.jpg)
ភ្នំពេញ: នាយកអង្គការវ័តធឺអេដ (WaterAid) ប្រចាំកម្ពុជាលោក ឆាត់ សុភាព ឱ្យដឹងថា ពលរដ្ឋកម្ពុជាប្រមាណ ៧២ ភាគរយទទួលបានសេវាទឹកស្អាត និងអនាម័យល្អ ខណៈប្រមាណ ២៨ ភាគរយទៀតនៅខ្វះខាតដែលទាមទារឱ្យមានការដោះស្រាយ ប៉ុន្ដែមន្ត្រីថាផែនការនេះនឹងផ្គត់ផ្គង់ឱ្យគ្រប់ ១០០% ត្រឹមឆ្នាំ ២០២៥។
ការលើកឡើងនេះធ្វើឡើងក្នុងកិច្ចសន្ទនាកាលពីម្សិលមិញដែលផ្តួចផ្តើមដោយអង្គការ WaterAid ជាមួយក្លិបអ្នកកាសែតកម្ពុជា និងមានការចូលរួមពីមន្ត្រីក្រសួងអភិវឌ្ឍន៍ជនបទ និងមន្ត្រីស្ថាប័នពាក់ព័ន្ធជាច្រើនរូប ។
លោក ឆាត់ សុភាព នាយកអង្គការ WaterAid បានថ្លែងក្នុងកម្មវិធីនោះថា ពលរដ្ឋកម្ពុជាប្រមាណ ៧២ ភាគរយទទួលបានសេវាទឹកស្អាត និងអនាម័យល្អ។ ប៉ុន្តែអ្នកជនបទប្រមាណ ២៨ ភាគរយទៀតនៅមិនទាន់មានទឹកស្អាតប្រើប្រាស់សមរម្យទេ ដែលទាមទារឱ្យភាគីរដ្ឋាភិបាល និងអង្គការសង្គមស៊ីវិល សហការគ្នារកដំណោះស្រាយឱ្យបានឆាប់។
លោកថា៖ «ការខ្វះខាតទឹកស្អាត និងអនាម័យគឺជាការរាំងស្ទះដល់ការអភិវឌ្ឍប្រទេសយើងជារួម ព្រោះបញ្ហាហ្នឹងទាក់ទងដល់វិស័យសុខភាពសាធារណៈរបស់ពលរដ្ឋយើង...ធនាគារពិភពលោកបានរកឃើញថា ពលរដ្ឋយើងខាតបង់ការចំណាយលើផ្នែកសុខភាពរាប់លានដុល្លារក្នុង ១ ឆ្នាំ»។
លោក សុភាព បន្ថែមថាដើម្បីសម្រេចគោលដៅតាមផែនការភាគីពាក់ព័ន្ធត្រូវបង្កើតយន្តការសម្រាប់បង្កលក្ខណៈក្នុងការផ្គត់ផ្គង់ទឹកស្អាត និងលើកកម្ពស់អនាម័យនៅតាមជនបទប្រកបដោយនិរន្តរភាព។
លោក ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទបានថ្លែងក្នុងកម្មវិធីថា ការងារលើកកម្ពស់អនាម័យជនបទ គឺជាកិច្ចការដែលមានលក្ខណៈអន្តរវិស័យដែលទាមទារឱ្យមានការចូលរួមពីគ្រប់ផ្នែកពាក់ព័ន្ធទាំងអស់ ជាពិសេសស្ថាប័នសារព័ត៌មានរួមគ្នាផ្សព្វផ្សាយឱ្យមានការយល់ដឹង និងផ្លាស់ប្ដូរឥរិយាបថគ្រប់ជាន់ថ្នាក់។
