.jpg)
កន្លែងលាងសម្អាតដៃក្នុងមន្ទីរពេទ្រមួយនៅប្រទេសកម្ពុជា។ រូបថត អង្គការ WaterAid
ភ្នំពេញ: អង្គការ WaterAid ប្រចាំកម្ពុជាបានវាយតម្លៃថា ពលរដ្ឋកម្ពុជាប្រមាណជាង ៣ លាននាក់ កំពុងខ្វះកន្លែងលាងដៃត្រឹមត្រូវ ដែលអាចប្រឈមរោគឆ្លងផ្សេងៗ ខណៈមូលដ្ឋានសុខាភិបាល ១០ ភាគរយកំពុងខ្វះសេវាផ្គត់ផ្គង់ទឹក ហើយអង្គការនេះជំរុញឲ្យដាក់បញ្ហាអនាម័យទៅក្នុងផែនការជាតិ ប៉ុន្តែមន្ត្រីកម្ពុជាមានចម្ងល់ពីមូលដ្ឋាននៃការវាយតម្លៃនេះ។
តាមសេចក្ដីប្រកាសព័ត៌មានក្នុងអំឡុងពេលសន្និបាតសុខភាពពិភពលោកលើកទី ៧៣ ចុះថ្ងៃទី ១៨ ឧសភា ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ពលរដ្ឋក្រីក្របំផុតនៅជុំវិញពិភពលោកកំពុងត្រូវបានទុកឲ្យប្រឈមមុខនឹងជំងឺឆ្លងកូវីដ១៩តែឯងដែលមិនមានសូម្បីតែការការពារមូលដ្ឋានបំផុតដូចជាទឹកស្អាត និងសាប៊ូ ១ ដុំ។
ជាមួយគ្នានេះអង្គការអំពាវនាវឲ្យរដ្ឋមន្ត្រីក្រសួងសុខាភិបាល និងរដ្ឋមន្ត្រីក្នុងវិស័យពាក់ព័ន្ធដាក់អនាម័យជាផ្នែកមួយសំខាន់ក្នុងផែនការរបស់ប្រទេសរៀងៗខ្លួនក្នុងនោះមានកម្ពុជាផងដែរ ដើម្បីឆ្លើយតបទៅនឹងការឆ្លងមេរោគរាតត្បាតនានា ពិសេសជំងឺកូវីដ ១៩។
សេចក្ដីប្រកាសព័ត៌មានបន្តថា មូលដ្ឋានសុខាភិបាលអាចប្រឈមនឹងជំងឺឆ្លងនេះខ្លាំងជាងគេដែលធ្វើឲ្យអាយុជីវិតគ្រូពេទ្យ គិលានុបដ្ឋាក និងឆ្មបជួបហានិភ័យ នៅពេលជួយសង្គ្រោះអាយុជីវិតអ្នកជំងឺ។ ក្នុងនោះអង្គការនេះបានគាំទ្ររាជរដ្ឋាភិបាលកម្ពុជាចំពោះការផ្សព្វផ្សាយ និងលើកកម្ពស់ការអនុវត្តអនាម័យដៃ និងការការពារផ្សេងៗបានយ៉ាងឆាប់រហ័ស ប៉ុន្តែក៏មានក្តីបារម្ភមួយដែលប្រជាជនកម្ពុជាប្រមាណជាង ៣ លាននាក់ កំពុងខ្វះទឹកស្អាត និងសាប៊ូនៅក្នុងផ្ទះរបស់ពួកគេក៏ដូចបុគ្គលិកសុខាភិបាលជួរមុខមួយចំនួន និងអ្នកជំងឺពួកគេក៏កំពុងខ្វះទឹកស្អាត និងសាប៊ូនៅក្នុងមូលដ្ឋានសុខាភិបាលរបស់ពួកគេដែរ។
សេចក្ដីប្រកាសព័ត៌មានបញ្ជាក់ថា៖ «ទោះបីជាការលាងដៃជាមួយសាប៊ូជាមធ្យោបាយចម្បងមួយដើម្បីការពារការរីករាលដាលនៃជំងឺដ៏សាហាវក៏ដោយ ក៏នៅកម្ពុជាប្រមាណ ២១ ភាគរយនៃប្រជាជននៅតែគ្មានកន្លែងសម្រាប់លាងដៃជាមួយសាប៊ូ និងទឹកនៅឡើយ។ នៅកម្ពុជាមានមូលដ្ឋានសុខាភិបាលប្រមាណ ១០ ភាគរយ កំពុងតែខ្វះសេវាផ្គត់ផ្គង់ទឹក»។
