The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​មូលនិធិ​សកល​ដក​ការ​គំរាម​កាត់​ផ្តាច់​ជំនួយ

អង្គការ​មូលនិធិ​សកល​ដក​ការ​គំរាម​កាត់​ផ្តាច់​ជំនួយ

អង្គការ​មូលនិធិ​សកល​ដក​ការ​គំរាម​កាត់​ផ្តាច់​ជំនួយ

140108_06a
ស្ត្រីជាម្តាយជាច្រើននាក់បាននាំកូនតូចៗរបស់ពួកគាត់មកព្យាបាលជំងឺផ្សេងៗ ហុង មិនា

ភ្នំពេញៈ អង្គការ​មូលនិធិ សកល បាន​ដក​ចេញ​នូវ​ការ​គំរាម​កំហែង​របស់​ខ្លួន​ថា នឹង​កាត់​ផ្តាច់ ឬ​កាត់​បន្ថយ​ជំនួយ​ខាង​សុខាភិបាល​ទៅ​ឲ្យ​កម្ពុជា​ដែល​មាន​ទឹក​ប្រាក់​ជាង ១០០ លាន​ដុល្លារ ទោះ​បី​មិន​ទាន់​ទទួល​បាន​មួយ​ចំណែក​ធំ​នៃ​មូលនិធិ​ដែល​គេ​ប្រើ​ប្រាស់​ខុស​ដែល​ត្រូវ​បាន​គេ​បញ្ជាក់​ក្នុង​ការ​ស៊ើប​អង្កេត​ផ្ទៃ​ក្នុង​មួយ​ដែល​ខ្លួន​បាន​ស្នើ​ឲ្យ​គេ​បញ្ជូន​ប្រាក់​នោះ​មក​ឲ្យ​វិញ​ឲ្យ​បាន​មុន​ថ្ងៃ​កំណត់ គឺ​ថ្ងៃ ទី៩ ខែ មករា។

លិខិត​មួយ​ដែល​គេ​ផ្ញើ​ទៅ​ឲ្យ​រដ្ឋ​មន្ត្រី​ក្រសួង សុខាភិបាល លោក ម៉ម ប៊ុនហេង កាល​ពី​ថ្ងៃ ទី៩ ខែ ធ្នូ អង្គការ​មូលនិធិ​សកល បាន​គំរាម​កាត់​ផ្តាច់ ឬ​កាត់​បន្ថយ​ជំនួយ​ដែល​មាន​ទឹក​ប្រាក់ ១០៦ លាន​ដុល្លារ ប្រសិន​បើ​ប្រាក់​ចំនួន ៤២៧.៨៤១ ដុល្លារ មិន​ត្រូវ​បាន​ប្រគល់​មក​ឲ្យ​វិញ​ដោយ​មជ្ឈមណ្ឌល​ជាតិ​សម្រាប់​មេរោគ​អេដស៍/ជំងឺ​អេដស៍ ជំងឺ​សើ​ស្បែក និង​ជំងឺ​ឆ្លង​តាម​ការ​រួមភេទ អង្គការ​ក្រៅ​រដ្ឋាភិបាល​ហៅ​ថា MEDiCAM និង​ក្រសួង សុខាភិបាល។

ទោះ​បី អង្គការ​នេះ មិន​ទាន់​ទទួល​បាន​ប្រាក់ ៤១០.៧១២ ដុល្លារ​ពី​ក្រសួង សុខាភិបាល ដែល​មាន​ចំនួន​ទឹក​ប្រាក់​ច្រើន​ជាង​គេ​ដែល​ត្រូវ​បាន​គេ​ស្នើ​ឲ្យ​បង្វិល​មក​វិញ​ដែល​ទឹក​ប្រាក់​នេះ​ពាក់​ព័ន្ធ​នឹង​កម្រៃ​ជើង​សា​មិន​សម​ស្រប​មួយ​ដែល​ទទួល​ដោយ​ក្រុម​មន្រ្តី​ជាន់​ខ្ពស់​នៅ​មជ្ឈមណ្ឌ​ជំងឺ​គ្រុន​ចាញ់​ជាតិ​ក៏​បាន​និយាយ​ឲ្យ​ដឹង​ថា ខ្លួន​លែង​មាន​ផែនការ​កាត់​ផ្តាច់​ជំនួយ​នេះ​ទេ។

