.jpg)
ក្រសួងបិទសេខក្ដីប្រកាសអោយផ្អាកការលក់គ្រឿងស្រវឹងជាបណ្ដោះអាសន្ន នាពេលកន្លងទៅ។ ហុង មិនា
ភ្នំពេញ៖ សមាគម អង្គការសង្គមស៊ីវិលជិត ៤០ ស្ថាប័ន បានស្នើឲ្យរាជរដ្ឋាភិបាលកម្ពុជាបិទការផ្សព្វផ្សាយពាណិជ្ជកម្មគ្រឿងស្រវឹងគ្រប់រូបភាពជាអចិន្ត្រៃយ៍ ខណៈស្ថាប័នទាំងនេះគាំទ្ររដ្ឋាភិបាល ចំពោះការអនុវត្តបម្រាមនេះបានជោគជ័យក្នុងអំឡុងពេលផ្ទុះជំងឺកូវីដ ១៩។
កាលពីខែមេសា រាជរដ្ឋាភិបាលបានប្រកាសផ្អាកការផ្សព្វផ្សាយពាណិជ្ជកម្មគ្រឿងស្រវឹងតាមទូរទស្សន៍ វិទ្យុគ្រប់ប្រព័ន្ធ និងតាមអនឡាញទាំងអស់ រហូតដល់ថ្ងៃទី ៣០ ខែ មេសា ឆ្នាំ ២០២១ រួមទាំងហាមឃាត់ការលក់ដូរ និងពិសាគ្រឿងស្រវឹងគ្រប់ប្រភេទនៅក្នុងប្រទេសក្នុងពេលកំពុងរឹតបន្ដឹងវិធានការរដ្ឋបាល ដើម្បីបង្ការ និងទប់ស្កាត់ការឆ្លងរីករាលដាលនៃជំងឺកូវីដ ១៩។
សេចក្តីថ្លែងការណ៍រួមរបស់សមាគមអង្គការសង្គមស៊ីវិលចុះថ្ងៃទី ៤ ឧសភានេះ បានឲ្យដឹងថា សមាគមអង្គការសង្គមស៊ីវិលដែលធ្វើការលើវិស័យគ្រឿងស្រវឹង សុខភាព យុវជន សិទ្ធិមនុស្ស លទ្ធិប្រជាធិបតេយ្យ អភិបាលកិច្ចល្អ ធនធានធម្មជាតិ ស្វាគមន៍ចំពោះចំណាត់ការរបស់រាជរដ្ឋាភិបាលកម្ពុជា ជាពិសេសក្រសួងព័ត៌មានដែលបានដាក់ចេញវិធានការទាំងនេះ។
សេចក្តីថ្លែងការណ៍រួមនេះបានបន្តថា បច្ចុប្បន្នជំងឺកូវីដ ១៩ នៅកម្ពុជាបង្កជាក្តីបារម្ភយ៉ាងខ្លាំងព្រោះជំងឺនេះកំពុងរីករាលដាល និងគំរាមកំហែងដល់អាយុជីវិតពលរដ្ឋខ្មែរដោយមានអត្រាអ្នកឆ្លងប្រចាំថ្ងៃកាន់តែខ្ពស់។ ជាក់ស្តែងនៅថ្ងៃទីថ្ងៃទី ២ ខែ ឧសភា ឆ្នាំ ២០២១ កន្លងមកនេះ មានអ្នកឆ្លងកូវីដ ១៩ រហូតដល់ ៨៤១ នាក់ ចំណែកអ្នកស្លាប់ដោយសារជំងឺកូវីដ ១៩ រហូតមកទល់ពេលនេះ សរុបមានជាង ១០០ នាក់។
ស្ថាប័នទាំងនេះបានសង្កត់ធ្ងន់ថា ការប្រើប្រាស់គ្រឿងស្រវឹងជាហានិភ័យខ្ពស់ក្នុងការឆ្លងជំងឺកូវីដ ១៩ ព្រមទាំងបង្កផលប៉ះពាល់ អវិជ្ជមានយ៉ាងច្រើនដល់សុខភាព និងសុខុមាលភាពសង្គម ដូចជាគ្រោះថ្នាក់ចរាចរណ៍ អំពើហិង្សា និងជាបន្ទុកជំងឺជាង ២០០ មុខ។ នេះបើតាមការបញ្ជាក់ដោយរបាយការណ៍របស់អង្គការសុខភាពពិភពលោកឆ្នាំ ២០១២។