លោក ឆាត់ សុភាព នាយកអង្គការវ័តធឺអេដ (WaterAid) ប្រចាំប្រទេសកម្ពុជា បានថ្លែងកាលពីម្សិលមិញថា ការទទួលបានទឹកស្អាតប្រើប្រាស់ និងការលាងដៃជាមួយសាប៊ូឲ្យបានត្រឹមត្រូវគឺចាំបាច់ក្នុងការការពារការចម្លងរោគនានា ជាពិសេសមេរោគកូរ៉ូណា និងបំបែកវដ្ដនៃជំងឺដែលនឹងរួមចំណែកអភិវឌ្ឍសេដ្ឋកិច្ចនៅរយៈពេលវែង។
លោកបញ្ជាក់ថា៖ «ខ្ញុំសូមអំពាវនាវឲ្យរដ្ឋមន្ត្រីក្រសួងសុខាភិបាល និងរដ្ឋមន្ត្រីវិស័យពាក់ព័ន្ធនានា បន្តកិច្ចគាំពារអាយុជីវិតរបស់ប្រជាជនកម្ពុជាយើង និងបុគ្គលិកសុខាភិបាលដោយជួយ ឲ្យពួកគេទទួលបានសាប៊ូ និងទឹកស្អាតប្រើប្រាស់គ្រប់ៗគ្នាដើម្បីជួយការពារសុវត្ថិភាពរបស់ពួកគាត់ឲ្យមានប្រសិទ្ធភាពខ្ពស់»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនបានឆ្លើយតបនឹងការវាយតម្លៃរបស់អង្គការ WaterAid នេះទេកាលពីម្សិលមិញ ដោយលោកស្រីគ្រាន់តែចោទជាសំណួរថាតើគេបាន [ព័ត៌មាន] ពីណាមក ហើយមានអ្វីជាសំអាង?
អង្គការ WaterAid បានដកស្រង់សម្ដីលោកស្រី សោភា ជាអនុប្រធាន និងឆ្មបនៅមណ្ឌលសុខភាពជ្រៃបាក់នៅខេត្តកំពង់ឆ្នាំងឲ្យដឹងថា នៅមណ្ឌលសុខភាពរបស់លោកស្រីមានទឹក សាប៊ូ និងកន្លែងលាងដៃគ្រប់គ្រាន់សម្រាប់ការពារជំងឺកូវីដ១។ ក្រុមគ្រូពេទ្យទាំងអស់រួមទាំងអ្នកជំងឺត្រូវបានអនុវត្តការណែនាំពីការអនាម័យដៃ និងពាក់ម៉ាស់មុនពេលចូលក្នុងមណ្ឌលសុខភាពបំពេញការងារ។
លោកស្រីបញ្ជាក់ថា៖ «ខ្ញុំ និងបុគ្គលិកទាំងអស់មានការប្រុងប្រយ័ត្ន និងរក្សាអនាម័យដៃស្អាតជានិច្ច។ បន្ទប់ពិនិត្យផ្ទៃពោះពួកខ្ញុំតូចចង្អៀត។ ពីមុនខ្ញុំអាចឲ្យអ្នកមកពិនិត្យផ្ទៃពោះចូលពិនិត្យម្តង ២ ឬ ៣ នាក់ ប៉ុន្ដែពេលនេះខ្ញុំឲ្យអ្នកពិនិត្យផ្ទៃពោះចូលពិនិត្យក្នុងបន្ទប់ម្តងម្នាក់ ដោយរក្សាគម្លាតឆ្ងាយៗពីគ្នា ដើម្បីរក្សាសុវត្ថិភាព»។
ជាមួយគ្នានេះអង្គការ WaterAid ក៏បានដកស្រង់សម្ដីលោក Wendy Graham សាស្ត្រាចារ្យសាកលវិទ្យាល័យ London School of Hygiene & Tropical Medicine (LSHTM) ផងដែរ ដោយលោកបានថ្លែងថាកាលពីឆ្នាំមុនលោកធ្លាប់បានផ្ដល់អនុសាសន៍ដល់សភាសុខភាពពិភពលោកស្តីពីទឹកស្អាត បង្គន់ និងអនាម័យក្នុងមូលដ្ឋានសុខាភិបាលដោយពួកគេបានសន្យាដោះស្រាយឧបសគ្គទាំងនោះ ប៉ុន្ដែលោកមិនដឹងថាមានប្រសិទ្ធភាពប៉ុន្មានភាគរយទេ។
លោកបន្តថា អ្នកពាក់ព័ន្ធវិស័យសុខាភិបាលត្រូវធានាថាគ្រប់មណ្ឌលសុខភាព មានការផ្គត់ផ្គង់ទឹកដែលអាចទុកចិត្តបាន ដើម្បីសម្អាតដៃ និងការថែរក្សាបរិស្ថានស្អាត «ចំពោះជំងឺកូវីដ ១៩ បើយើងមិនបានអើពើទៅលើមូលដ្ឋានអនាម័យទាំងនេះទេ គឺវាមានគ្រោះថ្នាក់ខ្លាំងណាស់ដល់មនុស្សជាតិ»៕
