.jpg)
បុរសវ័យចំណាស់ជក់បារីនៅទីសាធារណៈ។ ហេង ជីវ័ន
ភ្នំពេញៈ អង្គការចលនាដើម្បីសុខភាពកម្ពុជាបានលើកឡើងថា ប្រទេសកម្ពុជាស្ថិតនៅលំដាប់ទី ៤ នៅក្នុងពិភពលោកដែលហូតពន្ធលើថ្នាំជក់ទាបបំផុត។ បើប្រទេសកម្ពុជាដំឡើងពន្ធរហូតដល់ ៧៥ ភាគរយនៃតម្លៃបារីលក់រាយតាមអនុសាសន៍របស់អង្គការសុខភាពពិភពលោក និងធនាគារពិភពលោកនោះកម្ពុជានឹងទទួលពន្ធចំណូលបន្ថែម ២៣៥ លានដុល្លារសហរដ្ឋក្នុងរយៈពេល ៥ ឆ្នាំខាងមុខ និង ៩៣៣ លានដុល្លារសហរដ្ឋក្នុងរយៈពេល ១៥ ឆ្នាំខាងមុខ។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានប្រាប់ ភ្នំពេញ ប៉ុស្តិ៍ ថា ការដំឡើងពន្ធលើផលិតផលថ្នាំជក់ គឺជាវិធានការដែលមានប្រសិទ្ធភាពបំផុតក្នុងការកាត់បន្ថយចំនួនអ្នកស្លាប់ និងការខាតបង់សេដ្ឋកិច្ចបណ្តាលមកពីថ្នាំជក់។
លោកបានប្រាប់ថា៖ «ការដំឡើងពន្ធលើផលិតផលថ្នាំជក់ត្រូវបានសកលលោកទាំងមូលបានចាត់ទុកថាជាយុទ្ធសាស្ត្រឈ្នះ ឈ្នះ ដែលយុទ្ធសាស្ត្រឈ្នះទី ១ គឺរដ្ឋនឹងប្រមូលបានប្រាក់ចំណូលពន្ធបន្ថែម និងយុទ្ធសាស្ត្រឈ្នះទី ២ គឺនៅពេលដែលយើងដំឡើងពន្ធ យើងនឹងកាត់បន្ថយនូវទុក្ខវេទនារបស់ប្រជាពលរដ្ឋដែលកើតឡើងដោយសារការប្រើប្រាស់បារី ដែលការជក់បារីអាចនាំឱ្យកើតមានជំងឺផ្សេងៗ បាត់បង់ជីវិត និងពិការភាពជាដើម»។
លោកថា នៅពេលដែលមានសមាជិកគ្រួសារណាម្នាក់ដែលមានជំងឺ ឬពិការ ឬស្លាប់ នោះនឹងនាំឱ្យមានទុក្ខវេទនារបស់គ្រួសារក៏ដូចជាសង្គមជាតិទាំងមូល ហើយវានឹងធ្វើឱ្យបាត់បង់នូវធនធានមនុស្ស និងធ្វើឱ្យមានបញ្ហាជាច្រើនទៀតផងដែរ។
នាយកប្រតិបត្តិអង្គការដដែលនេះបានបញ្ជាក់ទៀតថា នៅក្នុងតំបន់អាស៊ាន ប្រទេសកម្ពុជា គឺជាប្រទេសដែលស្ថិតក្នុងចំណោមប្រទេសដែលមានពន្ធលើផលិតផលថ្នាំជក់ទាបជាងគេបំផុត មានន័យថា កម្ពុជាមានពន្ធលើថ្នាំជក់ត្រឹមតែ ២៥ ភាគរយចំពោះបារីក្នុងស្រុក (ពន្ធធៀបនឹងតម្លៃលក់រាយ) និង ៣១ ភាគរយចំពោះបារីនាំចូល បើប្រៀបធៀបនឹងប្រទេសថៃគឺមានអត្រាពន្ធធៀបនឹងតម្លៃលក់រាយរហូតដល់ ៧០ ភាគរយ ប្រទេសសិង្ហបុរីមាន ៦៩ ភាគរយ ហើយសូម្បីតែប្រទេសដែលនៅជិតខាងកម្ពុជាក៏មានអត្រាពន្ធប្រមាណជា ៤០ ទៅ ៥០ ភាគរយដែរ។
លោក មុំ គង់ ប្រាប់ថា៖ «ការដំឡើងពន្ធដែលយើងហៅថា ឧត្តមានុភាពរបស់អង្គការសុខភាពពិភពលោក ឬរបស់ពិភពលោករដ្ឋជាភាគីតែម្តងថា ការដំឡើងពន្ធដើម្បីឱ្យរដ្ឋបានប្រាក់ចំណូលពន្ធបន្ថែម ហើយកាត់បន្ថយទុក្ខវេទនាប្រជាពលរដ្ឋនោះ ទាល់តែការដំឡើងពន្ធផលិតផលថ្នាំជក់ស្មើនឹង ២ ភាគ ៣ នៃតម្លៃរាយ ឬប្រមាណជា ៧០ ភាគរយនៃតម្លៃលក់រាយ»។
