ភ្នំពេញ៖ អង្គការសង្គមស៊ីវិលដែលធ្វើការលើស្ត្រី និងការងារចំនួន ៣ រួមគ្នាបើកវគ្គបណ្តុះបណ្តលជំនាញសហគ្រិនភាពដល់ស្ត្រី និងយុវជនប្រមាណ ១ ៥០០ នាក់ ដោយអង្គការទាំងនេះរំពឹងថា វិធីសាស្រ្តបណ្តុះបណ្តាលនេះនឹងជួយជំរុញកំណើនអាជីវកម្ម ឬការចាប់ផ្តើមអាជីវកម្មរបស់ស្ត្រី។
សេចក្តីប្រកាសរួមរបស់អង្គការទាំង ៣ នេះ បានឲ្យដឹងថា អង្គការផេក (Pact) ដែលអនុវត្តគម្រោងសហគ្រិននារីសកម្ម (WE Act) និងផ្តល់ថវិកាដោយទីភ្នាក់ងារជំនួយអាមេរិក USAID និងអង្គការអន្តរជាតិខាងការងារ (ILO) បានចុះកិច្ចព្រមព្រៀងភាពជាដៃគូនៅរសៀលថ្ងៃទី ២៣ ខែ មេសា ឆ្នាំ ២០២១ នេះ។
គម្រោងនេះ នឹងផ្តល់វគ្គបណ្តុះបណ្តាលជំនាញសហគ្រិនភាព និងជំនាញទន់ដល់ស្ត្រី និងយុវជនកម្ពុជាចំនួន ១ ៥០០ នាក់ ដើម្បីជំរុញកំណើនអាជីវកម្ម ឬការចាប់ផ្តើមអាជីវកម្មរបស់ពួកគេ។
សេចក្តីប្រកាសបានបញ្ជាក់ថា៖ «វគ្គបណ្តុះបណ្តាលនេះនឹងធ្វើឡើងដោយផ្អែកលើកម្មវិធីបណ្តុះបណ្តាលការអភិវឌ្ឍន៍សហគ្រាសតាមសហគមន៍ (CBED) របស់អង្គការ ILO ដោយផ្អែកលើសកម្មភាព និងការចូលរួម ដែលកម្មវិធីនេះត្រូវបានរៀបចំជាភាសាខ្មែរ និងស្របទៅនឹងបរិបទកម្ពុជា»។
លោកស្រី Veena Reddy នាយិកាបេសកកម្ម USAID ប្រចាំកម្ពុជា មានប្រសាសន៍ថា៖ «កិច្ចព្រមព្រៀងនេះ ជួយយើងឆ្ពោះទៅរកគោលបំណងរួមរបស់យើង ដែលនឹងជួយស្ត្រី និងយុវជនក្នុងស្ថានភាពនៃការរាតត្បាតជំងឺកូវីដ ១៩។ យើងសង្ឃឹមថា វិធីសាស្រ្តប្រកបដោយនវានុវត្តន៍នេះ និងកិច្ចសហការរបស់យើងជាមួយអង្គការ ILO និងអង្គការផេកនឹងផ្តល់ឱ្យពួកគេនូវចំណេះដឹង និងជំនាញចាំបាច់ដើម្បីកែលម្អជីវិត និងអាជីវកម្មរបស់ពួកគេ»។
លោកស្រី Sabine Joukes នាយិកាអង្គការផេកប្រចាំប្រទេសកម្ពុជា និងជានាយិកាគម្រោង WE Act មានប្រសាសន៍ថា៖ «យើងធ្វើជាដៃគូជាមួយអង្គការ ILO ដែលបានរៀបចំសម្ភារបណ្តុះបណ្តាលសម្រាប់បរិបទកម្ពុជា ជាជាងយើងរៀបចំសម្ភារបណ្តុះបណ្តាលឡើងវិញ»។
