ភ្នំពេញៈអង្គការអភិវឌ្ឍន៍អន្តរជាតិរួម (IDI) បានឲ្យដឹងកាលពីថ្ងៃពុធថា តុលាការថៃបានទទួលយកពាក្យបណ្តឹងដែលប្តឹងដោយជនរងគ្រោះដីធ្លីខ្មែរ នៅខេត្តឧត្តរមានជ័យ ប្រឆាំងនឹងក្រុមហ៊ុនផលិតស្ករស Mitr Phol រួចហើយ ប៉ុន្តែតុលាការបានបង្គាប់ឱ្យភាគីទាំង២សម្រុះសម្រួលគ្នានៅថ្ងៃព្រហស្បតិ៍នេះមុនពេលសម្រេចចាត់ការតាមនីតិវិធីច្បាប់ ។
អង្គការ IDI បានថ្លែងថា ក្រុមហ៊ុនបុត្រសម្ព័ន្ធរបស់ក្រុមហ៊ុន Mitr Phol ដែលរួមមានទាំងក្រុមហ៊ុន Angkor Sugar Company ផងដែរនោះបានបណ្តេញកសិករខ្មែរជាង ៧ ០០០ គ្រួសារចេញពីដីកសិកម្មរបស់ពួកគេចំនួន ៩ ៤៣០ ហិកតាចន្លោះពីឆ្នាំ ២០០៨ និង ២០០៩ ។
លោក David Pred នាយកប្រតិបត្តិរបស់អង្គការ IDI បាននិយាយថា ក្រុមហ៊ុនធំៗ ដូចជា ក្រុមហ៊ុន Nestle, Coca-Cola, Pepsi និងMars គឺជាអ្នកបញ្ជាទិញធំផុតនូវផលិតផលរបស់ក្រុមហ៊ុន Mitr Phol។
លោកបន្តថា៖ «កេរ្តិ៍ឈ្មោះរបស់ក្រុមហ៊ុនទាំងនោះក៏ទៅតាមហ្នឹងដែរ។
លោកបន្ថែមថា៖«ជនរងគ្រោះកម្ពុជា បានរង់ចាំយុត្តិធម៌អស់រយៈពេលពេលមួយទសវត្សរ៍មកហើយ ហើយប្រសិនបើក្រុមហ៊ុន Mitr Phol មិនធ្វើតាមរយៈការសម្របសម្រួលទាំងនេះទេនោះ ក្រុមហ៊ុនយីហោល្បីៗ ទាំងនោះគួរកាត់ផ្តាច់កិច្ចសន្យាផ្គត់ផ្គង់របស់ខ្លួនជាបន្ទាន់ ជាមួយក្រុមហ៊ុននេះ។ ការខកខានមិនបានដោះស្រាយអស់រយៈជាច្រើនឆ្នាំបែបនេះ វាបានធ្វើឱ្យការប្តេជ្ញាចិត្តរបស់ពួកគេចំពោះប្រភពនៃការទទួលខុសត្រូវគឺគ្មានន័យទាល់តែសោះ»។
លោក អៀង វុទ្ធី នាយកប្រតិបត្តិអង្គការសមធម៌កម្ពុជា (EC) ដែលជាអង្គការក្រៅរដ្ឋាភិបាលមួយផ្សេងទៀតដែលបានជួយក្នុងរឿងក្តីនេះបានបញ្ជាក់ថា លោកមិនមានព័ត៌មានអំពីការធ្វើបច្ចុប្បន្នភាពលើករណីនេះទេ ចំណែកលោក David Pred មិនអាចទាក់ទងដើម្បីសុំបំភ្លឺបន្ថែមបានទេនៅថ្ងៃទី ៦ កញ្ញានេះ។
អ្នកភូមិម្នាក់ឈ្មោះ ហួយ ឈួយ ដែលរងផលប៉ះពាល់រស់នៅភូមិអូរបាត់មាន់បានឱ្យដឹងនៅថ្ងៃទី៧កញ្ញានេះថា រូបគាត់និងអ្នកភូមិផ្សេងទៀតបានរង់ចាំសំណងពីក្រុមហ៊ុននេះអស់រយៈពេលជាច្រើនឆ្នាំមកហើយ។
លោកបានថ្លែងថា ក្រុមហ៊ុន Angkor Sugar Company បានចូលមកចាប់យកដីរបស់អ្នកភូមិដែលបានធ្វើឱ្យពួកគេបាត់បង់ដីធ្លីមិនអាចធ្វើស្រែចម្ការបាននៅលើដីរបស់ពួកគេបានទេ ហើយកូនចៅរបស់ពួកគេក៏បានបោះបង់ចោលការសិក្សាផងដែរ។
លោកបន្តថា៖«យើងដែលជាអ្នកភូមិគឺពួកយើងមិនសប្បាយចិត្តទេ ហើយបានទាមទារឱ្យក្រុមហ៊ុនសងសំណងដល់ពួកយើង។ យើងបានដាក់ពាក្យបណ្តឹងទាមទារសំណងដោយសាតែយើងមិនអាចធ្វើស្រែចម្ការលើដីរបស់យើងបាន។ពួកគេបានធ្វើឱ្យយើងធ្វើចំណាកស្រុក ហើយជំពាក់បំណុលធនាគារ»។
លោក ហួយ ឈួយ បន្ថែមថា នៅក្នុងភូមិអូរបាត់មាន់រដ្ឋាភិបាលបានយល់ព្រមប្រគល់ដីត្រឡប់មកវិញដល់គ្រួសារដែលរងផលប៉ះពាល់ចំនួន២១៤គ្រួសារនៅថ្ងៃទី៦ខែសីហាឆ្នាំ២០១៨ប៉ុន្តែ៩២គ្រួសារទៀតនៅពុំទាន់ទទួលបាននៅឡើយទេក្នុងដំណាក់ទីមួយនេះ។
លោក គឹម គាវិន ប្រធានមន្ទីររៀបចំដែនដីនគរូបនីយកម្មខេត្តឧត្តរមានជ័យបានឲ្យដឹងនៅថ្ងៃទី ៦ កញ្ញានេះថា អាជ្ញាធរបានដោះស្រាយដោយផ្តល់ដីឱ្យពួកគាត់វិញគឺមិនត្រឹមតែគ្រួសារដែលរងផលប៉ះពាល់ប៉ុណ្ណោះទេ ប៉ុន្តែថែមទាំងផ្តល់ឲ្យដល់គ្រួសារដែលមិនមានដីធ្លីថែមទៀតផង។
លោកថ្លែងថា៖«យើងបានយល់ស្របថាប្រសិនបើអ្នកភូមិមិនមានដីទេនោះអាជ្ញាធរខេត្តនឹងផ្តល់ដីសម្បទានសង្គមកិច្ចដែលមានទំហំ២ហិកតាសម្រាប់មួយគ្រួសារ។ តាមពិតទៅមានតែ ២១៤ គ្រួសារ ប៉ុណ្ណោះបានដាក់ពាក្យបណ្តឹង ប៉ុន្តែនៅពេលដែលយើង វាស់វែងដីធ្លីឲ្យពួកគាត់ ពេលនោះគ្រួសារផ្សេងទៀតបាននិយាយថាពួកគេក៏រងផលប៉ះពាល់ដែរ ដូច្នេះហើយតួលេខបានកើនឡើងដល់ចំនួន៤១២គ្រួសារ»៕ NS