ហេតុដូច្នេះហើយទើបបានសមាគមអង្គការសង្គមស៊ីវិលស្នើឲ្យរាជរដ្ឋាភិបាលកម្ពុជាបិទការផ្សព្វផ្សាយពាណិជ្ជកម្មគ្រឿងស្រវឹងតាមគ្រប់រូបភាពជាអចិន្រ្តៃយ៍ ដើម្បីលើកស្ទួយសុខភាព និងសុខុមាលភាពសង្គម ព្រមទាំងជីវភាពរស់នៅរបស់ពលរដ្ឋ។ ជាមួយនេះ សមាគមអង្គការសង្គមស៊ីវិលក៏បានលើកទឹកចិត្តផងដែរ ដល់រាជរដ្ឋាភិបាលកម្ពុជាឲ្យបន្តរឹតត្បិតទៅលើការលក់ដូរ និងប្រើប្រាស់គ្រឿងស្រវឹង ដែលជាកត្តាបង្កហានិភ័យខ្ពស់ដល់ការឆ្លងជំងឺកូវីដ ១៩។
ស្ងាប័នទាំងនោះបានបញ្ជាក់ថា «ការបិទការផ្សព្វផ្សាយពាណិជ្ជកម្មគ្រឿងស្រវឹងជាអចិន្ត្រៃយ៍នឹងជួយកាត់បន្ថយការឆ្លងរីករាលដាលនៃជំងឺកូវីដ ១៩ ផង និងជួយដល់ប្រជាពលរដ្ឋបន្ទាប់ពីជំងឺកូវីដ ១៩ ផុតរលត់ផងក្នុងការកាត់បន្ថយការប្រើប្រាស់គ្រឿងស្រវឹង ដើម្បីលើកកម្ពស់សុខភាព និងសុខុមាលភាពសង្គម ក៏ដូចជា សន្សំថវិកាដោះស្រាយវិបត្តិបំណុល ក៏ដូចជា ការកាត់បន្ថយកំណើននៃភាពក្រីក្រនៅក្នុងសង្គម»។
លោក មាស សោភ័ណ អ្នកនាំពាក្យក្រសួងព័ត៌មាន បានលើកឡើងនៅថ្ងៃនេះថា ពាក់ព័ន្ធនឹងសំណើរបស់ស្ថាប័នទាំងនេះ ក្រសួងព័ត៌មានមិនទាន់អាចអនុវត្ត ឬសម្រេចទៅបាននៅឡើយទេ ដោយសារតែកម្ពុជាមិនទាន់មានច្បាប់ស្តីពីគ្រឿងស្រវឹង។
ប៉ុន្តែលោកបានសង្កត់ធ្ងន់ថា ដោយសារវិធានការរបស់ក្រសួងនាពេលកន្លងមកអនុវត្តបានជោគជ័យក្នុងការផ្អាកផ្សាយ និងលក់គ្រឿងស្រវឹងនោះ ក្រសួងនឹងពិចារណាដាក់ចេញវិធានការនេះបន្តទៀតក្នុងអំឡុងពេលការឆ្លងរីករាលដាលជំងឺកូវីដ ១៩ មិនទាន់ត្រូវបានបញ្ចប់។
លោកបានបញ្ជាក់ថា៖ «ដោយសារតែមានការវិវឌ្ឍនៃស្ថានភាពរីករាលដាលជំងឺកូវីដ ១៩ ក៏ដូចជាពាក់ព័ន្ធនឹងសេចក្តីសម្រេចរបស់រាជរដ្ឋាភិបាលក្នុងការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្តាលនេះ ក្រសួងកំពុងពិនិត្យទៅលើស្ថានភាពនេះ ហើយប្រសិនបើមានអ្វីត្រូវអនុវត្តបន្តទៀត ក្រសួងនឹងជូនដំណឹងជាបន្តបន្ទាប់ដល់សាធារណជនយើង»៕
