ភ្នំពេញៈ អង្គការ HWPL បានលើកឡើងថា ជំងឺកូវីដ ១៩ បានបង្កឲ្យមានការរើសអើង និងការស្អប់ខ្ពើមដែលគ្មានមូលដ្ឋាន ខណៈជំងឺរាតត្បាតនេះបានឆ្លងផុតពីការទទួលខុសត្រូវរបស់ក្រុមសាសនាភាគតិចនៅប្រទេសជាច្រើនដែលងាយរងគ្រោះក្នុងនោះក៏មានកម្ពុជាផងដែរតែកម្ពុជាបដិសេធ។
សេចក្តីប្រកាសព័ត៌មានរបស់អង្គការ Heavenly Culture, World Peace, Restoration of Light (HWPL), ដែលបានផ្ញើមកកាន់ភ្នំពេញប៉ុស្តិ៍កាលពីចុងសប្តាហ៍មុនឲ្យដឹងថា នៅប្រទេសកម្ពុជា និងប្រទេសឥណ្ឌា គឺមិនអាចចៀសផុតហើយវានៅតែបន្តមានការស្អប់ខ្ពើមទៅកាន់អ្នកកាន់សាសនាអ៊ិស្លាមដែលជាសាសនាជនជាតិភាគតិច។
អង្គការ HWPL ដែលជាអង្គការសន្តិភាពអន្តរជាតិត្រូវបានបង្កើតឡើងដើម្បីសន្តិភាព និងបញ្ឈប់សង្គ្រាមមួយនេះបានលើកឡើងបន្តថា ជនជាតិខ្មែរអ៊ិស្លាមដែលបានវិលត្រឡប់មកប្រទេសកំណើតវិញ បន្ទាប់ពីបានចូលរួមព្រឹត្តិការណ៍សាសនានៅប្រទេសម៉ាឡេស៊ីកាលពីខែមីនា បានក្លាយជាគោលដៅនៃការប្រុងប្រយ័ត្នក្នុងចំណោមពលរដ្ឋ ដែលបានឆ្លងជំងឺកូវីដ ១៩។ ហេតុការណ៍ដូចគ្នានេះក៏ត្រូវបានគេរាយការណ៍ថា បានកើតឡើងនៅសាសនាមួយចំនួននៅប្រទេស ឥណ្ឌា និងប្រទេសកូរ៉េខាងត្បូងផងដែរ។
HWPL បានសង្កត់ធ្ងន់ថា៖ «មានហេតុការណ៍កើតឡើងជាក់ស្តែង នៅពេលដែលគេបានដឹងថា មនុស្សដែលកំពុងសន្ទនាជាមួយគេជាអ្នកមូស្លីម នោះគេក៏យកម៉ាស់ពាក់យ៉ាងប្រញាប់ ឬមិនលក់ផលិតផលឲ្យព្រមទាំងស្នើសុំឲ្យចាកចេញពីហាងដោយសារមានការព្រួយបារម្ភអំពីការឆ្លងជំងឺកូវីដ ១៩ »។
តាម HWPL យោងតាមស្ថាប័នយុត្តិធម៌ និងសិទ្ធិមនុស្សខាងអង្គការមិនមែនរដ្ឋាភិបាលរួមទាំងសហគមន៍សាសនានៅជុំវិញពិភពលោកបានដាក់បញ្ជីនៅឆ្នាំ ២០២០ នេះដោយបានបង្ហាញពីករណីរំលោភសិទ្ធិមនុស្ស និងការរើសអើងយ៉ាងធ្ងន់ធ្ងរជាង ៦ ០០០ ករណីដែលបានកើតឡើងតាមរូបភាព សម្លុត និងការបណ្តេញចេញពីកន្លែងធ្វើការ ចំពោះសមាជិកព្រះវិហារស៊ីនឆន់ជី។
