ភ្នំពេញៈ សង្គមស៊ីវិលបានសម្តែងនូវការព្រួយបារម្ភអំពីករណីនៃស្ថានភាពចាប់រំលោភសេពសន្ថវៈ ដែលបានកើតមានជាញឹកញាប់ ដែលអាចបណ្ដាលមកពីការខ្វះការអប់រំឱ្យបានទូលាយដល់តំបន់នានានៅក្នុងខេត្តមួយចំនួន បញ្ហានេះបានធ្វើឱ្យប៉ះពាល់ដល់កិត្តិយស សតិអារម្មណ៍ និងអាចបង្កឱ្យមានវិបត្តិផ្លូវចិត្តនៅក្នុងសង្គម ជាពិសេសសម្រាប់យុវតី និងក្មេងស្រី។
លោក ឯម ឬទ្ធី ប្រធានអង្គការអភិវឌ្ឍន៍ធនធានមនុស្ស និងសេដ្ឋកិច្ចបានថ្លែងឱ្យដឹងថា៖ «ខ្ញុំយល់ឃើញថា ព័ត៌មានអំពីច្បាប់ពាក់ព័ន្ធនឹងការរំលោភសេពសន្ថវៈមិនត្រូវបានផ្សព្វផ្សាយឱ្យបានទូលំទូលាយ ដើម្បីប្រជាពលរដ្ឋអាចដឹងថា តើការរំលោភសេពសន្ថវៈហ្នឹងមានទោសទណ្ឌបែបណាខ្លះនោះទេ»។
លោក ឬទ្ធី បានអះអាងថា ការរំលោភសេពសន្ថវៈគឺជាគុណវិបត្តិមួយសម្រាប់សង្គមដែលបង្កភាពអសន្តិសុខដល់ស្ត្រីនៅក្នុងតំបន់។ មួយវិញទៀត កាលណាបញ្ហានេះកើតឡើងញឹកញាប់ក្នុងសង្គម ឬតំបន់ណាមួយនោះ វាបង្កហានិភ័យធ្វើឱ្យស្ត្រីពេញវ័យមិនហ៊ានចេញទៅធ្វើកិច្ចការងារក្នុងរបរចិញ្ចឹមជីវិតផ្សេងៗ ចំណែកក្មេងស្រីក៏មិនហ៊ានចេញដើរម្នាក់ឯងជាពិសេសពេលទៅសាលារៀន។
លោក ម៉ាត់ អាល់ពី ប្រធានអង្គការអភិវឌ្ឍន៍សហគមន៍បានឱ្យដឹងថា ការរំលោភសេពសន្ថវៈក្នុងមួយរយៈពេលចុងក្រោយនេះ ពិតជាមានការកើតឡើងញឹកញាប់មែន ហេតុនេះអាជ្ញាធរមូលដ្ឋាន ឬស្ថាប័នពាក់ព័ន្ធគួរតែជំរុញការអប់រំផ្សព្វផ្សាយកិច្ចការងារនេះធ្វើយ៉ាងណាឱ្យមានការថយចុះខ្លះ។
លោក អាល់ពី ថ្លែងថា៖ «នេះគឺជាការងារដែលយើងត្រូវចូលរួមទាំងអស់គ្នា តាមរយៈប្រព័ន្ធផ្សព្វផ្សាយ តាមរយៈអង្គការសង្គមស៊ីវិល ឬក៏ស្ថាប័នរាជរដ្ឋាភិបាលក្តី គួរអប់រំផ្សព្វផ្សាយពីច្បាប់ ការយល់ដឹង និងផលប៉ះពាល់ជុំវិញរឿងរំលោភសេពសន្ថវៈនេះឱ្យបានទូលំទូលាយ»។
លោក សុខ ប្រុសពៅ ប្រជាពលរដ្ឋនៅក្នុងភូមិប្រាំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺបានប្រាប់ភ្នំពេញ ប៉ុស្តិ៍ ថា លោកមានការព្រួយបារម្ភជាខ្លាំងចំពោះសុវត្ថិភាពកូនស្រីដែលទើបពេញវ័យ នៅពេលសង្កេតឃើញមានករណីរំលោភសេពសន្ថវៈកើតឡើងញឹកញាប់ ជាពិសេសគឺអំឡុងពេលដែលពួកគេនៅផ្ទះពេលយប់ ហើយអាណាព្យាបាលជាប់រវល់ទៅធ្វើការងារនៅឆ្ងាយដូចជាទៅធ្វើចម្ការ។
