបលើជញ្ជាំងរបស់ហាងកាហ្វេប្រោន សាខា Roastery ដែលស្ថិតនៅលើផ្លូវ ៥៧ និងខណ្ឌទួលគោក។
លោក លីវ ឈួង ជាអ្នកគ្រប់គ្រងទូទៅនៃហាងកាហ្វេប្រោន បាននិយាយថា ហាងកាហ្វេប្រោន តែងតែផ្តល់ការគាំទ្រស្មារតីរបស់សហគមន៍នៅគ្រប់កាលៈទេសៈ ព្រោះលោកយល់ថា សហគមន៍គឺជាកន្លែងរបស់យើងគ្រប់គ្នា ដោយមិនប្រកាន់ពីពូជសាសន៍ ពណ៌សម្បុរ សាសនា ឬសូម្បីតែភេទនោះឡើយ។ «ក្នុងពេលដ៏លំបាកនេះការជួយគាំទ្រទៅដល់ស្មារតីរបស់សហគមន៍ គឺកាន់តែមានសារៈសំខាន់ជាងពេលណាៗទាំងអស់ ដើម្បីប្រយុទ្ធនឹងជំងឺកូវីដ ១៩ ជាមួយគ្នាមិនមែនជាការប្រយុទ្ធ ឬរើសអើងបុគ្គលជាមួយនឹងសហគមន៍នោះឡើយ។ ដូច្នេះយើងពិតជាគាំទ្រយុទ្ធនាការ “បើកបេះដូងអ្នក” ដើម្បីចែករំលែក ក្តីស្រឡាញ់ ទៅកាន់សហគមន៍របស់យើង»។
តាមរយៈយុទ្ធនាការអង្គការយូណេស្កូ អ្នកប្រើប្រាស់បណ្តាញសង្គមជាង ៦២៦ ៧២៨ នាក់ បានដឹងពីរបៀបនៅក្នុងការស្វែងរក និងទទួលយកព័ត៌មានពីប្រភពដែលអាចជឿទុកចិត្តបាននៅលើប្រព័ន្ធអនឡាញ និងការប្រើប្រាស់ និងចែករំលែកព័ត៌មានទាំងនោះបានត្រឹមត្រូវ។ គំនិតផ្តួចផ្តើមទាំងអស់នេះជាផ្នែកមួយនៃបេសកកម្មដ៏មានតម្លៃរបស់អង្គការយូណេស្កូ ដើម្បីពង្រឹងនូវសេរីភាពនៃការបញ្ចេញមតិ និងប្រព័ន្ធអេកូឡូស៊ីផ្នែកអភិវឌ្ឍន៍ប្រព័ន្ធផ្សព្វផ្សាយក្នុងប្រទេសកម្ពុជា៕