The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​មូលនិធិ​សកល​គំរាម​កាត់​ជំនួយ

អង្គការ​មូលនិធិ​សកល​គំរាម​កាត់​ជំនួយ

អង្គការ​មូលនិធិ​សកល​គំរាម​កាត់​ជំនួយ

131220_02
កម្មវិធីចែកមុងជ្រលក់ថ្នាំនៅខេត្តសៀមរាបកាលពីឆ្នាំមុន ធិក កល្បាណ

ភ្នំពេញៈ អង្គការ​មូលនិធិ​សកល បាន​គំរាម​ព្យួរ ឬ​កាត់​បន្ថយ​ជំនួយ​សុខាភិបាល​ដល់​កម្ពុជា ដែល​មាន​ចំនួន​សរុប​ជាង ១០០ លាន​ដុល្លារ​ប្រសិន​បើ​ក្រសួង សុខាភិបាល មជ្ឈមណ្ឌល​ជាតិ​ប្រឆាំង​ជំងឺ​អេដស៍ សើស្បែក និង​កាមរោគ និង​អង្គការ MEDi-CAM មិន​ប្រគល់​ប្រាក់​ដែល​ប្រើ​មិន​ត្រឹម​ត្រូវ ដែល​បាន​កំណត់​ក្នុង​ការ​ស៊ើប​អង្កេត​របស់​អង្គការ​មូលនិធិ​សកល​នេះ​ទេ​នោះ។

ក្នុង​លិខិត​ផ្ញើ​ជូន​លោក ម៉ម ប៊ុនហេង រដ្ឋ​មន្រ្តី សុខាភិបាល នៅ​ថ្ងៃ ទី៩ ខែ ធ្នូ ហើយ​ទទួល​បាន​ដោយ ភ្នំពេញ ប៉ុស្តិ៍ កាល​ពី​ម្សិលមិញ អង្គការ​មូលនិធិ​សកល បាន​ឲ្យ​ដឹង​ថា ប្រសិន​បើ​ប្រាក់ ៤៧២ ៨៤១ ដុល្លារ​មិន​ត្រូវ​បាន​ប្រគល់​ឲ្យ​មក​វិញ​ក្នុង​រយៈ​ពេល ៣០ ថ្ងៃ​ទៀត​ទេ​នោះ អង្គការ​អាច​មិន​បន្ត ជំនួយ ឬ​កាត់​បន្ថយ​ជំនួយ​សរុប ១០៦ លាន​ដុល្លារ។ ចំនួន​ថវិកា​ដែល​ត្រូវ​ប្រគល់​មក​វិញ​ស្មើ​នឹង ៤១០ ៧១២ ដុល្លារ​ត្រូវ​បាន​ស្នើ​សុំ​ពី​ក្រសួង សុខាភិបាល ហើយ​ទាក់​ទង​នឹង​កម្រៃ​ជើងសា​មិន​ត្រឹម​ត្រូវ ដែល​មន្រ្តី ជាន់​ខ្ពស់​នៅ​មជ្ឈមណ្ឌល​ជាតិ​ប្រឆាំង​ជំងឺ​គ្រុន​ចាញ់ បាន​ទទួល​ពី​អ្នក​ផ្គត់​ផ្គង់​មុង​អន្តរជាតិ​រវាង​ឆ្នាំ ២០០៦ និង ២០១២។

លោក Mark Eldon-Edington ប្រធាន​ផ្នែក​គ្រប់​គ្រង​ជំនួយ​របស់​អង្គការ មូលនិធិ​សកល បាន​សរសេរ​ថា៖ «សូម​ជ្រាប​ថា​ក្រសួង សុខាភិបាល មជ្ឈមណ្ឌល​ជាតិ​ប្រឆាំង​ជំងឺ​អេដស៍ សើ​ស្បែក និង​កាមរោគ និង​អង្គការ MEDiCAM ត្រូវ​បាន​កំណត់​ឲ្យ​ប្រគល់​ប្រាក់​មក​ឲ្យ​អង្គការ​មូលនិធិ​សកល​វិញ​នៅ​ថ្ងៃ​តែ​មួយ ក្នុង​រយៈ​ពេល​តែ ៣០ ថ្ងៃ​ទៀត​ទេ។ ខ្ញុំ​សូម​សង្កត់​ធ្ងន់​លើ​ភាព​បន្ទាន់​នៃ​សំណើ​នេះ»។ ប្រាក់​ជំនួយ ដែល​រង​ផល​ប៉ះពាល់ នៅ​ថ្ងៃ ទី៩ ខែ មករា ដែល​ជា​ថ្ងៃ​ចុងក្រោយ​នៃ​រយៈ​ពេល ៣០ ថ្ងៃ រាប់​បញ្ចូល​ជំនួយ​ជំងឺ​អេដស៍/មេរោគ​អេដស៍​ដែល​មាន​តម្លៃ ៥៧ លាន​ដុល្លារ ជំនួយ​ទាក់​ទង​នឹង​ជំងឺ​គ្រុន​ចាញ់​ដែល​មាន​តម្លៃ​ប្រហែលជា ២៨ លាន​ដុល្លារ និង​ជំនួយ​ពង្រឹង​ប្រព័ន្ធ​សុខាភិបាល​ដែល​មាន​តម្លៃ​ជិត ២០ លាន​ដុល្លារ​ទៀត។

