ភ្នំពេញៈ អង្គការ Humane Society International ផលិតខ្សែភាពយន្តជីវចលខ្នាតខ្លីមួយក្រោមចំណងជើងថា “ជួយសង្គ្រោះសត្វទន្សាយ Ralph - Save Ralph” ដើម្បីបញ្ឈប់ការធ្វើតេស្តគ្រឿងសម្អាងលើសត្វនៅជុំវិញពិភពលោក និងកម្ពុជា។ ឆ្លើយតបនឹងសាច់រឿងនៃការផលិតខ្សែភាពយន្តនេះ មន្ត្រីជំនាញបញ្ជាក់ថា កម្ពុជាមិនមានករណីបែបនេះកើតឡើងទេ។
យោងតាមសេចក្តីប្រកាសព័ត៌មានរបស់អង្គការ Humane Society International កាលពីថ្ងៃទី ៧ មេសា ឆ្នាំ ២០២១ ឱ្យដឹងថា ទោះបីជាមានការហាមឃាត់នៅបណ្តាប្រទេសចំនួន ៤០ ក៏ដោយ ជាក់ស្តែងសកម្មភាពបែបនេះនៅតែកំពុងអនុវត្តយ៉ាងស្របច្បាប់នៅឡើយនៅតាមតំបន់ជាច្រើនលើពិភពលោកក្នុងនោះរួមទាំងប្រទេសកម្ពុជាផងដែរ ហើយថែមទាំងមានប្រតិកម្មតបតផងដែរនៅតាមតំបន់មួយចំនួន។ សកម្មភាពនេះជាហេតុធ្វើឱ្យសត្វជាច្រើនរាប់ពាន់ក្បាលនៅតែទទួលរងនូវការឈឺចាប់ និងស្លាប់យ៉ាងសោកសង្រេងឥតឈប់ឈរ។
លោក Jeffrey Flocken ដែលជាប្រធានអង្គការ Humane Society International ថ្លែងថាខ្សែភាពយន្តរឿងជួយសង្គ្រោះសត្វទន្សាយ Ralph - Save Ralph គឺជាការអំពាវនាវដាស់ស្មារតីមួយថា សត្វជាច្រើននៅតែបន្តរងគ្រោះដោយសារគ្រឿងសម្អាង ហើយឥឡូវនេះដល់ពេលដែលត្រូវរួមគ្នាដើម្បីហាមឃាត់វាហើយ។
លោក Jeffrey Flocken ថ្លែងថា៖ «សព្វថ្ងៃ យើងមានវិធីសាស្ត្រត្រឹមត្រូវជាច្រើនដែលមិនពាក់ព័ន្ធនឹងសត្វដើម្បីធានាបាននូវសុវត្ថិភាពផលិតផល។ ដូច្នេះហើយមិនមានការលើកលែងនោះទេចំពោះការបង្កការឈឺចាប់ដល់សត្វ ដូចជាទន្សាយ Ralph ដោយការធ្វើតេស្តគ្រឿងសម្អាង ឬគ្រឿងផ្សំផលិតផលគ្រឿងសម្អាង»។
យុទ្ធនាការជួយសង្គ្រោះសត្វទន្សាយរបស់អង្គការ HSI គឺដើម្បីដោះស្រាយបញ្ហា ដែលជាកង្វល់នៃការធ្វើតេស្តពិសោធសត្វតាមលំនាំដើមដែលគេមិននឹកស្មានដល់តាមរយៈដំណើររឿងរបស់សត្វទន្សាយ មួយដើម្បីជាពន្លឺឆ្លុះបញ្ជាំងអំពីស្ថានភាពរបស់ទន្សាយជាច្រើនរាប់មិនអស់ និងសត្វដទៃទៀត ដែលកំពុងតែរងគ្រោះនាពេលនេះនៅតាមមន្ទីរពិសោធន៍នៅជុំវិញពិភពលោក។ វាជួយឱ្យអ្នកទស្សនាជួយហាមឃាត់ជាដាច់ខាតចំពោះការធ្វើតេស្តគ្រឿងសម្អាងលើសត្វ។
លោក Aduane Joseph Alcantara អ្នកគ្រប់គ្រងយុទ្ធនាការអាស៊ានរបស់អង្គការ Humane Society International បានថ្លែងថា នៅក្នុងប្រទេសកម្ពុជា មានការកើនឡើងនូវតម្រូវការផលិតផល ដែលមិនពាក់ព័ន្ធនឹងការធ្វើតេស្តលើសត្វ និងការគាំទ្រជាសាធារណៈឱ្យមានការផ្លាស់ប្តូរ។
ផ្អែកតាមការស្ទង់មតិ បង្ហាញថាមានប្រជាជនកម្ពុជា ៨០ ភាគរយ គាំទ្រការហាមឃាត់ចំពោះការធ្វើតេស្តពិសោធលើសត្វដើម្បីផលិតគ្រឿងសម្អាង និងមានការគាំទ្រស្រដៀងគ្នាយ៉ាងច្រើនគួរឱ្យកត់សម្គាល់ចំពោះការហាមឃាត់បែបនេះនៅតំបន់អាស៊ាន។
លោកបន្តថា ជាលទ្ធផលនៃការជំរុញលើកទឹកចិត្តទាំងនេះ ប្រទេសកម្ពុជា ក៏ដូចជាតំបន់អាស៊ានទាំងមូលចាំបាច់ត្រូវបោះជំហានឆ្ពោះទៅរកអនាគតនៃការផលិតគ្រឿងសម្អាងដែលមិនពាក់ព័ន្ធនឹងការធ្វើតេស្តពិសោធគ្រឿងសម្អាងលើសត្វ។
