.jpg)
ពិធីសម្ពោធជាផ្លូវការគម្រោង ពង្រឹងសិទ្ធិអំណាចស្រ្តីវ័យក្មេងក្នុងការសម្រេចចិត្ត និងការជំរុញអោយការផ្ដល់សេវាសាធារណៈកាន់តែមានគណនេយ្យភាព កាលពីពេលថ្មីៗនេះ។ រូបថត សហការី
ភ្នំពេញៈ អង្គការតម្លាភាពកម្ពុជា (TI Cambodia) និងអង្គការអាក់សិនអេតកម្ពុជា ( ActionAid Cambodia) រួមសហការជាមួយក្រសួងមហាផ្ទៃប្រកាសផ្សព្វផ្សាយពីគម្រោងផ្តល់សិទ្ធិអំណាចដល់ស្ត្រីវ័យក្មេងរយៈពេល ៣ ឆ្នាំ ដើម្បីធ្វើការសម្រេចចិត្តក្នុងការជំរុញឲ្យមានការផ្តល់សេវាសាធារណៈកាន់តែប្រសើរ។
គម្រោងស្តីពី «ការពង្រឹងសិទ្ធិអំណាចស្ត្រីវ័យក្មេងក្នុងការសម្រេចចិត្ត និងជំរុញឱ្យការផ្តល់សេវាសាធារណៈកាន់តែមានគណនេយ្យភាព» ត្រូវបានប្រកាសផ្សព្វផ្សាយកាលពីថ្ងៃទី ៧ ខែកុម្ភៈនៅទីស្តីការក្រសួងមហាផ្ទៃដោយមានមន្ត្រីរដ្ឋាភិបាល មន្ត្រីថ្នាក់ក្រោមជាតិ និងអង្គការសង្គមស៊ីវិលចូលរួម។
អង្គការតម្លាភាពកម្ពុជាបានឲ្យដឹងថា គម្រោងរយៈពេល ៣ ឆ្នាំនេះគឺទទួលបានជំនួយហិរញ្ញវត្ថុពីសហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍន៍អន្តរជាតិនៃប្រទេសស៊ុយអែតចាប់ពីខែមករាឆ្នាំ ២០២០ ដល់ខែ ធ្នូ ឆ្នាំ ២០២២ ដែលមានគោលបំណង ដើម្បីកសាងសមត្ថភាពយុវជន និងអ្នកផ្តល់សេវាសាធារណៈ។
លោក អ៊ឹម នរិន្ទ ប្រធានកម្មវិធីនៃអង្គការតម្លាភាពថ្លែងថា គម្រោងនេះក៏នឹងផ្តល់ឲ្យយុវជនវ័យក្មេង ជាពិសេសស្ត្រីទទួលបាននូវយន្តការដើម្បីផ្លាស់ប្តូរទស្សនៈ និងលើកឡើងពីតម្រូវការរបស់ខ្លួនក៏ដូចជាស្វែងរកដំណោះស្រាយនានា ដើម្បីពង្រឹងការផ្តល់សេវាសាធារណៈឱ្យកាន់តែមានគណនេយ្យភាព និងឆ្លើយតបតាមតម្រូវការរបស់ប្រជាពលរដ្ឋ។
លោកបន្ថែមថា៖ «គម្រោងថ្មីនេះគឺជាការពង្រីកវិសាលភាព និងបន្តការអនុវត្តគម្រោងសាលាអភិបាលកិច្ច ដំណាក់កាលទី ១ (ឆ្នាំ ២០១៦-២០១៩) ដែលអង្គការតម្លាភាព និងក្រសួងមហាផ្ទៃបានអនុវត្តរួមគ្នា ដើម្បីកសាង និងពង្រឹងសមត្ថភាពមន្ត្រីសាធារណៈនៅថ្នាក់ជាតិ និងអ្នកផ្តល់សេវាសាធារណៈនៅថ្នាក់ក្រោមជាតិ អំពីអភិបាលកិច្ចល្អដើម្បីលើកកម្ពស់ការផ្តល់សេវាសាធារណៈប្រកបដោយតម្លាភាព និងគណនេយ្យភាពនៅថ្នាក់ក្រោមជាតិ»។
លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានគណៈគ្រប់គ្រងគម្រោងសាលាអភិបាលកិច្ចថ្លែងថា គម្រោងនឹងចូលរួមចំណែកជាមួយរដ្ឋាភិបាលកម្ពុជាក្នុងដំណើរការកែទម្រង់ស៊ីជម្រៅ និងជាការចូលរួមចំណែកយ៉ាងសកម្មនៅក្នុងដំណើរការនៃការអនុវត្តកម្មវិធីគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា និងការបន្តពង្រឹងការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
លោកបញ្ជាក់ថា៖ «យើងជួបជុំគ្នាដើម្បីប្រកាសជាផ្លូវការដាក់ឲ្យអនុវត្តគម្រោង ពង្រឹងសិទ្ធិអំណាចស្ត្រីវ័យក្មេងក្នុងការសម្រេចចិត្ត និងការជំរុញឲ្យការផ្តល់សេវាសាធាណៈកាន់តែមានគណនេយ្យភាពក្នុងក្របខ័ណ្ឌនៃគម្រោងសាលាអភិបាលកិច្ច»។
តាមរយៈការអនុវត្តនេះលោក ច័ន្ទ្រផល សង្ឃឹមថា៖ «គ្រប់ភាគីពាក់ព័ន្ធទាំងនៅថ្នាក់ជាតិ និងនៅថ្នាក់ក្រោមជាតិ និងដៃគូអភិវឌ្ឍន៍ សង្គមស៊ីវិលនឹងបន្តកិច្ចសហការក្នុងស្មារតីនៃការទទួលខុសត្រូវ និងមានការទុកចិត្តគ្នាដ៏ស្មោះត្រង់ជំរុញដំណើរការកំណែទម្រង់ឲ្យរឹតតែមានប្រសិទ្ធភាពខ្ពស់ ដែលជាបំណងប្រាថ្នារបស់ប្រជាពលរដ្ឋកម្ពុជា»។
បើតាមអង្គការតម្លាភាពគម្រោងស្តីពីការពង្រឹងសិទ្ធិអំណាចស្ត្រីវ័យក្មេង ក្នុងការសម្រេចចិត្ត និងការជំរុញឱ្យមានការផ្តល់សេវាសាធារណៈកាន់តែមានគណនេយ្យភាពនឹងផ្តល់ដល់ក្រុមគោលដៅមួយចំនួននៅខណ្ឌចំការមន រាជធានីភ្នំពេញ ក្រុងសៀមរាប ក្រុងស្ទឹងសែន ស្រុកក្រគរ និងក្រុងពោធិ៍សាត់ ស្រុកឈូក និងក្រុងកំពតរួមទាំងស្រុកមួយចំនួនស្ថិតក្នុងខេត្តឧត្តរមានជ័យ បាត់ដំបង ខេត្តព្រៃវែង និងកោះកុងជាដើម៕