អង្គការ​ក្រៅ​រដ្ឋាភិបាល​ផ្នែក​សុខភាព​កាល ពី​ម្សិលមិញ​បាន​ថ្លែង​ថា ការ​ព្យួរ ឬ​កាត់​បន្ថយ​ជំនួយ​ទាំង​នោះ​អាច​ប៉ះពាល់​ធ្ងន់​ធ្ងរ​លើ​កម្មវិធី​ដែល ធ្វើ​សកម្មភាព​ប្រឆាំង​ជំងឺ​គ្រុន​ចាញ់ និង​ជំងឺ​អេដស៍/មេរោគ​អេដស៍​នៅ​កម្ពុជា។

បើ​ទោះ​បី​ជា​អង្គការ​មូលនិធិ​សកល ប្រើ​ពាក្យ​ខ្លាំងៗ​ក៏​ដោយ ក៏​ប៉ុន្តែ​ក្រសួង សុខាភិបាល ហាក់​បី​ដូច​ជា​មិន​បាន​ខិតខំ​ដើម្បី​បំពេញ​តាម​ការ​កំណត់​នេះ​ទេ។

មន្រ្តី​ជាន់​ខ្ពស់​ម្នាក់​នៅ​ក្រសួង សុខាភិបាល ដែល​មិន​ចង់​បញ្ចេញ​ឈ្មោះ បាន​ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា៖ «បើ​ទោះ​បី​ជា​ខ្ញុំ​មិន​បាន​មើល​ឃើញ​លិខិត​ក៏​ដោយ​ខ្ញុំ​ក៏​មិន​ខ្វល់ អំពី​ការ​គំរាម​របស់​អង្គការ​មូលនិធិ​សកល​ដែរ ហើយ​ថា ក្រសួង​មិន​គួរ​ទទួល​ខុស​ត្រូវ​បង់​សង​នោះ​ទេ»។ លោក​បន្ថែម​ថា៖ «យើង​ត្រូវ​រក​បុគ្គល​ពិត​ដែល​ប្រើ​ប្រាក់​នោះ​បង់​ឲ្យ​គេ។ យើង​មិន​ចាំ​បាច់​បង់​សង​ទេ ប៉ុន្តែ​វា​មិន​មែន​មាន​ន័យ​ថា យើង​គួរ​នៅ​ស្ងាត់​ដែរ​។ យើង​ត្រូវ​ស៊ើប​អង្កេត​រឿង​ក្តី​រក​ឲ្យ​ឃើញ​បុគ្គល​ពិត​ដែល​ពាក់ព័ន្ធ។ វា​មិន​សំខាន់​ទេ [ប្រសិន​បើ​មូលនិធិ​សកល​កាត់​ជំនួយ] ក៏​ដោយ យើង​មាន​អង្គការ​ដទៃ​ទៀត​ជួយ​។ កុំ​ស្តី​បន្ទោស​រដ្ឋាភិបាល ពីព្រោះ​យើង​មិន​ដឹង​អ្វី​គ្រប់​យ៉ាង​ទេ»។ លោក​បាន​បង្វែរ​សំណួរ​បន្ថែម​ទៀត​ទៅ​រដ្ឋ​មន្រ្តី សុខាភិបាល លោក ម៉ម ប៊ុនហេង ដែល​មិន​អាច​ទាក់​ទង​សុំ​អត្ថាធិប្បាយ​បាន។

លោក មាន ឈីវុន នាយក NCHADS មិន​អាច​ទាក់​ទង​សុំ​អត្ថាធិប្បាយ​បាន​ទេ ខណៈ​នាយក​ប្រតិបត្តិ​នៃ MEDiCAM លោក សិន សុមុនី បាន​ថ្លែង​ថា លោក «មិន​មាន​ពេល​វេលា» សម្រាប់​ឆ្លើយ​តប​សំណួរ​ទេ។

