.jpg)
ពិធីចុះហត្ថលេខារវាង NPA និង CMAC។ រូបថត សហការី
ភ្នំពេញ៖ អង្គការ Norwegian People Aid (NPA) ប្រចាំកម្ពុជាបានផ្តល់ជំនួយដែលមានទឹកប្រាក់ចំនួន ១ ៦០០ ០០០ ដុល្លារអាមេរិក ដល់អង្គការស៊ីម៉ាក់សម្រាប់អនុវត្តគម្រោងស្រាវជ្រាវ និងបោសសម្អាតគ្រាប់បែកចង្អោមនៅភាគខាងកើតនៃប្រទេសកម្ពុជា។
លោក ហេង រតនា អគ្គនាយកអង្គភាពស៊ីម៉ាក់ថ្លែងនៅថ្ងៃទី ៩ ខែមេសានេះថា គម្រោងនេះនឹងចាប់ផ្តើមអនុវត្តរយ:ពេលមួយឆ្នាំ គឺចាប់ផ្តើមពីថ្ងៃទី ១ ខែ មីនា ឆ្នាំ ២០២១ ដល់ថ្ងៃទី ២៨ ខែ កុម្ភៈ ឆ្នាំ ២០២២ នឹងត្រូវប្រើប្រាស់កម្លាំងជំនាញរបស់អង្គភាពស៊ីម៉ាក់ចំនួនប្រមាណជាង ២០០ នាក់។ កម្លាំងបែងចែកជាក្រុមធ្វើប្រតិបត្តិការនៅគោលដៅតាមខេត្តនានាភាគខាងកើតនៃប្រទេសកម្ពុជា។
លោក ហេង រតនា ថ្លែងថា គម្រោងនេះមានផែនការរំដោះចម្ការគ្រាប់បែកចង្កោមទំហំ ២៣ ៧៦០ ០០០ ម៉ែត្រក្រឡា ការស្រាវជ្រាវបច្ចេកទេសលើផ្ទៃដីប្រមាណ ៣៥ គីឡូម៉ែត្រក្រឡា និងឆ្លើយតបសំណើបន្ទាន់ៗពីសហគមន៍ឱ្យបាន ១ ៣២០ សំណើ។
បើតាមលោក ហេង រតនា ថវិកាគាំទ្រគម្រោងនេះ បានទទួលពីរដ្ឋាភិបាលសហរដ្ឋអាមេរិកផ្តល់ជូនអង្គការ NPA ដើម្បីសហការជាមួយអង្គភាពស៊ីម៉ាក់ក្នុងកិច្ចប្រតិបតិ្តការស្រាវជ្រាវ និងបោសសម្អាតតំបន់រងផលប៉ះពាល់ដោយគ្រាប់បែកចង្កោមសំណល់ពីសង្គ្រាមនៅកម្ពុជា។
គម្រោងកាលពីឆ្នាំ ២០២០-២០២១ កន្លងទៅនេះបានរំដោះតំបន់គ្រាប់បែកចង្កោមចំនួន ១១៣ ចម្ការ មានផ្ទៃដីសរុបទំហំ ៣១ ៧៥៤ ២៤៣ ម៉ែត្រក្រឡា រកឃើញ និងកម្ទេចចោលគ្រាប់បែកចង្កោម និងគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទបានចំនួន ១១ ១០៨ គ្រាប់ ផ្តល់ការអប់រំយល់ដឹងពីមីនដល់ប្រជាពលរដ្ឋចំនួន ១៣៤ ៩១៩ នាក់ ស្រាវជ្រាវព័ត៌មានបឋមបានចំនួន ២៩៩ ភូមិ រកឃើញចម្ការគ្រាប់បែកចង្កោមចំនួន ៤១៨ ចម្ការ ដែលមានផ្ទៃដីស្មើនឹង ៤៧ ៤៦៧ ៩០១ ម៉ែត្រក្រឡា៕
