The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​ពីរ​ថ្កោលទោស​ការ​គំរាម​អ្នក​កាសែត​ពិការ

អង្គការ​ពីរ​ថ្កោលទោស​ការ​គំរាម​អ្នក​កាសែត​ពិការ

អ្នក​កាសែត​ពិការ​ជើង​ម្ខាង​របស់​សំឡេង​ប្រជាធិបតេយ្យ​ពេល​ចុះ​យក​ព័ត៌មាន​កន្លង​មក​។
អ្នក​កាសែត​ពិការ​ជើង​ម្ខាង​របស់​សំឡេង​ប្រជាធិបតេយ្យ​ពេល​ចុះ​យក​ព័ត៌មាន​កន្លង​មក​។ រូបថត ហ្វេសប៊ុក

អង្គការ​ពីរ​ថ្កោលទោស​ការ​គំរាម​អ្នក​កាសែត​ពិការ

ភ្នំពេញៈ អង្គការ​ជាតិ និង​អន្តរជាតិ​ប្រកាស​ថ្កោលទោស​ចំពោះ​ការ​គំរាមកំហែង​របស់​ក្រុម​សន្តិសុខ​សាលា​រាជធានី​ភ្នំពេញ​មក​លើ​អ្នក​យក​ព័ត៌មាន​ទូរទស្សន៍​អនឡាញ VOD ពីរ​រូប​ដែល​ក្នុង​នោះ​មាន​ជនពិការ​ម្នាក់​ផង​ដែរ។

សេចក្តី​ប្រកាស​ព័ត៌មាន​រួម​របស់​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) Reporter Without Border និង Southeast Asian Press Alliance ចុះ​ថ្ងៃ​ទី ៦ ខែ​សីហា​ម្សិលមិញ​បាន​ឲ្យ​ដឹង​ថា​អ្នក​សារព័ត៌មាន VOD លោក ឃុត សុគន្ធ និង​លោក​ ហេង វិចិត្រ ត្រូវ​បាន​គំរាម និង​វាយប្រហារ​នៅ​ព្រឹក​ថ្ងៃ​ព្រហស្បតិ៍​ ខណៈ​ពួកគេ​កំពុង​យក​ព័ត៌មាន​ពី​ការ​តវ៉ា​របស់​អ្នក​បឹងកក់​នៅ​មុខ​សាលា​រាជធានី​។ អ្នក​ទាំង​ពីរ​បាន​រាយការណ៍​ថា​សន្តិសុខ​សាលា​រាជធានី​បាន​ធាក់​លោក សុគន្ធ ដែល​ពិការ​ជើង​ម្ខាង និង​ព្យាយាម​ដកហូត​បំផ្លាញ​កាមេរ៉ា​ពួកគេ​បន្ទាប់ពី​ចោទ​ពួកគេ​ថា​ជា​ក្រុម​ប្រឆាំង។

លោក ឃុត សុគន្ធ ដែល​ពិការ​ជើង​ជាង ១០ ឆ្នាំ​មក​ហើយ​ដោយសារ​ពស់​ពឹស​ចឹក​បាន​ឲ្យ​ដឹង​ថា ​លោក ត្រូវ​បាន​សន្តិសុខ​ម្នាក់​ដែល​ចំណាំ​មុខ​បាន​នោះ​ធាក់​ពីរ​លើក​មក​ហើយ​បើ​ទោះ​ជា​គាត់​ព្យាយាម​គេច​ឆ្ងាយ​ពី​ការ​ប្រមូល​ផ្តុំ​ដែល​ឈាន​ដល់​ការ​ប៉ះទង្គិច​កន្លង​មក​ក្ដី។

លោក​ថា៖ «ខ្ញុំ​ឈរ​សម្ភាស​អ្នក​មាន​ជម្លោះ​ដីធ្លី​ក្បែរ​សាលា​ពេទ្យ​ឆ្ងាយ​ពី​ច្រក​មុខ​សាលា​រាជធានី​ព្រោះ​ខ្លាច​គេ​វាយ​ត្រូវ​ប៉ុន្តែ​ស្រាប់​តែ​មាន​សន្តិសុខ​ប្រមាណ ៤ ទៅ ៥ នាក់​មក​ធាក់​ពី​ក្រោយ​ធ្វើឲ្យ​ដួល​លើ​មនុស្ស​នៅ​ខាង​មុខ។ ខ្ញុំ​មិន​ដឹង​ថា​តើ​ពួកគាត់​ដឹង​ថា​ខ្ញុំ​ពិការ​ជើង​ឬ​អត់​ទេ? តែ​ភាគច្រើន​ធ្លាប់​ជួប​ខ្ញុំ​កន្លង​មក»។

តប​នឹង​រឿង​នេះ​អ្នកនាំពាក្យ​សាលា​រាជធានី លោក ឡុង ឌីម៉ង់ បាន​ទទួល​ស្គាល់​នូវ​វិធានការ​លើសលប់​នេះ​ប៉ុន្តែ​លោក​ក៏​ស្នើ​ទៅ​អ្នក​សារព័ត៌មាន​វិញ​ឲ្យ​ចៀសវាង​ការ​ដើរតួ​ដូច​អ្នក​តវ៉ា​ដោយ​គប្បី​អនុវត្ត​តាម​តែ​វិជ្ជាជីវៈ​របស់​ខ្លួន។

លោក​ថា៖ «ក្រោយ​កើត​ហេតុ​គាត់​បាន​តេ​មក​ខ្ញុំ​ដែរ​ ខ្ញុំ​បាន​ប្រាប់​វិញ​ថា​ខ្ញុំ​នឹង​យក​បញ្ហា​នេះ​មក​ណែនាំ​តែ​ខ្ញុំ​ក៏​សុំ​ឲ្យ​អ្នក​សារព័ត៌មាន​កុំ​តាំង​ខ្លួន​ដូច​អ្នក​តវ៉ា​ពេក»៕

អត្ថបទគួរចាប់អារម្មណ៍