លោក Seth Faison ប្រធាន ទំនាក់​ទំនង​អង្គការ​នេះ​ដែល​មាន​មូលដ្ឋាន​នៅ​ក្រុង ហ្ស៊ឺណែវ បាន​និយាយ​ថា៖ «យើង​ទទួល​បាន​ការ​បង់​ប្រាក់​ពី​មជ្ឈមណ្ឌល​ជាតិ​សម្រាប់​មេរោគ​អេដស៍/ ជំងឺ​អេដស៍ ជំងឺ​សើ​ស្បែក និង​ជំងឺ​ឆ្លង​តាម​ការ​រួម​ភេទ​ហើយ យើង​នឹង​ផ្តល់​អនុសាសន៍​ឲ្យ​ចាត់​វិធានការ​ភ្លាម​តាម​សំណើ​របស់​អង្គការ​មូលនិធិ​សកល។ យើង​ក៏​ទទួល​បាន​ការ​បង់​ប្រាក់​មួយ​ចំណែក​ពី MEDiCAM ដែរ​។ យើង​រង់ចាំ​កិច្ច​សហ​ប្រតិបត្តិការ​ដូច​គ្នា​ដែរ​ពី​មជ្ឈមណ្ឌល​ជំងឺ គ្រុន​ចាញ់​ជាតិ»។

លោក​បាន​បញ្ជាក់​ថា៖ «យើង​រំពឹង​ថា​គ្រប់​ភាគី​ទាំង​អស់​នឹង​ទទួល​ខុស​ត្រូវ​ទាំង​ស្រុង​ជុំវិញ ទម្លាប់​អនុវត្ត​ការ​គ្រប់​គ្រង​ជំនួយ​នេះ។ ក្នុង​កិច្ច​ពិភាក្សា​នេះ យើង​ទទួល​បាន​ការ​ឆ្លើយ​តប​ប្រកប​ក្នុង​ន័យ​ស្ថាបនា​ជុំវិញ​សំណើ​របស់​យើង ដូច្នេះ​នៅ​ពេល​នេះ​យើង មិន​មាន​ផែនការ​កាត់​ផ្តាច់​ឬ​កាត់​បន្ថយ​ការ​ផ្តល់​មូលនិធិ​នៅ​ពេល​ខាង​មុខ​នេះ​ទេ»។

លោក​បាន​បន្ថែម​ថា៖ «ទោះ​ជា​យ៉ាង​នេះ​ក្តី យើង​នឹង​វាយតម្លៃ​ជំនួយ​នៅ​ពេល​នេះ ហើយ​នៅ​ពេល​ខាង​មុខ យើង​នឹង​កែ​សម្រួល​ផែនការ​របស់​យើង​ឲ្យ​បាន​សមស្រប»។

មជ្ឈមណ្ឌល​ជាតិ​សម្រាប់​មេរោគ​អេដស៍/ជំងឺ​អេដស៍ ជំងឺ​សើ​ស្បែក និង​ជំងឺ​ឆ្លង​តាម​ការ​រួម​ភេទ ត្រូវ​បាន​គេ​ស្នើ​ឲ្យ​ប្រគល់​ប្រាក់​ចំនួន ៤១.៤០៤ ដុល្លារ​ដែល​ពាក់ព័ន្ធ​នឹង​ការ​ផ្គត់​ផ្គង់​ដោយ​មន្រ្តី​ជាន់​ខ្ពស់ រីឯ MEDiCAM វិញ ត្រូវ​បាន​គេ​ស្នើ​ឲ្យ​ប្រគល់​ប្រាក់​ចំនួន ២០.៧២៥ ដុល្លារ តាម​ការ​ចោទ​ប្រកាន់​ថា​បាន​យក​សម្រាប់​តំណែង​បុគ្គលិក​ពីរ​នាក់​ដែល​មិន​មាន។

ប្រធាន​មជ្ឈមណ្ឌល ជាតិ​សម្រាប់​មេរោគ​អេដស៍/ជំងឺ​អេដស៍ ជំងឺ​សើ​ស្បែក​និង​ជំងឺ​ឆ្លង​តាម​ការ​រួម​ភេទ លោក មាន ឈីវុន លោក​វេជ្ជបណ្ឌិត ចរ ម៉េងជូ និង​រដ្ឋ​មន្រ្តី​ក្រសួង សុខាភិបាល លោក ម៉ម ប៊ុនហេង មិន​អាច​ទាក់​ទង​បាន​ទេ​កាល​ពី​ម្សិលមិញ រីឯ​នាយក​ប្រតិបត្តិ MEDiCAM លោក ស៊ិន សូមុនី បាន​បិទ​ទូរស័ព្ទ​នៅ​ពេល​ទាក់ទង​ទៅ។

អង្គភាព​ប្រឆាំង​អំពើ​ពុករលួយ​ថា​ខ្លួន​កំពុង​ស៊ើប​អង្កេត​ការ​ចោទ​ប្រកាន់​របស់​អង្គការ មូលនិធិ​សកល ប៉ុន្តែ​មិន​ទាន់​ចេញ​ផ្សាយ​លទ្ធផល​ឬ​ធ្វើ​ការ​ចាប់​ខ្លួន​ជន​ណា​ទេ៕ NR

អត្ថបទគួរចាប់អារម្មណ៍