.jpg)
សេចក្ដីអំពាវនាវរួម អង្គការសង្គមស៊ីវិលទាំង ២៤។ រូបថត CCHR
ភ្នំពេញ៖ អង្គការសង្គមស៊ីវិលចំនួន ២៤ បានចេញសេចក្តីថ្លែងការណ៍រួមមួយដោយអំពាវនាវដល់រាជរដ្ឋាភិបាល ថ្នាក់ដឹកនាំមានសមត្ថកិច្ច និងមន្ត្រីទទួលបន្ទុកទាំងអស់ឱ្យយកចិត្តទុកដាក់ និងការពារ ទប់ស្កាត់ការបៀតបៀន ការរំលោភបំពានផ្លូវភេទ និងអំពើហិង្សាប្រឆាំងនឹងយេនឌ័រក្នុងអំឡុងពេលធ្វើចត្តាឡីស័ករយៈពេល ១៤ ថ្ងៃ និងនៅតំបន់បិទខ្ទប់។
សេចក្តីថ្លែងការណ៍រួមនេះ បានស្នើឱ្យអាជ្ញាធរពាក់ព័ន្ធបង្កើនការយកចិត្តទុកដាក់ ការពារ និងផ្សព្វផ្សាយលើកកម្ពស់ការយល់ដឹងអំពីករណីនៃការរំលោភបំពានផ្លូវភេទ អំពើហិង្សាលើស្ត្រី កុមារ និងក្រុមអ្នកស្រឡាញ់ភេទដូចគ្នា ដែលអាចកើតមាននៅក្នុងអំឡុងពេលនោះ។
ក្រុមអង្គការសង្គមស៊ីវិលទាំងនេះបានលើកឡើងថា «ជាការពិតណាស់ ការធ្វើចត្តាឡីស័ក គឺមានការចាំបាច់នៅក្នុងការកាត់បន្ថយ និងទប់ស្កាត់ការឆ្លងរីករាលដាលនៃជំងឺកូវីដ ១៩ ប៉ុន្តែការណ៍នេះក៏មានការប្រឈមនឹងផលវិបាកខាងផ្លូវចិត្ត និងផលរំខាននៃសង្គមផងដែរ»។
នៅក្នុងស្ថានភាពនេះ គេហៅថា ជាស្ថានភាពប្រតិកម្មនៃការធ្វើចត្តាឡីស័ក ដែលនៅក្នុងនោះអាចរាប់បញ្ចូលទាំងករណីកើនឡើងនៃអំពើហិង្សាប្រឆាំងនឹងយេនឌ័រ និងការរំលោភបំពានផ្លូវភេទជាដើម។
សេចក្តីថ្លែងការណ៍នេះ បានបន្តទៀតថា ស្ត្រី កុមារ និងក្រុមអ្នកប្តូរភេទ គឺជាក្រុមដែលចាត់ទុកថា ងាយរងគ្រោះជាងគេនៅក្នុងអំឡុងពេលនៃការរាតត្បាតជំងឺនេះ។ កម្រិតនៃភាពតានតឹងផ្លូវចិត្តរបស់ឪពុកម្តាយ បាននាំមកនូវការប្រើប្រាស់អំពើហិង្សាផ្លូវកាយ និងការមិនយកចិត្តទុកដាក់ថែរក្សាកុមារ។
អង្គការសង្គមស៊ីវិលបានបញ្ជាក់ថា «ស្ត្រី និងកុមារក៏ប្រឈមនឹងហានិភ័យខ្ពស់នៃការបៀតបៀនផ្លូវភេទ ការរំលោភបំពាន នៅពេលដែលពួកគេស្ថិតនៅទីតាំងនៃការបិទខ្ទប់ និងទីតាំងធ្វើចត្តាឡីស័ក ឬកន្លែងសម្រាកព្យាបាលរួម ដែលអំណោយផលដល់អ្នកប្រព្រឹត្ត ខណៈពេលដែលការយល់ដឹងអំពីការបៀតបៀនផ្លូវភេទ ឬការរំលោភបំពាន និងការផ្តល់កិច្ចអន្តរាគមន៍របស់អាជ្ញាធរនៅមានកម្រិត»។
ចំណែកឯក្រុមអ្នកប្តូរយេនឌ័រ/ភេទ អាចទទួលរងនូវការមាក់ងាយធ្ងន់ធ្ងរជាងមុននៅពេលដែលគាត់ស្ថិតក្នុងតំបន់ទីតាំងធ្វើចត្តាឡីស័ករួម ឬកន្លែងសម្រាកព្យាបាលរួមនេះ។
អង្គការសង្គមស៊ីវិលសុំឱ្យរដ្ឋាភិបាល លើកកម្ពស់បន្ថែមក្នុងការដាក់បញ្ចូលសារផ្សព្វផ្សាយទប់ស្កាត់អំពើហិង្សា ការរើសអើង និងការមាក់ងាយផ្អែកលើយេនឌ័រ នៅក្នុងតំបន់ចត្តាឡីស័ក និងតំបន់បិទខ្ទប់ ដែលបង្ហាញថា អំពើហិង្សាគ្រប់ទម្រង់ គឺមិនអាចអត់ឱនឱ្យបានជាដាច់ខាត ហើយអ្នកប្រព្រឹត្តនឹងត្រូវទទួលទោសទៅតាមច្បាប់។
អង្គការសង្គមស៊ីវិលទាំងនោះរួមមាន រ៉ាក់ (RHAC), គណៈកម្មាធិការនៃអង្គការមិនមែនរដ្ឋាភិបាលកម្ពុជា ដើម្បីអនុសញ្ញាលុបបំបាត់រាល់ទម្រង់នៃការរើសអើងលើស្រ្តី (NGO-CEDAW), មជ្ឈមណ្ឌលសិទ្ធិមនុស្សកម្ពុជា (CCHR), គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា, យេនឌ័រ និងអភិវឌ្ឍន៍ដើម្បីកម្ពុជា (GADC), សម្ព័ន្ធខ្មែរជំរឿន និងការពារសិទ្ធិមនុស្សលីកាដូ (LICADHO) និងអង្គការសង្គមស៊ីវិលមួយចំនួនទៀត៕
