ភ្នំពេញៈ អង្គការស្បៀង និងកសិកម្មនៃសហប្រជាជាតិ (FAO) មន្ត្រីជំនាញនៃក្រសួងកសិកម្ម និងក្រសួងបរិស្ថាន បានជួបពិភាក្សាគ្នាក្នុងសិក្ខាសាលាថ្នាក់ជាតិមួយកាលពីថ្ងៃទី ១៤ ខែ មិថុនា នៅសណ្ឋាគារសាន់វេ ដើម្បីសម្រេចលើសេចក្ដីព្រាងមួយស្ដីពីការផ្សាំុនឹងអាកាសធាតុនិងភាពធន់ចំពោះសហគមន៍នេសាទឆ្នេរសមុទ្រនៅកម្ពុជា ហៅថា CamAdapt មុននឹងស្នើសុំថវិកាពីមូលនិធិសកលជួយដល់សហគមន៍នេសាទនេះ។
សេចក្ដីប្រកាសព័ត៌មានរបស់ FAO បញ្ជាក់ថា គម្រោង CamAdapt ជាគម្រោងរួមគ្នាដែលអនុវត្តដោយអង្គការ FAO ក្រសួងបរិស្ថាន និងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ដើម្បីរួមចំណែកដល់វិធានការសម្របសម្រួលលើគំនិតផ្ដួចផ្ដើមស្ដីពីការនេសាទនិងការគ្រប់គ្រងឆ្នេរសមុទ្រ។ គម្រោងរួមគ្នានេះ គាំទ្រដល់សហគមន៍ពឹងផ្អែកលើជលផលនៅតាមមាត់សមុទ្រ ដើម្បីឱ្យពួកគេសម្របខ្លួនទៅនឹងការប្រែប្រួលអាកាសធាតុ តាមរយៈការពង្រឹងប្រព័ន្ធអេកូឡូស៊ីឆ្នេរសមុទ្រ និងសម្របសម្រួលជីវភាពរស់នៅរបស់ពួកគេ។
សេចក្ដីប្រកាសព័ត៌មានបន្តថា ថ្វីដ្បិតប្រព័ន្ធអេកូឡូស៊ីឆ្នេរសមុទ្រនិងសមុទ្រ មានសារ:សំខាន់ខ្លាំងសម្រាប់អភិវឌ្ឍសេដ្ឋកិច្ចកម្ពុជា និងជីវភាពរស់នៅរបស់សហគមន៍នេសាទក្ដី ប៉ុន្តែសហគមន៍នេសាទនៅតាមឆ្នេរសមុទ្រ នៅតែស្ថិតក្នុងភាពងាយរងគ្រោះដោយបញ្ហាមួយចំនួន។
បញ្ហាទាំងនោះ មានដូចជា ការរស់នៅពឹងផ្អែកលើធនធានធម្មជាតិ ការប្រែប្រួលអាកាសធាតុ ដែលរួមមាន ព្យុះ ការឡើងកម្ពស់ទឹកសមុទ្រ និងការផ្លាស់ប្ដូររបបទឹកភ្លៀង ភាពក្រីក្រ ការរស់នៅដាច់ស្រយាល និងការមិនបានចាត់បញ្ចូលក្នុងការអភិវឌ្ឍ។
លោក អេង ជាសាន ប្រធានរដ្ឋបាលជលផល ដែលចូលរួមក្នុងសិក្ខាសាលាមិនអាចសុំការបញ្ជាក់អំពីគម្រោងនេះបានទេកាលពីម្សិលមិញ៕