លោកបន្តថា ការចូលរួមផ្សព្វផ្សាយពិតជាសំខាន់ណាស់ ដើម្បីឱ្យស្ថានភាពអនាម័យនៅកម្ពុជាផ្លាស់ប្ដូរបានល្អប្រសើរ ខណៈរាជរដ្ឋាភិបាលបានកំណត់យកឆ្នាំ ២០២៥ ផ្គត់ផ្គង់ទឹកស្អាត និងអនាម័យដល់ពលរដ្ឋឱ្យបានគ្រប់គ្រាន់ ក្នុងបរិស្ថាន និងអនាម័យល្អ។
លោក ជ្រុន ថេរ៉ាវ៉ាត បញ្ជាក់ថា៖ «បច្ចុប្បន្ននេះយើងនៅមានបញ្ហាប្រឈមមួយចំនួនដូចជា ភាពក្រីក្ររបស់ពលរដ្ឋយើងគឺអ្នកក្រខ្លះគឺគាត់ខ្វះលទ្ធភាពដើម្បីតភ្ជាប់សេវាទឹកស្អាត ដូច្នេះយើងត្រូវផ្ដល់លទ្ធភាពបែបណាដើម្បីឱ្យគាត់អាចមានទឹកស្អាតប្រើប្រាស់ដែរ។ កត្តាមួយទៀត ពលរដ្ឋជនជាតិដើមភាគតិច ក៏មានបញ្ហាដែរ គឺពួកគាត់រស់នៅដាច់ឆ្ងាយពីគេ ដូច្នេះការតភ្ជាប់ប្រព័ន្ធទឹកស្អាត ក៏ពិបាកដែរ»។
លោក ប៉ែន បូណា ប្រធានក្លិបអ្នកកាសែតកម្ពុជាបានថ្លែងក្នុងកម្មវិធីនេះដោយជំរុញឱ្យស្ថាប័នព័ត៌មានកម្ពុជាចូលរួមផ្សព្វផ្សាយបញ្ហា និងវឌ្ឍនភាពនៃការទទួលបានទឹកស្អាតប្រើប្រាស់ដើម្បីបង្កើនការយល់ដឹង និងបន្ថយការចម្លងរោគ។
លោកថា៖ «យើងចង់លើកទឹកចិត្តពលរដ្ឋយើងឱ្យមានការផ្លាស់ប្តូរឥរិយាបថក្នុងការប្រើប្រាស់ទឹកស្អាត និងអនាម័យស្របតាមគោលនយោបាយអភិវឌ្ឍន៍ជាតិរបស់រាជរដ្ឋាភិបាលពីវិស័យទឹក និងអនាម័យ»។
អង្គការ WaterAid ប្រចាំកម្ពុជាធ្លាប់ចេញសេចក្ដីប្រកាសព័ត៌មានក្នុងអំឡុងពេលសន្និបាតសុខភាពពិភពលោកលើកទី ៧៣ កាលពីខែឧសភាឆ្នាំនេះថា ពលរដ្ឋក្រីក្របំផុតនៅជុំវិញពិភពលោកកំពុងត្រូវបានទុកឱ្យប្រឈមមុខនឹងជំងឺកូវីដ ១៩ តែឯង ដែលមិនមានសូម្បីតែការការពារមូលដ្ឋានបំផុតដូចជា ទឹកស្អាត និងសាប៊ូ ១ ដុំ។
សេចក្ដីប្រកាសនេះបន្តថា មូលដ្ឋានសុខាភិបាលអាចប្រឈមនឹងជំងឺឆ្លងនេះខ្លាំងជាងគេធ្វើឱ្យអាយុជីវិតគ្រូពេទ្យ គិលានុបដ្ឋាក និងឆ្មបជួបហានិភ័យពេលជួយសង្គ្រោះអ្នកជំងឺ។ ក្នុងនោះអង្គការនេះបានគាំទ្ររាជរដ្ឋាភិបាលកម្ពុជាចំពោះការផ្សព្វផ្សាយ និងលើកកម្ពស់ការអនុវត្តអនាម័យដៃ និងការការពារផ្សេងៗបានយ៉ាងឆាប់រហ័ស ប៉ុន្តែមានក្តីបារម្ភដែលពលរដ្ឋកម្ពុជាជាង ៣ លាននាក់កំពុងខ្វះទឹកស្អាត និងសាប៊ូនៅក្នុងផ្ទះរបស់ពួកគេ៕
