.jpg)
កិច្ចប្រជុំសភាដែលអនុម័តច្បាប់ស្ដីពីរបបសន្តិសុខសង្គមពីថ្ងៃទី ៨ តុលា។ រូបថត ហ្វេសប៊ុក
ភ្នំពេញៈ មួយថ្ងៃបន្ទាប់ពីរដ្ឋសភាអនុម័តលើសេចក្តីព្រាងច្បាប់ស្តីពីរបបសន្តិសុខសង្គម សហព័ន្ធសហជីពសមាគម និងអង្គការសង្គមស៊ីវិលជិត ១០ បានបង្ហាញការខកចិត្តជាខ្លាំងដោយបានអះអាងថា សេចក្តីព្រាងច្បាប់នេះមិនត្រូវបានផ្សព្វផ្សាយជាសាធារណៈ និងមិនបានផ្ដល់ឱកាសដល់តំណាងពួកគេបានចូលរួមពិគ្រោះយោបល់ឲ្យបានពេញលេញ។
កាលពីថ្ងៃទី ៨ ខែ តុលា ឆ្នាំនេះ សភាពេញអង្គបានអនុម័តជាឯកច្ឆន្ទលើសេចក្តីព្រាងច្បាប់ស្តីពីរបបសន្តិសុខសង្គមដែលមាន ១១ ជំពូក និង ១០៧ មាត្រា បន្ទាប់ពីច្បាប់នេះត្រូវបានគណៈរដ្ឋមន្ត្រីបញ្ជូនមកកាន់រដ្ឋសភាជាតិ ដើម្បីបន្តនីតិវិធីកាលពីថ្ងៃទី ២ ខែ សីហា ឆ្នាំ ២០១៩។
តាមសេចក្តីថ្លែងការណ៍រួមរបស់ក្រុមអង្គការ សមាគមទាំងនោះបានបញ្ជាក់កាលពីម្សិលមិញថាកាលពីថ្ងៃទី ១៨ ខែ កញ្ញា ឆ្នាំ ២០១៩ ពួកគេបានដាក់លិខិតរួមមួយមកលោក ហេង សំរិន ប្រធានរដ្ឋសភាក្នុងបំណងស្នើសុំអត្ថបទសេចក្តីព្រាងច្បាប់មួយនេះ និងស្នើសុំឲ្យមានការពិគ្រោះយោបល់ពេញលេញជាមួយអ្នកពាក់ព័ន្ធគ្រប់វិស័យឡើងវិញ។
សេចក្តីថ្លែងការណ៍បានបន្តថា ជាអកុសលរហូតមកទល់ពេលនេះសហព័ន្ធ សហជីព សមាគម និងអង្គការសង្គមស៊ីវិលមិនទាន់បានទទួលបានសេចក្តីព្រាងច្បាប់នេះនៅឡើយ ហើយស្រាប់តែបានឃើញសេចក្តីជូនដំណឹងរបស់អគ្គលេខាធិការដ្ឋាននៃរដ្ឋសភាជាតិបានបញ្ជាក់ពីការលើកយកសេចក្តីព្រាងច្បាប់នេះ និងសេចក្តីព្រាងច្បាប់មួយចំនួនទៀតមកពិភាក្សា និងអនុម័ត។
សេចក្តីថ្លែងការណ៍រួមបញ្ជាក់ថា៖ «យើងខ្ញុំស្នើដោយទទូចជាថ្មីទៀតសូមឲ្យស្ថាប័ននីតិប្បញ្ញត្តិធ្វើការពិចារណាឡើងវិញ ដោយពន្យារពេលនៃការអនុម័តសេចក្តីព្រាងច្បាប់នេះ ហើយផ្សព្វផ្សាយសេចក្តីព្រាងច្បាប់នេះជាសាធារណៈនិងធ្វើការពិគ្រោះយោបល់ជាមួយគ្រប់ភាគីពាក់ព័ន្ធឲ្យបានពេញលេញ ជាពិសេសតំណាងកម្មករនិយោជិត និងសហគមន៍ដែលធ្វើការងារផ្ទាល់ជាមួយប្រជាពលរដ្ឋ ដើម្បីធានាបាននូវប្រសិទ្ធភាពចំពោះអ្នកទទួលផលប្រយោជន៍ និងប៉ះពាល់ដោយសារច្បាប់នេះ»។