លោក ទីម វ៉ូរ៉ា នាយក​ប្រតិបត្តិ​នៃ​អង្គការ​សម្រប​សម្រួល​ស្តីពី​មេរោគ​អេដស៍ និង​ជំងឺ​អេដស៍ (HACC) បាន​ថ្លែង​ថា កម្ពុជា​ពឹង​ផ្អែក​លើ​អង្គការ​មូលនិធិ​សកល សម្រាប់​ថវិកា​ជួយ​ជន​រងគ្រោះ​ដោយ​មេរោគ​អេដស៍ និង​ជំងឺ​អេដស៍។ លោក​បាន​ថ្លែង​បន្ត​ថា៖ «ខ្ញុំ​គិត​ថា វា​ពិត​ជា​ប៉ះពាល់ ពី​ព្រោះ [រដ្ឋាភិបាល] កំពុង​ទិញ​ឱសថ​ក្រោម​ថវិកា​របស់​អង្គការ​មូលនិធិ​សកល។ ដូច្នេះ មនុស្ស​ជាង ៥ ម៉ឺន​នាក់​ដែល​កំពុង​រស់​នៅ​ដោយ​ផ្ទុក​មេរោគ​អេដស៍​និង​ជំងឺ​អេដស៍ ដែល​ប្រើ​ឆ្នាំ​ពន្យារ​អាយុ នឹង​ទទួល​រង​ប៉ះពាល់​ប្រសិន​បើ​ពួក​គេ​កាត់​ថវិកា។ តើ​នរណា​នឹង​ឧបត្ថម្ភ​ចំពោះ​ការ​ទិញ​ថ្នាំ​សម្រាប់​មនុស្ស​ទាំង​នោះ?»។

«ខ្ញុំ​គិត​ថា អង្គការ​មូលនិធិ​សកល​មិន​គួរ​ធ្វើ​ដូច្នេះ​ទេ។ ពួក​គេ​គួរ​តែ​ស្វែង​រក​យន្តការ​មួយ​ទៀត​ដើម្បី​ដោះស្រាយ​ជាមួយ​រដ្ឋាភិបាល ហើយ​មិន​ត្រូវ​កាត់​ជំនួយ​បែប​នេះ​ទេ ពីព្រោះ​វា​មិន​ប៉ះពាល់​ដល់​អ្នក​ដែល​ប្រព្រឹត្ត​អំពើ​ពុករលួយ​ទេ ប៉ុន្តែ​វា​ប៉ះ​ពាល់​ដល់​អ្នក​ដែល​កំពុង​តែ​រស់​នៅ​ផ្ទុក​មេរោគ​អេដស៍ និង​ជំងឺ​អេដស៍»។

លោក អ៊ឹម សារុន នាយក​ប្រចាំ​ប្រទេស​នៅ​អង្គការ​ដៃ​គូ​សម្រាប់​ការ​អភិវឌ្ឍ (PFD) ដែល​ជា​អង្គការ​ក្រៅ​រដ្ឋាភិបាល​ធ្វើ​ការងារ​លើ​គម្រោង​ដែល​ផ្តល់​មូលនិធិ​ដោយ​អង្គការ​មូលនិធិ​សកល​សម្រាប់​ការ​ការពារ​និង​គ្រប់​គ្រង ជំងឺ​គ្រុន​ចាញ់ បាន​ថ្លែង​ថា ការ​កាត់​ជំនួយ​ចំពោះ​កម្មវិធី​ជំងឺ​គ្រុន​ចាញ់​អាច​មាន​ផល​ប៉ះ​ពាល់​ធំ​មួយ។

លោក​បាន​បន្ត​ថា៖ «ចំពោះ​ខ្ញុំ ខ្ញុំ​គិត​ថា វា​នឹង​មាន​ផល​ប៉ះពាល់​ច្រើន​វា​ពិត​ជា​មាន​ផល​ប៉ះពាល់​ហើយ​ក្នុង​នាម​ជា​ដៃ​គូ​សំខាន់​នៅ​ក្នុង​វិស័យ​ជំងឺ​គ្រុនចាញ់​អង្គការ PFD គឺ​ពិត​ជា​បារម្ភ​អំពី​បញ្ហា​នេះ»។ «កម្មវិធី​ជាតិ​គឺជា​ឆ្អឹង​ខ្នង ហើយ​នៅ​ពេល​វា​មិន​អាច​ដំណើរការ​វា​នឹង​មាន​ផល​ប៉ះពាល់​ជាច្រើន​ទៅ​លើ​ប្រជាជន​ដែល​ត្រូវ​ទទួល​អត្ថ​ប្រយោជន៍»។

