ភ្នំពេញៈ អង្គការ ៣៦ ចេញសេចក្តីថ្លែងការណ៍រួមមួយ ស្នើឲ្យរដ្ឋាភិបាលទម្លាក់ចោលសេចក្តីព្រាងច្បាប់ស្តីពីសណ្តាប់ធ្នាប់សាធារណៈក្នុងនោះក៏ផ្តោតលើស្រី្តស្លៀកខ្លី ដែលក្រសួងមហាផ្ទៃកំពុងរៀបចំតាក់តែងដោយចាត់ទុកថា ច្បាប់នេះដាក់ទណ្ឌកម្មស្ត្រីចំពោះការស្លៀកពាក់ និងអាកប្បកិរិយា ដែលជាទម្រង់នៃការរើសអើងមកលើស្ត្រីនៅកម្ពុជា។
សេចក្តីថ្លែងការណ៍ចេញផ្សាយកាលពីចុងសប្តាហ៍មុនបានឲ្យដឹងថា អង្គការ និងសមាគមដែលកំពុងបំពេញបេសកកម្មដើម្បីលើកកម្ពស់សិទ្ធិស្ត្រី និងសមភាពយេនឌ័រមានក្តីកង្វល់យ៉ាងខ្លាំងចំពោះមាត្រាជាច្រើនដែលចែងក្នុងសេចក្តីព្រាងច្បាប់នេះ។ ក្រុមអង្គការបន្តថា សេចក្តីព្រាងច្បាប់នេះមានលក្ខណៈរំលោភបំពានសិទ្ធិស្ត្រីយ៉ាងខ្លាំង ហើយមានលក្ខណៈស្តីបន្ទោស រឹតត្បិតសិទ្ធិ និងអាកប្បកិរិយាស្ត្រីទៀតផង។
សេចក្តីថ្លែងការណ៍បញ្ជាក់ថា៖ «យើងខ្ញុំសូមអំពាវនាវដល់រាជរដ្ឋាភិបាលកម្ពុជាឲ្យទម្លាក់ចោលនូវសេចក្តីព្រាងច្បាប់ស្តីពីសណ្តាប់ធ្នាប់សាធារណៈនេះទាំងស្រុង និង ជាបន្ទាន់។ ផ្ទុយទៅវិញ រាជរដ្ឋាភិបាលគួរតែចាត់ទុកជាអាទិភាពបន្ទាន់ដើម្បីដោះស្រាយរាល់ទម្រង់នៃការរើសអើងយេនឌ័ររួមមានអំពើហិង្សាផ្អែកលើយេនឌ័រ និងការរើសអើងក្នុងប្រព័ន្ធអប់រំ។ ការចូលរួមផ្នែកសេដ្ឋកិច្ច សង្គម និងនយោបាយតាមរយៈកំណែទម្រង់ច្បាប់ និងការផ្លាស់ប្តូរគោលនយោបាយ»។
លោកស្រី អេង ចាន់ឌី អ្នកសម្របសម្រួលបណ្តាញយេនឌ័រ និងអភិវឌ្ឍន៍ លើកឡើងថា រាជរដ្ឋាភិបាលនឹងមិនអាចបំពេញនូវការប្តេជ្ញាចិត្តរបស់ខ្លួនក្នុងការសម្រេចឲ្យបានសមភាពយេនឌ័រនោះទេ ខណៈរដ្ឋាភិបាលនៅតែដាក់ទោសទណ្ឌមកលើស្ត្រី ព្រោះតែស្ត្រីមិនប្រតិបត្តិតាមក្រមសីលធម៌ និងស្តង់ដានៃការស្លៀកពាក់ដែលមានចរិតបែបអភិរក្សនិយម។
លោក អ៊ុក គឹមលេខ រដ្ឋលេខាធិការក្រសួងមហាផ្ទៃប្រាប់ភ្នំពេញប៉ុស្តិ៍ពីម្សិលមិញថា ច្បាប់នេះនៅតែត្រូវការមតិយោបល់ពីភាគីជាច្រើនទៀត ដើម្បីកែប្រែខ្លឹមសារឲ្យបានស្របនឹងបរិបទ និងភាពត្រឹមត្រូវនៃច្បាប់ ប៉ុន្តែបើស្នើឲ្យទម្លាក់ចោលទាំងស្រុងនោះគឺមិនអាចនោះទេ។
លោកថ្លែងថា៖ «ខ្ញុំគិតថាប្រទេសយើង គួរតែមានការកសាងច្បាប់ ដើម្បីនឹងគោរពទាំងអស់គ្នា ហើយច្បាប់មិនទាន់នឹងចេញផង គ្រាន់តែជាសេចក្តីព្រាង ព្រាងលិច ព្រាងកើតមក ទម្លាក់ចោលលិច មកទម្លាក់ចោលកើត។ ឥឡូវគួរតែគាត់ [សង្គមស៊ីវិល] ចូលរួមថា ច្បាប់នេះគួរធ្វើអីចេះ គួរធ្វើអីចុះ ដើម្បីយើងទាំងអស់គ្នា។ មិនទាន់បានឃើញអ្វីផង ទារទម្លាក់ៗ ខ្ញុំមិនយល់»៕
វីដេអូ៖