បាត់ដំបងៈ គ្រាប់មិនទាន់ផ្ទុះគ្រប់ប្រភេទចំនួន ៣៩ គ្រាប់ត្រូវបានអង្គភាពកម្ចាត់មីនប្រចាំខេត្តបាត់ដំបងកម្ទេចចោលកាលពីថ្ងៃទី ៧ កុម្ភៈបន្ទាប់ពីបុរសម្នាក់ភ្ជួរដីចម្ការហើយប្រទះឃើញកាលពីថ្ងៃទី ៦ កុម្ភៈ នៅភូមិព្រៃទទឹង ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង។
លោក ព្រីង បញ្ញារិទ្ធ ប្រធានអង្គភាពស៊ីម៉ាក់ប្រចាំខេត្តបាត់ដំបងប្រាប់ពីម្សិលមិញថា ករណីគ្រាប់មិនទាន់ផ្ទុះដែលនគរបាលស្រុកគាស់ក្រឡប្រគល់មកឲ្យលោកនោះត្រូវមន្រ្តីជំនាញរបស់លោកយកទៅកម្ទេចចោលហើយបន្ទាប់ពីទទួលយកបាន ១ ថ្ងៃ។
លោកបញ្ជាក់ថា៖ «គ្រាប់ទាំងនោះខាងមន្រ្តីជំនាញខ្ញុំយកទៅកម្ទេចចោលអស់ហើយហើយគ្រាប់ខ្លះនៅទាំងក្បាលរបស់វាផងនិងគ្រាប់ខ្លះអត់មានក្បាល់គ្រាប់ទេ។ ចំពោះសំណល់គ្រាប់ទាំងនោះគ្រាប់ខ្លះបើយើងយកវាទៅដំឬគប់វានឹងផ្ទុះបាន»។
លោក បញ្ញារិទ្ធ ប្រាប់បន្តថា នៅក្នុងខេត្តបាត់ដំបងទាំងមូលមានស្រុកចំនួន ១៤ ហើយក្នុងនោះមាន ១០ ស្រុកដែលសម្បូរគ្រាប់មីននិងអាវុធយុទ្ធភណ្ឌមិនទាន់ផ្ទុះដែលជាសំណល់ពីសម័យសង្រ្គាមហើយស្រុកគាស់ក្រឡមានគ្រាប់មីននិងគ្រាប់មិនទាន់ផ្ទុះនៅសល់ច្រើនជាងគេក្នុងចំណោម ១០ ស្រុក។ ព្រោះថាស្រុកគាស់ក្រឡមិនសូវមានប្រជាពលរដ្ឋចូលទៅរស់នៅច្រើន ដូច្នេះខាងស៊ីម៉ាកក៏មិនទាន់ធ្វើប្រតិបត្តិការបោសសម្អាតមីនច្រើនជាងស្រុកទាំង ៩ ទៀតដែរ។
ពាក់ព័ន្ធករណីនេះលោក ឆាង វ៉ាន់ឆៃ អធិការនគរបាលស្រុកគាស់ក្រឡប្រាប់ថាគ្រាប់ទាំងនោះមានគ្រាប់ដេកា ១ គ្រាប់ គ្រាប់បេ ចំនួន ២១ គ្រាប់ គ្រាប់ ៦០ មិល្លីម៉ែត្រ ចំនួន ៥ គ្រាប់ គ្រាប់ ៦២ មិល្លីម៉ែត្រចំនួន ២ គ្រាប់ និងគ្រាប់មីន ៦៩ ចំនួន ១០ គ្រាប់ត្រូវបានបុរសអ្នកភូមិម្នាក់ភ្ជួរដីធ្វើចម្ការប្រទះឃើញ។
លោក ហេង រតនា ប្រធានមជ្ឈមណ្ឌលកំចាត់មីនកម្ពុជាថ្លែងលើហ្វេសប៊ុកលោកថា គប្បីប្រុងប្រយ័ត្នខ្ពស់ចំពោះគ្រោះថ្នាក់ គ្រាប់មិនទាន់ផ្ទុះទោះបីវានៅលើដើមឈេី កប់ដី ឬក្នុងទឹកក៏ដោយ! ពួកវាមិនស្អុយទេ ហាមដាច់ខាតក្នុងការគិតថាគ្រាប់ទាំងនោះស្អុយឲ្យសោះ! គ្រាប់ទាំងនេះមិនភ្លេចខ្លួនក្នុងការតាមសម្លាប់មនុស្សទេ៕