.jpg)
ភ្នំពេញៈ អង្គការសង្គមស៊ីវិល និងសមាគមជាង ៧០ ស្ថាប័ន បានជួបពិភាក្សាគ្នាជុំវិញសំណើដែលជាអនុសាសន៍បានដាក់ជូនទៅក្រសួងមហាផ្ទៃក្នុងការដាក់បញ្ចូលទៅក្នុងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ខណៈមន្ត្រីនៃក្រសួងមហាផ្ទៃបានអះអាងថា សំណើទាំងនោះត្រូវបានដាក់ចូលក្នុងរបៀបវារៈនៃកិច្ចប្រជុំក្រុមការងារនៅចុងសប្តាហ៍នេះ។
លោក យង់ គិមអេង ប្រធានមជ្ឈមណ្ឌលភីឌីភី បានប្រាប់ភ្នំពេញប៉ុស្តិ៍កាលពីថ្ងៃអង្គារថា អង្គការសង្គមស៊ីវិលចំនួន ១៤ បានរៀបចំសិក្ខាសាលាពិគ្រោះយោបល់ថ្នាក់ជាតិស្តីពីសំណើអនុសាសន៍ដើម្បីធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាល និងសកម្មភាពបន្តនាសណ្ឋាគារសាន់វ៉េភ្នំពេញ។
លោកបន្តថា សិក្ខាសាលាដែលធ្វើឡើងនៅថ្ងៃទី ២៥ ខែសីហា មានការចូលរួមពីអង្គការសង្គមស៊ីវិល និងសមាគមចំនួន ៧៥ ស្ថាប័ន ដើម្បីបង្ហាញអំពីលទ្ធផលដែលតំណាងអង្គការបានជួបជាមួយក្រសួងមហាផ្ទៃនាពេលកន្លងមកដោយក្នុងនោះមានដូចជាការបង្ហាញពីមតិធាតុចូលសម្រាប់ធ្វើវិសោធនកម្មច្បាប់សមាគម និងអង្គការមិនមែនរដ្ឋាភិបាលដែលបានដាក់ជូនក្រសួងមហាផ្ទៃ។
លោកលើកឡើងថា កិច្ចប្រជុំពិគ្រោះយោបល់រវាងក្រសួងមហាផ្ទៃ និងអង្គការសង្គមស៊ីវិលបានបញ្ចប់ទៅក៏ពិតមែន ប៉ុន្តែកិច្ចការតស៊ូមតិរបស់ក្រុមអង្គការសង្គមស៊ីវិលគឺមិនទាន់ត្រូវបានបញ្ចប់នៅឡើយទេ ព្រោះការធ្វើវិសោធនកម្មច្បាប់សមាគម និងអង្គការមិនមែនរដ្ឋាភិបាលនេះនៅតែបន្ត ខណៈការព្រួយបារម្ភ និងមតិធាតុចូលរបស់សង្គមស៊ីវិលក៏មិនទាន់ត្រូវបានដឹងថា នឹងត្រូវបានដាក់បញ្ចូលក្នុងសេចក្តីព្រាងច្បាប់នេះ ឬក៏អត់នៅឡើយនោះ។
លោកបញ្ជាក់ថា៖ «យើងក៏បានជជែកជាមួយគ្នាក្នុងចំណោមអង្គការដែលបានចូលរួមថា កម្មវិធីអ្វីដែលយើងត្រូវធ្វើបន្តទៀត ព្រោះនៅពេលរដ្ឋាភិបាល បញ្ចប់សេចក្តីព្រាងវិសោធនកម្មរបស់ខ្លួនហ្នឹង គឺខាងយើងនឹងដឹងព័ត៌មានបន្ថែមដើម្បីបានចូលរួមជជែកពិភាក្សាបន្ត»។
បើតាមលោក គិមអេង តាមរយៈមតិធាតុចូលរបស់ក្រុមសង្គមស៊ីវិលដែលបានធ្វើនៅក្នុងខេត្តចំនួន ៥ កន្លងមកគឺមានស្នើឲ្យកែប្រែនូវចំណុចមួយចំនួន និងដាក់បញ្ចូលនូវចំណុចជាច្រើនដោយក្នុងនោះ គឺការស្នើឲ្យកាត់បន្ថយភាពស្មុគស្មាញនៃការធ្វើបែបបទចុះបញ្ជី ការដាក់របាយការណ៍ ជាពិសេសនោះគឺការរឹតត្បិតសកម្មភាពរបស់ក្រុមអង្គការសង្គមស៊ីវិលជាដើម។
លោក ឈឹម កាន អគ្គនាយករងទទួលបន្ទុកជាប្រធាននាយកដ្ឋានកិច្ចការសមាគម និងគណបក្សនយោបាយប្រាប់ភ្នំពេញប៉ុស្តិ៍នៅថ្ងៃ ២៥ សីហា ថា កន្លងទៅក្រុមការងារបច្ចេកទេសបានជួបពិភាក្សា ជុំវិញការធ្វើវិសោធនកម្មនៃច្បាប់នេះរយៈពេល ៦ លើករួចមកហើយក្នុងនោះក៏បានទទួលនូវមតិធាតុចូលជាច្រើនពីសំណាក់តំណាងអង្គការសង្គមស៊ីវិល ដើម្បីយកមកពិចារណាផងដែរ។
លោកថា នៅថ្ងៃទី ២៨ សីហា ក្រុមការងារបច្ចេកទេសនៃក្រសួងមហាផ្ទៃនឹងបើកកិច្ចប្រជុំ ដើម្បីពិនិត្យ និងរៀបរៀងវិសោធនកម្មនេះហើយក៏នឹងពិចារណាទៅលើសំណើរបស់អង្គការសង្គមស៊ីវិលផងដែរ។ «ដូច្នេះសំណើ និងធាតុចូលទាំងអស់ហ្នឹងនឹងយកមកដាក់បញ្ចូល ហើយក្រុមការងារនឹងយកមកពិនិត្យឡើងវិញទាំងអស់ទៅលើទិដ្ឋភាពហ្នឹង»។
ច្បាប់ស្តីពីសមាគម និងអង្គការមិនមែនរដ្ឋាភិបាលដែលបានធ្វើវិសោធនកម្មចុងក្រោយត្រូវបានអនុម័តកាលពីឆ្នាំ ២០១៥ ដោយមាន ៩ ជំពូក និង ៣៩ មាត្រាតែច្បាប់នេះត្រូវបានអង្គការសង្គមស៊ីវិលជាតិ និងអន្តរជាតិរិះគន់ថា មានលក្ខណៈរឹតត្បិតសិទ្ធិសេរីភាព និងការបំពេញការងាររបស់សមាគម និងអង្គការមិនមែនរដ្ឋាភិបាល៕