កញ្ញា Yujin អ្នកសម្របសម្រួលនៃអង្គការ HWPL (coordinator of public relation of HWPL ) បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ការរាតត្បាតនៃជំងឺកូវីដ១៩ដែលជាវិបត្តិនៅក្នុងពិភពលោកប្រសិនបើមានការរើសអើង និងការស្អប់ខ្ពើមគ្មានមូលដ្ឋាន វាអាចជាការរំលោភសិទ្ធិមនុស្សធ្ងន់ធ្ងរ។ កញ្ញា បន្តថា ក្នុងចំណោមជនរងគ្រោះនៃការរើសអើង និងការស្អប់ខ្ពើមដែលគ្មានមូលដ្ឋាននៃជំនឿសាសនា ពិសេសសមាជិកនៃស៊ីនឆន់ជីក៏បានទទួលរងនូវការផ្លាស់ប្តូរសាសនាដោយបង្ខំទៀតផង។
កញ្ញាបញ្ជាក់ថា៖ «មនុស្សដែលបានឆ្លងនូវជំងឺនេះ សូម្បីតែពួកគេបានជាសះស្បើយទាំងស្រុងក៏ដោយ ក៏មនុស្សទូទៅចាត់ទុកពួកគេថា "អ្នកឆ្លងនៃជំងឺកូវីដ ១៩" ដែរ។ ដូច្នេះពួកគេទទួលរងនូវការឈឺចាប់ទាំងខាងផ្លូវចិត្ត និងរាងកាយ។ មានករណីស្លាប់ ដោយសារតែអំពើហិង្សា និងការរំលោភសិទ្ធិមនុស្សជាច្រើនបានកើតឡើង ដោយសារតែបញ្ហានេះដែលយើងគួរតែប្រយុទ្ធប្រឆាំងនឹងវីរុសកូរ៉ូណាតែ ១ មុខតែប៉ុណ្ណោះ ដូច្នេះយើងមិនគួរឲ្យមានការរើសអើងដោយគ្មានមូលដ្ឋាន និងការស្អប់ខ្ពើមនេះកើតមានបន្តទៀតនោះទេ»។
លោក សេង សុមុនី អ្នកនាំពាក្យក្រសួងធម្មការ និងសាសនាបានប្រាប់ភ្នំពេញប៉ុស្តិ៍កាលពីម្សិលមិញថា ការរើសអើង និងការស្អប់ខ្ពើមដែលគ្មានមូលដ្ឋាន ដែលបណ្តាលមកពីជំងឺកូវីដ ១៩ គឺមិនមាននៅកម្ពុជានោះទេ។
លោកលើកឡើងថា នៅប្រទេសដទៃអាចនឹងមានករណីបែបនេះកើតឡើង តែចំពោះកម្ពុជាគឺមិនមាននោះទេ។ លោកអះអាងថា៖ «កម្ពុជារបស់យើងគឺមិនមានការរើសអើងនោះទេ ករណីដែលបានលើកឡើងបញ្ហាខ្មែរមូស្លីមនេះ។ នេះមិនចាត់ទុកថា ជាការរើសអើងនោះទេ ព្រោះអ្នកឆ្លងទាំងអស់គឺសុទ្ធតែជាខ្មែរ។ ប្រទេសដទៃ គេមានការគ្រប់គ្រងបែបប្រទេសគេផ្សេង ហើយបើប្រទេសយើង គឺមិនមានផលប៉ះពាល់ទៅនឹងការរើសអើងសាសនាបែបនេះទេបាទ»។
ក្រៅពីអះអាងយ៉ាងដូច្នេះលោក សេង សុមុនី បានជំរុញឲ្យប្រជាពលរដ្ឋទាំងអស់មិនត្រូវមានការរើសអើង ឬស្អប់ខ្ពើមចំពោះអ្នកដែលកាន់សាសនានានានោះទេ ដោយងាកមកប្រតិបត្តិវិធានការការពារខ្លួនពីជំងឺកូវីដ ១៩ ទៅតាមគោលការណ៍របស់ក្រសួងសុខាភិបាលឲ្យបានត្រឹមត្រូវទាំងអស់គ្នា៕