ជាមួយគ្នានេះក្រុមអង្គការសមាគមទាំងនោះបានលើកឡើងថា ស្របតាមគោលការណ៍នីតិរដ្ឋដែលឈរលើមូលដ្ឋានគណនេយ្យភាព និងតម្លាភាពក្នុងសង្គមក្នុងន័យនេះគណៈកម្មការសិទ្ធិមនុស្សនៃអង្គការសហប្រជាជាតិបានផ្តល់ជាអនុសាសន៍ថា កម្ពុជាគួរតែធានាឱ្យបាននូវតម្លាភាពក្នុងដំណើរការធ្វើច្បាប់ ឬ តាក់តែងច្បាប់ និងដាក់រាល់សេចក្តីព្រាង ឬស្នើច្បាប់ទាំងអស់ឱ្យសាធារណជនរកបានដើម្បីជួយសម្រួលដល់ការសន្ទនា និងការជជែកពិភាក្សាជាសាធារណៈដោយប្រជាពលរដ្ឋជាមួយអ្នកតំណាងរបស់ខ្លួនពិនិត្យឲ្យបានល្អិតល្អន់ និងស៊ីជម្រៅ។
លោក ឡេង ប៉េងឡុង អ្នកនាំពាក្យរដ្ឋសភាជាតិបានប្រាប់ពីម្សិលមិញថា ដោយសារសេចក្តីព្រាងច្បាប់នេះបានអនុម័តនៅក្នុងដំណាក់កាលរដ្ឋសភារួចទៅហើយ និងបានបញ្ជូនទៅដល់ស្ថាប័នព្រឹទ្ធសភា ដូច្នេះលោកក៏សង្ឃឹមថា ស្ថាប័នព្រឹទ្ធសភាក៏នឹងពិចារណាលើការស្នើសុំរបស់ក្រុមអង្គការទាំងនេះផងដែរ បើពិនិត្យឃើញថា ការស្នើសុំនេះពិតជាត្រឹមត្រូវ។
លោកបញ្ជាក់ថា៖ «ខ្ញុំយល់ថា គាត់ឲ្យយោបល់មានតម្លៃអាចថា យកមកពិចារណាដែរដើម្បីឲ្យគ្រប់គ្នាអាចយកមកពិចារណា ទោះច្បាប់នេះមកដល់ព្រឹទ្ធសភាក៏ដោយ ក៏ត្រូវប្រើពេលយូរទៀតមុននឹងប្រកាសឲ្យប្រើដែរ។ គំនិតហ្នឹង មើលទៅល្អ ឬត្រឹមត្រូវ ហើយបើប្រើទៅមានការពិបាក គួរតែពិចារណាដែរ»។
លោក ហេង សួរ អ្នកនាំពាក្យក្រសួងការងារ បណ្តុះបណ្តាលវិជ្ជាជីវៈមិនអាចសុំការអត្ថាធិប្បាយបានទេកាលពីម្សិលមិញដោយសារទូរស័ព្ទលោកមិនមានអ្នកទទួល។
ប៉ុន្តែក្នុងកិច្ចប្រជុំសភាមុនពេលអនុម័តសេចក្តីព្រាងច្បាប់នេះ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈថ្លែងថា សេចក្តីព្រាងនេះពិតជាមានសារៈសំខាន់បំផុតសម្រាប់បុគ្គលដែលស្ថិតក្នុងវិស័យសាធារណៈ បុគ្គលដែលស្ថិតក្នុងវិស័យឯកជន និងបុគ្គលស្វ័យនិយោជន៍។
