ភ្នំពេញៈ អង្គការសង្គ្រោះកុមារ (save the children) ដាក់ដំណើរការគម្រោង REACT មានទឹកប្រាក់ ៣ លានអឺរ៉ូ (ប្រហែល ៣,៣៦ លានដុល្លារ) ដើម្បីធានាថា កុមារកម្ពុជាត្រូវបានការពារដោយច្បាប់ក្នុងការទទួលបានសេវាប្រកបដោយគុណភាពក្នុងគ្រួសារ ខណៈអង្គការនេះរកឃើញថា កុមារនៅតាមមណ្ឌលថែទាំ ៨០ ភាគរយ មានអាណាព្យាបាល តែការរស់នៅទីនោះដែលជាការជះឥទ្ធិពលមិនល្អដល់កុមារ។
លោកស្រី អេលីហ្សាប៊ែតភៀស នាយិការបស់អង្គការ Save the Children ប្រចាំកម្ពុជាបានថ្លែងក្នុងកម្មវិធីប្រកាសគម្រោងកាលពីម្សិលមិញថា គម្រោងរយៈពេល ៣ ឆ្នាំនេះនឹងបង្ការកុមារកុំឲ្យបែកបាក់ពីគ្រួសារនិងបង្កើតចំនួនកុមារដែលត្រូវបានធ្វើសមាហរណកម្មដោយជោគជ័យនិងសុវត្ថិភាពពីមណ្ឌលថែទាំកុមារទៅក្នុងគ្រួសារវិញ។លោកស្រីបន្តថា ប្រទេសកម្ពុជា មានការអភិវឌ្ឍគួរឲ្យកត់សម្គាល់លើកិច្ចការពារកុមារក្នុងវិស័យនានា ប៉ុន្តែនៅតែជួបប្រទះនូវបញ្ហាប្រឈមមួយចំនួននៅឡើយសម្រាប់កុមារ។
លោកស្រីបញ្ជាក់ថា៖ “យើងខ្ញុំធ្វើកិច្ចការនេះដោយពង្រឹងប្រព័ន្ធការពារកុមារដែលដឹកនាំដោយរដ្ឋាភិបាល ហើយស្របទៅនឹងសេចក្តីណែនាំរបស់អង្គការ សហប្រជាជាតិសម្រាប់ការថែទាំជំនួសនិងផែនការយុទ្ធសាស្ត្រ អភិវឌ្ឍន៍វិស័យសង្គមកិច្ចអតីតយុទ្ធជននិងយុវនីតិសម្បទា ឆ្នាំ ២០១៩-២០២៣ ដោយផ្តល់ អាទិភាពទៅដល់ការជួបជុំគ្រួសារ ការផ្តល់ជូននូវសេវាថែទាំជំនួស និងការបង្ការការបែកបាក់រវាងកុមារ និងគ្រួសារ»។
នៅឆ្នាំ ២០១៧ មានកុមារជាង ១៦ ពាន់នាក់ រស់នៅក្នុងមណ្ឌលថែទាំកុមារទូទាំងប្រទេស ហើយប្រមាណជា ៨០ ភាគរយនៃពួកគេមានឪពុកឬម្តាយឬមានទាំងឪពុកនិងម្តាយដែលនៅរស់។លោកស្រី អេលីហ្សាប៊ែត បានបន្តថា ទោះយ៉ាងណា កុមារទាំងនេះ នៅតែត្រូវបានអាណាព្យាបាលបញ្ជូនមកមណ្ឌលថែទាំដែលតាមរយៈការស្រាវជ្រាវអន្តរជាតិបានរកឃើញថា ការថែទាំកុមារក្នុងមណ្ឌលថែទាំ អាចផ្តល់ផលប៉ះពាល់រយៈពេលវែងដល់ការអភិវឌ្ឍផ្នែករាងកាយ សង្គម អារម្មណ៍ និងសតិបញ្ញារបស់កុមារ។
