តាកែវ: អង្គការជីវិតសត្វស្លាបអន្តរជាតិ (Birdlife) ប្រចាំកម្ពុជាបានសាកល្បងគម្រោងប្រវាស់ពូជក្របីញីឱ្យកសិករចិញ្ចឹម ដើម្បីបញ្ឈប់មុខរបរបរបាញ់សត្វក្នុងតំបន់ការពារទេសភាពបឹងព្រែកល្ពៅ ក្នុងស្រុកកោះអណ្ដែត និងស្រុកបុរីជលសារ ខេត្តតាកែវ ជាមួយនឹងការអំពាវនាវឱ្យមានការចូលរួមថែរក្សាសត្វស្លាបក្នុងតំបន់នេះឱ្យសម្បូរបែបឡើងវិញ។
លោក ប៊ូ វរសក្ស នាយកកម្មវិធីនៃអង្គការ (Birdlife) ប្រចាំកម្ពុជាបានថ្លែងពីម្សិលមិញថា នេះជាការសាកល្បងក្នុងជំហានទី១ ដោយចាប់ផ្ដើមប្រវាស់ពូជក្របីញី ៥ ក្បាល ជូនកសិករ ១ គ្រួសារ នៅតំបន់ការពារទេសភាពបឹងព្រែកល្ពៅ ក្នុងទិសដៅផ្សារភ្ជាប់ការលើកកម្ពស់ជីវភាពសហគមន៍ជាមួយនឹងការអភិរក្សសត្វក្រៀលនៅក្នុងតំបន់នេះ។
លោកបន្តថា តាមរយៈការប្រវាស់ពូជក្របីជូនកសិករនេះនឹងជួយកាត់បន្ថយការទន្ទ្រាន ការដាក់សម្ពាធទៅលើធនធានដ្ឋាន។ គម្រោងនេះក៏បានធ្វើឱ្យពួកគាត់ទទួលបានប្រាក់ចំណូលបន្ថែមសម្រាប់ទ្រទ្រង់ជីវភាពគ្រួសារ ពិសេសសត្វក្របីក៏មានតួនាទីសំខាន់ក្នុងការទន្ទ្រានលើវាលស្មៅធ្វើឱ្យរុក្ខជាតិនៅតំបន់វាលស្មៅមិនក្រាស់ពេក ហើយក្លាយជាជម្រកដ៏ល្អសម្រាប់សត្វក្រៀលរស់នៅ។
លោក ប៊ូ វរសក្ស បញ្ជាក់ថា៖ «ប្រជាកសិករដែលយល់ព្រមអនុវត្តគម្រោងសាកល្បងនេះនឹងទទួលបានក្របីមេចំនួន ៥ ក្បាល សម្រាប់រយៈពេល ៣ ឆ្នាំ ហើយពួកគាត់អាចទទួលបានផល ៦០ ភាគរយពីគម្រោង ហើយ ៤០ ភាគរយទៀតសម្រាប់អង្គការយកទៅពង្រីកគម្រោងថ្មីៗបន្ថែមទៀត»។
លោកថា បើទោះជាគម្រោងនេះមិនទាន់ផ្គត់ផ្គង់សត្វក្របីឱ្យបានច្រើនគ្រួសារក៏ដោយ ប៉ុន្ដែកំពុងសាកល្បងនៅឡើយ។ ប្រសិនបើគម្រោងនេះបានជោគជ័យ អង្គការលោកនឹងពង្រីកគម្រោងឱ្យកាន់តែទូលំទូលាយ ហើយប្រសិនបើមានសប្បុរសជន ឬម្ចាស់ជំនួយនានាចាប់អារម្មណ៍អាចទាក់ទងទៅអង្គការដើម្បីសហការគ្នា។
លោក អ៊ីម សុខាន់ អាយុ ៤៦ ឆ្នាំ រស់នៅភូមិដីលើកឃុំជ័យជោគ ស្រុកបុរីជលសារ ខេត្តតាកែវបានឱ្យដឹងពីម្សិលមិញថា គ្រួសារលោកបានចូលរួមជាមួយគម្រោងនេះ ដោយទទួលប្រវាស់ក្របីញីៗចំនួន ៥ ក្បាល ដើម្បីចិញ្ចឹមជាលក្ខណៈគ្រួសារ។ លោកសប្បាយរីករាយចំពោះគម្រោងនេះដែលអាចជួយផ្គត់ផ្គង់ជីវភាពគ្រួសារឱ្យកាន់តែប្រសើរថែមទៀត។
លោកបន្ដថា ប្រសិនបើទទួលបានផលក្នុងរយៈពេល ៣ ឆ្នាំភាគលាភនឹងត្រូវបែងចែកជូនលោក ៦០ ភាគរយ ហើយ ៤០ ភាគរយទៀត អង្គការ Birdlife ត្រូវយកទៅពង្រីកគម្រោងបន្ថែមទៀត។ យ៉ាងណាក្ដីលោកក៏ចង់ឱ្យអង្គការបន្ថែមគម្រោងនេះដល់ពលរដ្ឋក្នុងសហគមន៍ផ្សេងៗទៀតដើម្បីជួយផ្គត់ផ្គង់ជីវភាពគ្រួសារនៅក្នុងតំបន់ទេសភាពនេះ។
លោកបញ្ជាក់ថា៖ «កន្លងមក ខ្ញុំមិនដែលបានធ្វើការងារអ្វីជាមួយស្ថាប័នណាទេ គឺធ្វើស្រែចម្ការធម្មតា ហើយពេលចប់រដូវធ្វើស្រែ ក៏ដើរបរបាញ់សត្វ តែឥឡូវនេះខ្ញុំឈប់បាញ់សត្វហើយ ហើយខ្ញុំងាកមកជួយអភិរក្សសត្វក្នុងសហគមន៍ខ្ញុំវិញ ព្រោះមានការណែនាំពីអង្គការ ពីអាជ្ញាធរជាដើម អ៊ីចឹងធ្វើឱ្យខ្ញុំឈប់បរបាញ់សត្វ។ ជារៀងរាល់សប្ដាហ៍ ខ្ញុំតែងតែចូលរួមដើរល្បាតជាមួយអង្គការ និងសហគមន៍ ដើម្បីថែរក្សាសត្វស្លាបក្នុងតំបន់យើងនេះ ហើយខ្ញុំសូមអំពាវនាវឱ្យពលរដ្ឋឈប់បាញ់សត្វព្រៃងាកមកជួយអភិរក្សទាំងអស់គ្នាវិញ»៕