ទាំងអស់នេះនឹងជួយឱ្យដៃគូអនុវត្តន៍គម្រោង អាចសម្របសម្រួលវគ្គបណ្តុះបណ្តាល ដល់សហគ្រិន និងយុវជនឱ្យកាន់តែលឿន និងមានគុណភាពខ្ពស់ ដោយធានាបាននូវការទទួលបានផលខ្ពស់ ជាពិសេសក្នុងអំឡុងពេលការរាតត្បាតជំងឺកូវីដ ១៩ ដែលពួកគេអាចមានជម្រើសទទួលបានវគ្គបណ្តុះបណ្តាល តាមរយៈប្រព័ន្ធអនឡាញ ដើម្បីកសាងជំនាញ និងដោះស្រាយបញ្ហាដែលសហគ្រិនតែងតែលើកឡើង។
លោក Charles Bodwell អ្នកជំនាញការផ្នែកអភិវឌ្ឍសហគ្រាសនៃអង្គការ ILO មានប្រសាសន៍ថា៖ «ការបណ្តុះបណ្តាលដោយផ្អែកលើសកម្មភាពរបស់អង្គការ ILO គឺជាវិធីសាស្ត្របណ្តុះបណ្តាលដែលនាំឱ្យមានភាពរីកចម្រើនទៅមុខ មាននិរន្តរភាព និងទទួលបានផល»។
វិធីសាស្ត្រនេះ ត្រូវបានអនុវត្តដោយដៃគូជាង ១៤០ ហើយ ដោយបានផ្តល់ផលប្រយោជន៍ដល់ប្រជាជនប្រមាណ ៤០ ម៉ឺននាក់ នៅក្នុងតំបន់អាស៊ីប៉ាស៊ីហ្វិក។
តាមរយៈភាពជាដៃគូនេះ លោករំពឹងថា សហគ្រិនស្ត្រី និងបុរសវ័យក្មេងនៅក្នុងប្រទេសកម្ពុជា នឹងទទួលបានឱកាសបណ្តុះបណ្តាលអំពីជំនាញអាជីវកម្ម និងជំនាញទន់។
គម្រោង WE Act ធ្វើការជាមួយដៃគូប្រមាណ ៣០ ដែលរួមមានស្ថាប័នធ្វើអាជីវកម្មក្នុងស្រុក អង្គការក្រៅរដ្ឋាភិបាល សមាគម ក្រុមហ៊ុនឯកជន និងក្រុមបណ្តាញក្រៅប្រព័ន្ធ ដែលផ្តល់សេវាកម្មអភិវឌ្ឍន៍សមត្ថភាពដល់សហគ្រិនស្ត្រី និងយុវជន។
អង្គការ ILO គឺជាទីភ្នាក់ងារជំនាញរបស់អង្គការសហប្រជាជាតិដែលផ្តល់នូវជំនាញបច្ចេកទេសលើការអភិវឌ្ឍសហគ្រាស និងជំនាញទន់នៅកម្រិតអន្តរជាតិ បានរៀបចំសម្ភារបណ្តុះបណ្តាលជាភាសាខ្មែរសម្រាប់តម្រូវការក្នុងប្រទេសកម្ពុជា។
ភាពជាដៃគូនេះនឹងអនុញ្ញាតឱ្យគម្រោង WE Act ប្រើប្រាស់ និងរៀបចំសម្រួលសម្ភារកម្មវិធី CBED ដើម្បីផ្តល់អត្ថប្រយោជន៍ដល់សហគ្រិនស្ត្រី និងយុវជន ក្នុងការពង្រឹងអាជីវកម្ម ឬការចាប់ផ្តើមអាជីវកម្ម។
ដៃគូអនុវត្តន៍គម្រោងរបស់ WE Act ជាដំបូងនឹងធ្វើការណែនាំវគ្គបណ្តុះបណ្តាលនេះ ដល់អ្នកសម្របសម្រួលដោយមានការគាំទ្របច្ចេកទេសពីអង្គការ ILO។
វាគឺជាវិធីសាស្រ្តបណ្តុះបណ្តាលផ្អែកលើសកម្មភាពដ៏រឹងមាំ ដែលអាចត្រូវបានប្រើសម្រាប់ការបណ្តុះបណ្តាលតាមប្រព័ន្ធអនឡាញ (Online) និងដោយផ្ទាល់។ នេះបើតាមសេចក្តីប្រកាសរួមរបស់អង្គការទាំង ៣៕