លោកថា៖ «សេចក្តីព្រាងច្បាប់ស្តីពីរបបសន្តិសុខសង្គមនេះ មានគោលបំណងបង្កើតឱ្យមានរបបសន្តិសុខសង្គមនៃព្រះរាជាណាចក្រកម្ពុជាតាមគោលការណ៍សាមគ្គីធម៌ និងសមធម៌សង្គមដែលរួមមាន ៤ ផ្នែកគឺផ្នែកប្រាក់សោធនផ្នែកថែទាំសុខភាព ផ្នែកហានិភ័យការងារ និងផ្នែកនិកម្មភាពការងារសម្រាប់បុគ្គលដែលស្ថិតក្នុងវិស័យសាធារណៈ បុគ្គលដែលស្ថិតក្រោមច្បាប់ស្តីពីការងារគិតរួមទាំងបុគ្គលិកផ្លូវអាកាស នាវាសមុទ្រ និងអ្នកបម្រើតាមផ្ទះ ព្រមទាំងបុគ្គលស្វ័យនិយោជន៍»។
យ៉ាងណាក៏ដោយកាសែតភ្នំពេញប៉ុស្តិ៍មិនទាន់អាចស្វែងរកខ្លឹមសាររួមនៃសេចក្តីព្រាងច្បាប់នេះបាននៅឡើយទេ។
លោក ម៉ម ប៊ុននាង អ្នកនាំពាក្យរបស់ស្ថាប័នព្រឹទ្ធសភាបានប្រាប់ភ្នំពេញប៉ុស្តិ៍ពីម្សិលមិលថា ការពិនិត្យ និងឲ្យយោបល់លើសេចក្តីព្រាងច្បាប់នេះគឺផ្អែកលើការស្នើរបស់រាជរដ្ឋាភិបាល ហើយរដ្ឋសភាបានអនុម័ត និងបានបញ្ជូនមកកាន់ព្រឹទ្ធសភា ដូច្នេះដោយសារតែច្បាប់នេះបានកំណត់ថាជាការប្រញាប់មិនអាចឲ្យព្រឹទ្ធសភាមានពេលវេលាគ្រប់គ្រាន់ធ្វើតាមសំណើទាំងនេះបានទេ។
ម្យ៉ាងទៀតលោកបានអះអាងថា ដោយសារសេចក្តីព្រាងច្បាប់នេះ មុនឈានមកដល់ដៃព្រឹទ្ធសភា គឺបានឆ្លងកាត់ច្រើនដំណាក់កាលណាស់ ដូច្នេះព្រឹទ្ធសភានឹងប្រើពេលវេលាដែលខ្លួនមានដើម្បីពិនិត្យឲ្យបានគ្រប់ជ្រុងជ្រាយ។
លោកបញ្ជាក់ថា៖ «យើងមិនអាចទៅធ្វើតាមសង្គមស៊ីវិលទាមទារបានទេ ព្រោះមុននឹងច្បាប់ហ្នឹងបង្កើតក៏គេបានធ្វើសិក្ខាសាលាគ្រប់ជាន់ថ្នាក់ហើយ ដោយសារគាត់មិនចាប់អារម្មណ៍ខ្លួនគាត់ទេក្នុងការពិនិត្យតាំងពីហ្នឹង ហើយមកសុំពិគ្រោះ និងផ្តល់យោបល់មកដល់ព្រឹទ្ធសភាហើយ អត់បានទេ បើយោងតាមរដ្ឋធម្មនុញ្ញ យើងមានពេលតែ ៥ ថ្ងៃទេដើម្បីបំពេញឲ្យបានទាន់ពេលមុននឹងចូលកិច្ចប្រជុំព្រឹទ្ធសភាពេញអង្គ»៕