ទោះយ៉ាងណាក៏ដោយលោកស្រី ញេប សុភាព អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារបានមានប្រសាសន៍ថា ក្នុងនាមតំណាងឱ្យរាជរដ្ឋាភិបាលមានការប្តេជ្ញាចិត្តខ្ពស់ក្នុងការលើកកម្ពស់ការពារឧត្តមប្រយោជន៍របស់កុមារទូទាំងប្រទេស មិនថាផ្តោតទៅលើតែអំពើបៀតបៀនផ្លូវភេទ ឬក៏យ៉ាងណាមួយនោះទេ កុមារត្រូវតែមានសិទ្ធិគ្រប់គ្រាន់។
លោកស្រី សុភាព ថ្លែងថា៖ «ជាទស្សនៈខ្ញុំ យល់ឃើញថាឪពុកម្តាយមិនគួរទុកកូនចោលមិនរវីរវល់កូននោះទេព្រោះវាជាកំហុសឆ្គងរបស់ឪពុកម្តាយធ្ងន់ធ្ងរណាស់»។
លោក អំ សំអាត មន្ត្រីបច្ចេកទេសជាន់ខ្ពស់នៃអង្គការការពារសិទ្ធិមនុស្សលីកាដូបានថ្លែងនាពេលកន្លងមកថា ពី ១ ឆ្នាំទៅ ១ ឆ្នាំ អង្គការការពារសិទ្ធិមនុស្សលីកាដូអង្កេតឃើញថា មានការបំពានផ្លូវភេទលើកុមារមានស្ថានភាពនេះកាន់តែធ្ងន់ធ្ងរច្រើនទៅៗ។ ចំពោះការបំពានផ្លូវភេទលើកុមារនៅក្រោមអាយុ ១៧ ឆ្នាំ ហាក់បីដូចជាច្រើនជាងស្ត្រីដែលពេញវ័យទៅទៀត។
ជាការកត់សម្គាល់របស់ភ្នំពេញប៉ុស្តិ៍ក្នុងរយៈពេលកន្លងមកថ្មីៗនេះ តាមរយៈការផ្សព្វផ្សាយនៃសារព័ត៌មាននានាបានឱ្យដឹងថា កាលពីថ្ងៃទី ២៩ ខែកញ្ញា បុរសម្នាក់បានចាប់រំលោភកូនស្រីបង្កើតអាយុ ១៣ ឆ្នាំ រហូតបានសម្រេចនៅក្នុងចម្ការដំឡូងស្ថិតក្នុងភូមិថ្មពូនកណ្ដាល ឃុំថ្មពូន ស្រុកព្រៃឈរ ខេត្តកំពង់ចាម។
នៅខេត្តស្វាយរៀងឪពុកចុងបានចាប់រំលោភកូនស្រីអាយុ ១១ ឆ្នាំ ក្នុងរយៈពេល ៩ ខែ រំលោភសម្រេច ៨ ដងទើបបែកការត្រូវសមត្ថកិច្ចឃាត់ខ្លួន។ នៅខេត្តពោធិ៍សាត់កាលពីថ្ងៃទី ២៧ ខែកញ្ញា បុរសម្នាក់បានចាប់រំលោភសេពសន្ថវៈលើនារីវ័យជាង ៥០ ឆ្នាំ បានសម្រេចនៅចំណុចបឹងកំពង់ខ្ទុំស្ថិតក្នុងភូមិកំពង់ខ្ទុំ ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់៕
វីដេអូ៖