លោក Seth Faison នាយក​ផ្នែក​ប្រាស្រ័យ​ទាក់​ទង​នៅ​អង្គការ​មូលនិធិ​សកល ដែល​មាន​មូលដ្ឋាន​នៅ​ទីក្រុង ហ្សឺណែវ បាន​ថ្លែង​កាល​ពី​ម្សិលមិញ​ថា អង្គការ​តែង​តែ​មាន​ការ​ប្រុង​ប្រយ័ត្ន​នៅ​ពេល​ព្យួរ​ជំនួយ។ លោក​បាន​ថ្លែង​នៅ​ក្នុង​អ៊ីមែល​ថា៖ «យើង​តែង​តែ​ធ្វើ​ការ​ដោយ​ប្រុង​ប្រយ័ត្ន មិន​ទុក​ជីវិត​មនុស្ស​ក្នុង​ហានិភ័យ​ទេ។ នៅ​ពេល​វា​ចាំ​បាច់​ដើម្បី​ព្យួរ​ឬ​កាត់​បន្ថយ​ជំនួយ យើង​ខិតខំ​ធ្វើ​ការ​ស្វែង​រក​ជម្រើស​ផ្សេងៗ​ដែល​អាច​នាំ​ឲ្យ​មាន​ការ​បន្ត​សេវា​សម្រាប់​អ្នក​ដែល​ទទួល​រងគ្រោះ»។

នៅ​ក្នុង​លិខិត​មួយ​ចុះ​ថ្ងៃ ទី៩ ធ្នូ អង្គការ​មូលនិធិ​សកល បាន​សុំ​ឲ្យ​រដ្ឋ​មន្រ្តី សុខាភិបាល លោក ម៉ម ប៊ុនហេង ទាក់​ទង​នាយក​អង្គការ NCHADS និង MEDiCAM ដើម្បី «ធានា​ថា​ព័ត៌មាន​បច្ចុប្បន្នភាព​ស្តី​ពី​វឌ្ឍនភាព​នៃ​ការ​ផ្តល់​ថវិកា​វិញ» ត្រូវ​បាន​ផ្តល់​ឲ្យ​ត្រឹម​ថ្ងៃ ទី១៦ ធ្នូ។

លោក Faison កាល​ពី​ម្សិលមិញ មិន​បាន​ឆ្លើយ​តប​អំពី​ថា តើ​ព័ត៌មាន​បច្ចុប្បន្នភាព​ណា​មួយ​ត្រូវ​បាន​ទទួល ហើយ​លោក​ក៏​មិន​បាន​និយាយ​ផង​ដែរ​ថា តើ​ស្ថាប័ន​ពាក់ព័ន្ធ​ណា​មួយ ធ្វើ​ការ​ប្តេជ្ញា​ចិត្ត​ចំពោះ​ការ​ផ្តល់​ថវិកា​វិញ។

អង្គការ​មូលនិធិ​សកល បាន​ថ្លែង​នៅ​ក្នុង​ការ «ប៉ាន់​ប្រមាណ» របស់​ខ្លួន​ការ​ចំណាយ​មិន​សម​ស្រប​នៃ​ថវិកា​ចំនួន ៤១០ ៧១២ ដុល្លារ​ទៅ CNM ដោយ​អ្នក​ផ្គត់​ផ្គង់​បាន​បង្ខំ​ឲ្យ​ថវិកា​នោះ​ចំណាយ​លើស​សម្រាប់​មុង ដែល​នេះ​ជា​មូលហេតុ​នាំ​ឲ្យ​មាន​ការ​ស្នើ​សុំ​ថវិកា​ទាំង​មូល​ត្រឡប់​ទៅ​វិញ។

អង្គការ​មូលនិធិ​សកល​បាន​សុំ​ឲ្យ NCHADS ប្រគល់​ថវិកា​វិញ​ចំនួន ៤១ ៤០៤ ដុល្លារ ពាក់​ព័ន្ធ​នឹង​ការ​ចោទ​ប្រកាន់​អំពី​បន្លំ​នៅ​ក្នុង​គម្រោង​លទ្ធកម្ម​ដោយ​មន្រ្តី​ជាន់​ខ្ពស់​ម្នាក់ ខណៈ MEDiCAM បន្លំ​ថវិកា​ចំនួន ២០ ៧២៥ ដុល្លារ សម្រាប់​តំណែង​បុគ្គលិក​ពីរ​នាក់​ក្នុង​ឆ្នាំ ២០០៩ ដែល​មិន​មែន​ជា​តំណែង​ពិត​ប្រាកដ៕ TK/PS

អត្ថបទគួរចាប់អារម្មណ៍