ខ្សែភាពយន្តរឿង “ជួយសង្គ្រោះសត្វទន្សាយ Ralph” (#SaveRalph) គឺជាយុទ្ធនាការតស៊ូមតិ និងលើកកម្ពស់ការយល់ដឹងជាសាធារណៈមួយរបស់អង្គការ HSI ដែលមានគោលបំណងបង្ហាញពីការរងទុក្ខវេទនាដ៏គួរឱ្យខ្លោចផ្សារបស់សត្វដែលបានទទួលរងក្នុងពេលធ្វើតេស្តពិសោធ។
លោកថ្លែងថា៖ «វាក៏ជាការក្រើនរំឭកមួយដល់ក្រុមអ្នកច្បាប់ផងដែរថា យើងចាំបាច់ត្រូវហាមឃាត់ដាច់ខាត ចំពោះការធ្វើតេស្តពិសោធលើសត្វ ព្រោះគ្មានសត្វណាមួយត្រូវរងទុក្ខ និងស្លាប់ដោយសារតែសម្រស់នោះទេ»។
លោក Troy Seidle អនុប្រធានផ្នែកស្រាវជ្រាវ និងជាតិពុលវិទ្យាថ្លែងថា ការកែប្រែច្បាប់ គឺជារឿងចាំបាច់មួយ ហើយក្រុមហ៊ុនឧស្សាហកម្មនាំមុខជាច្រើន ដូចជា Lush, Unilever, P&G, L''ale'' និង Avon បាននិងកំពុងធ្វើការជាមួយស្ថាប័នរបស់លោកដើម្បីធានាឱ្យមានការហាមឃាត់ប្រកបដោយអត្ថន័យលើការធ្វើតេស្តពិសោធលើសត្វនៅក្នុងទីផ្សារថែរក្សាសម្ផស្សជាច្រើនដែលមានឥទ្ធិពលបំផុតនៅលើពិភពលោក។ ស្ថាប័នលោកបានជ្រើសរើសសុភាទន្សាយ Ralph ជាតួអង្គអ្នកនាំពាក្យដើម្បីជួយជំរុញឱ្យច្បាប់ទាំងនេះឈានទៅដល់គោលដៅចុងក្រោយ។
លោក Troy Seidle បន្តថា យុទ្ធនាការនេះផ្តោតលើប្រទេសអាទិភាពចំនួន ១៦ ដែលក្នុងនោះរួមមានប្រទេសប្រេស៊ីល កាណាដា ស៊ីលី ម៉ិកស៊ិក អាហ្វ្រិកខាងត្បូង និងប្រទេសអាស៊ីអាគ្នេយ៍ចំនួន ១០ ដូចជាប្រទេសប្រ៊ុយណេ កម្ពុជា ឥណ្ឌូនេស៊ី និងបណ្តាអង្គការដៃគូ គឺអង្គការ Humane Society សហរដ្ឋអាមេរិក និងអង្គការច្បាប់ Humane Society Legislative Society។ អង្គការផ្តោតទៅលើច្បាប់នៅសហរដ្ឋអាមេរិក។
លោកថ្លែងថា៖ «យើងក៏កំពុងតែប្រកាន់ជំហរឱ្យមានការហាមឃាត់នៅនឹងកន្លែងផងដែរ ដូចជា នៅអឺរ៉ុបជាដើមដែលអាជ្ញាធរកំពុងព្យាយាមទាញយកប្រយោជន៍ពីចន្លោះប្រហោងផ្នែកច្បាប់ ដោយទាមទារឱ្យមានការធ្វើតេស្តលើសត្វថ្មីដើម្បីផលិតផលគ្រឿងផ្សំរបស់ផលិតផលគ្រឿងសម្អាងស្របតាមច្បាប់ស្តីពីគីមីវិទ្យា»។
យុទ្ធនាការ #SaveRalph នឹងក្លាយជាពន្លឺមួយដែលឆ្លុះបញ្ចាំងអំពីប្រទេសទាំងអស់នេះ ដោយជំរុញឱ្យពួកគេឆ្ពោះទៅរកអនាគតមួយដែលមិនពាក់ព័ន្ធទៅលើការធ្វើតេស្តពិសោធគ្រឿងសម្អាងលើសត្វតាមការរំពឹងទុករបស់សាធារណជន និងអ្នកប្រើប្រាស់។
លោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វថ្លែងថា សម្រាប់ប្រទេសកម្ពុជា គឺគ្មានករណីយកសត្វទន្សាយធ្វើតេស្តគ្រឿងសម្អាងនោះទេ ខណៈកម្ពុជាក៏មិនមានកសិដ្ឋានចិញ្ចឹមសត្វទន្សាយដែរ។
លោកស្នើឱ្យអង្គការ Humane Society International បង្ហាញទីតាំង និងផលប៉ះពាល់ និងសហការជាមួយមន្ត្រីជំនាញរបស់ក្រសួងកសិកម្ម រុក្ខាប្រមាញ់ និងនេសាទក្នុងករណីបើមាន ដើម្បីសម្របសម្រួល និងដោះស្រាយ។
លោកថ្លែងថា៖ «ខ្ញុំគិតថា កម្ពុជាគ្មានករណីនេះទេ ហើយបើអង្គការនេះរកឃើញ សូមប្រាប់ខ្ញុំវិញ។ បើទោះបីមានក៏ត្រូវការវិភាគពីជំនាញដែរ»៕