.jpg)
លោក គល់ បញ្ញា ប្រធានអង្គការ Anfrel ដែលជាអង្គការឃ្លាំមើលការបោះឆ្នោត។ ហេង ជីវ័ន
ភ្នំពេញៈ អង្គការអាន់ហ្វ្រែល (Anfrel) ដែលជាអង្គការឃ្លាំមើលការបោះឆ្នោតថ្នាក់តំបន់ កាលពីថ្ងៃអង្គារ បានច្រានចោលការចោទប្រកាន់របស់ប្រព័ន្ធផ្សព្វផ្សាយក្នុងស្រុកចំនួនពីរ ដែលថា អង្គការនេះ កំពុងរៀបចំផែនការលូកលាន់ក្នុងកិច្ចការបោះឆ្នោត នាខែកក្កដាខាងមុខ។
អង្គការឃ្លាំមើលការបោះឆ្នោតនេះ កំពុងប្រតិកម្មទៅនឹងលិខិតមួយ ដែលសរសេរទៅការីនិពន្ធដែលចុះផ្សាយនៅលើសារព័ត៌មាន Fresh News និង Swift News ដែលសរសេរដោយ «ពល ពានរិន្ទ» ដែលអះអាងថា លោក គល់ បញ្ញា ប្រធានអង្គការ Anfrel កំពុងព្យាយាមបង្ទុចបង្អាក់ការបោះឆ្នោតនាពេលខាងមុខ ខណៈការជ្រើសរើសលោកទៅក្នុងក្រុមប្រឹក្សាភិបាលនៃអង្គការ Anfrel គឺជាការផ្តល់រង្វាន់ ចំពោះការជ្រៀតជ្រែកនៅក្នុងដំណើរការបោះឆ្នោត កាលពីពេលមុនៗ របស់លោក។
លិខិតនេះ បានចុះផ្សាយ ជាការប្រតិកម្មទៅនឹងបទសម្ភាសមួយ នៅវិទ្យុអាស៊ីសេរី ដែលលោក បញ្ញា កាលពីចុងសប្តាហ៍មុន បានចោទសួរ អំពីភាពស្របច្បាប់នៃការបោះឆ្នោតនាខែកក្កដាខាងមុខ។
អង្គការ Anfrel បានថ្លែងថា អត្ថបទនេះ គឺជាការលើកឡើងខុស អំពីអង្គការ ហើយថា ការអះអាងដែលថា អង្គការកំពុងចូលរួមនៅក្នុងសម្ព័ន្ធតាមដានការបោះឆ្នោតហៅ «បន្ទប់ស្ថានការណ៍» គឺមិនត្រឹមត្រូវ។
សេចក្តីថ្លែងការណ៍របស់អង្គការបានលើកឡើងថា៖ «អង្គការ ANFREL មិនដឹងអំពីការកើតមាន ឬពាក់ព័ន្ធនៅក្នុងសកម្មភាពណាមួយ ពាក់ព័ន្ធនឹងបន្ទប់ស្ថានការណ៍ ទេ»។ «តាងនាមឲ្យអង្គការផ្ទាល់ ក្រុមប្រឹក្សាភិបាលរបស់អង្គការ ឬអង្គការសមាជិកណាមួយរបស់ខ្លួន អង្គការ ANFREL សូមបដិសេធថា អង្គការមិនបានពាក់ព័ន្ធនៅក្នុងផែនការបន្ទុចបង្អាក់ ដំណើរការបោះឆ្នោត ក្នុងប្រទេសកម្ពុជាឡើយ»។
«បន្ទប់ស្ថានការណ៍»ជាក្រុមអង្គការក្រៅរដ្ឋាភិបាលប្រមាណ ៣០ អង្គការ ដែលដឹកនាំដោយអង្គការឃ្លាំមើលការបោះឆ្នោត ខុមហ្វ្រែល ដើម្បីតាមដានការបោះឆ្នោត ក្នុងប្រទេសកម្ពុជា។ វាត្រូវបានរិះគន់ដោយរដ្ឋាភិបាលថា មានភាពមិនប្រក្រតីមួយចំនួន។
អង្គការ Anfrel បានថ្លែងថា អង្គការស្វាគមន៍ សំណើសុំសម្ភាសណាមួយ ពីសារព័ត៌មានទាំងពីរខាងលើ ដែលជាសារព័ត៌មានតាមអនឡាញ ខណៈអង្គការមិនត្រូវបានទាក់ទងសុំអត្ថាធិប្បាយ ពីមុនពេលការចុះផ្សាយ៕ PS