លោក ហ្វង់គ័ វីយោ ជាទីប្រឹក្សានិងជាប្រធានផ្នែកសហប្រតិបត្តិការប្រតិភូនៃសហភាពអឺរ៉ុបប្រចាំកម្ពុជាបានលើកឡើងនាឱកាសនោះដែរថា ការវិនិយោគលើការលើកកម្ពស់កិច្ចការពារសិទ្ធិកុមារ ដោយរួមទាំងឧត្តមភាពរបស់កុមារគឺជាអាទិភាពរបស់សហភាពអឺរ៉ុប។
លោកបានបន្តថា៖ «តាងនាមឱ្យប្រតិភូនៃសហភាពអឺរ៉ុបប្រចាំព្រះរាជាណាចក្រកម្ពុជា ខ្ញុំបាទមានសេចក្តីរីករាយយ៉ាងខ្លាំងក្នុងការឃើញគម្រោងដែលយើងខ្ញុំគាំទ្រស្របទៅនឹងគោលការណ៍ណែនាំស្តីពីការថែទាំជំនួសចំពោះកុមារ ដែលធ្វើឡើងនៅឆ្នាំ ២០១០ របស់អង្គការសហប្រជាជាតិនិងចូលរួមទៅដល់ការអនុវត្តផែនការសកម្មភាពរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងការធ្វើឱ្យប្រសើរឡើងនូវការថែទាំកុមារក្នុងប្រទេសកម្ពុជា»។
បើតាម លោក ហ្វង់គ័ វីយោ គិតពីឆ្នាំ ២០១៤ ដល់ឆ្នាំ ២០២០ សហភាពអឺរ៉ុបត្រូវចំណាយថវិកា ជាង ៤០០ លានអឺរ៉ូ ដើម្បីជួយកុមារនៅកម្ពុជា ក្នុងនោះ គម្រោង REACT នេះ ក៏ជាចំណែកមួយដែលបានចូលរួមផងដែរ ព្រោះបញ្ហានេះ នៅតែជាការប្រឈមរបស់កុមារកម្ពុជា។
លោក នឹម ថូត រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ថ្លែងថា នេះគឺជាការចូលរួមចំណែកមួយសម្រាប់ការអភិវឌ្ឍវិស័យសង្គមកិច្ចនៅកម្ពុជាដើម្បីធ្វើឲ្យកុមារមានភាពល្អប្រសើរដែលវានៅតែជាបញ្ហាមួយត្រូវយកចិត្តទុកដាក់។
លោកបានបញ្ជាក់ថា៖ «ការអនុវត្តកន្លងមក នៅមិនទាន់គ្រប់ជ្រុងជ្រោយនៅឡើយ ដែលតម្រូវឲ្យមានការកែលម្អ និងការបង្កើតការវិភាជថវិកាបន្ថែមទៀត សម្រាប់គាំទ្រដល់កុមារ ដែលពួកគេភាគច្រើន ងាយនឹងរងគ្រោះ»។
គម្រោងដែលមានទឹកប្រាក់ជាង ៣ លានអឺរ៉ូនេះនឹងអនុញ្ញាតឱ្យអង្គការ Save the Children ផ្សារភ្ជាប់បណ្តាញការពារកុមារឈានមុខទាំង ២ គឺបណ្តាញថែទាំកុមារក្នុងគ្រួសារជាអាទិភាពចម្បង (Family Care First) និងបណ្តាញភាពជាដៃគូដើម្បីការពារកុមារ (3PC) ដោយមានការចូលរួមពីអង្គការមិត្តសំឡាញ់ អង្គការទំនុកចិត្តកុមារកម្ពុជា ព្រមទាំងអង្គការជាតិ និងអន្តរជាតិចំនួន ១៣ ផ្សេងទៀត ក្នុងការចាប់ដៃគ្នាដើម្បីលើកកម្ពស់ និងគាំទ្រកិច្ចការពារកុមារនៅរាជធានីភ្នំពេញ ខេត្តបាត់ដំបង ព្រះសីហនុ កណ្តាល និងសៀមរាប៕