លោកថា៖ «ប្រទេសមួយចំនួនដូចជាថៃ សិង្ហបុរី គឺគេបានឡើងទៅដល់ពន្ធនេះហើយ ប៉ុន្តែប្រទេសយើងនៅមានគម្លាតឆ្ងាយនៅឡើយ។ ដូចនេះអ្វីដែលយើងចង់បាននោះគឺយើងចង់ឱ្យមានការដំឡើងពន្ធលើផលិតផលបារីឱ្យបានខ្ពស់ហើយទៅតាមឆន្ទៈរបស់រដ្ឋាភិបាល និងឱ្យការដំឡើងពន្ធនោះទៀងទាត់ទៅតាមអនុសាសន៍របស់អង្គការសុខភាពពិភពលោក»។
លោកថា បើតាមការសិក្សារបស់អង្គការសហប្រជាជាតិ កម្មវិធីអភិវឌ្ឍន៍សហប្រជាជាតិ (UNDP) អង្គការសុខភាពពិភពលោក (WHO) ជាដើម បានបង្ហាញថា ប្រជាពលរដ្ឋកម្ពុជាចំនួន ១៥ ០០០ នាក់បានស្លាប់ដោយសារថ្នាំជក់ជារៀងរាល់ឆ្នាំដែលក្នុង ១ ថ្ងៃមានប្រហែលជា ៤០ នាក់បានស្លាប់ដែលនេះនៅតែជាចំនួនដ៏ច្រើនក្នុងនោះដែរវាបានធ្វើឱ្យខាតបង់ទឹកប្រាក់ ៦៤៩ លានដុល្លារក្នុង ១ ឆ្នាំ ដែលស្មើនឹង ៣ ភាគរយនៃផលិតផលក្នុងស្រុកសរុបរបស់កម្ពុជា។ ក្នុងនោះ ៥៨៤ លានដុល្លារបណ្ដាលមកពីការខាតបង់ផលិតភាពសេដ្ឋកិច្ចគឺមរណភាពមុនអាយុកំណត់ ផលិតភាពធ្លាក់ចុះពីការសម្រាកជក់បារី និងអវត្តមានពីការងារ។
លោក មុំ គង់ ថ្លែងថា ការអនុវត្តការហាមជក់បារីនៅកន្លែងធ្វើការ ហាង ឬភោជនីយដ្ឋានពីមធ្យមទៅខ្នាតធំសណ្ឋាគារ ឬផ្ទះសំណាក់ និងកន្លែងសាធារណៈផ្សេងៗទៀតនោះ មានការផ្លាស់ប្តូរច្រើន និងបានអនុវត្តទៅតាមច្បាប់របស់ប្រទេសកម្ពុជា។
លោកថ្លែងថា៖ «យើងបានសហការជាមួយក្រសួងពាក់ព័ន្ធមួយចំនួនដូចជា ក្រសួងទេសចរណ៍ជាដើមដែលតែងតែចុះធ្វើការពិនិត្យ និងបានផ្តល់ការលើកទឹកចិត្តទៅដល់អ្នកដែលបានអនុវត្តបានល្អ និងបានជំរុញឱ្យហាងតូចៗត្រូវអនុវត្តតាមផងដែរ។ យើងឃើញថាមានការផ្លាស់ប្តូរច្រើន យើងមានមោទនភាពរបស់យើងដែលយើងបានធ្វើ ប៉ុន្តែមិនទាន់ទៅដល់កម្រិតដែលយើងចង់បានទៅតាមច្បាប់នៅឡើយទេ»។
យោងតាមអង្គការចលនាដើម្បីសុខភាពកម្ពុជាបានបញ្ជាក់ថា ក្នុងចំណោមប្រទេសអាស៊ានទាំង ១០ កម្ពុជាជាប្រទេសដែលមានអត្រាស្រូបផ្សែងបារី ខ្ពស់ជាងគេនៅភោជនីយដ្ឋាន។ អ្នកដែលរងផលប៉ះពាល់ភាគច្រើនគឺកុមារនិងស្ត្រី។ វិធានការហាមជក់បារីនៅកន្លែងធ្វើការ ឬកន្លែងសាធារណៈមិនត្រឹមតែជួយអ្នកមិនជក់បារីពីការស្រូបផ្សែងបារីពីគេទេ ថែមទាំងជួយអ្នកជក់ឱ្យកាត់បន្ថយ និងឈានទៅផ្តាច់បារីទៀតផង។
ឆ្នាំ ២០១៩ ក្រសួងសុខាភិបាលបានឱ្យដឹងថាប្រជាពលរដ្ឋខ្មែរភាគច្រើនមានការយល់ដឹងពីគ្រោះថ្នាក់នៃផលិតផលថ្នាំជក់ ដោយក្នុងនោះអត្រានៃការប្រើប្រាស់ថ្នាំជក់ក្នុងចំណោមមនុស្សពេញវ័យអាយុចាប់ពី ១៨ ឆ្នាំឡើងទៅបានថយចុះក្នុងរយៈពេល ១០ ឆ្នាំចុងក្រោយ គឺចុះពីជិត ៤៩ ភាគរយមកនៅជាង ៣៥ ភាគរយចំពោះបុរស និងស្ត្រីពី ២០,៥៣ ភាគរយមកនៅត្រឹម ១១,៦ ភាគរយ៕
