ភ្នំពេញៈ មន្ត្រីនៃអង្គភាពប្រឆាំងអំពើពុករលួយ (ACU) បានឃាត់ និងនាំខ្លួនលោក ស៊ូ អារ៉ាហ្វាត់ អភិបាលរងខេត្តបាត់ដំបង និងលោកឧកញ៉ា សង ថន ទៅកាន់សាលាដំបូងរាជធានីភ្នំពេញកាលពីម្សិលមិញ ដើម្បីបន្តនីតិវិធីពាក់ព័ន្ធនឹងករណីពុករលួយ រឿងដីធ្លីប្រមាណ ៥ ០០០ ហិកតា នៅស្រុកគាស់ក្រឡ ខេត្តបាត់ដំបង។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ប្រាប់ភ្នំពេញ ប៉ុស្តិ៍កាលពីថ្ងៃចន្ទថា លោក ស៊ូ អារ៉ាហ្វាត់ និងលោក សង ថន ត្រូវបានអង្គភាពប្រឆាំងអំពើពុករលួយបញ្ជូនខ្លួនមកតុលាការក្នុងសំណុំរឿងតែមួយលើករណីពុករលួយរឿងដីធ្លីកាលពីថ្ងៃទី ៦ កក្កដា។
លោក គឹមឡុង ថ្លែងថា៖ «ព្រះរាជអាជ្ញារង សឿន មុនីរ័ត្ន កំពុងបន្តការសាកសួរជុំវិញករណីនេះ ដោយមិនទាន់មានការចោទប្រកាន់នៅឡើយទេ។ សំណុំរឿងនេះកំពុងតែសាកសួរមានការសម្រេចចោទប្រកាន់យ៉ាងណានោះ បានព័ត៌មានបន្ថែមទៀត ខ្ញុំនឹងជម្រាបជូនបន្ថែមទៀត។ សុំបញ្ជាក់ជូនបន្ថែមបន្តិចថា ករណីនេះគឺបញ្ជូនមកទាំង ២ នាក់ (លោក ស៊ូ អារ៉ាហ្វាត់ និងលោក សង ថន) នៅក្នុងសំណុំរឿងតែមួយ»។
កាលពីល្ងាចថ្ងៃទី ២៧ ខែមិថុនា ACU បាននាំខ្លួនឧកញ៉ា សង ថន ដែលបានកាន់កាប់ដីប្រមាណ ៥ ពាន់ហិកតា ឬស្មើនឹង ១ ភាគ ៤ នៃផ្ទៃដីក្នុងស្រុកគាស់ក្រឡទាំងមូលមកសាកសួរពាក់ព័ន្ធនឹងករណីពុករលួយរឿងដីធ្លីក្នុងស្រុកនេះ។
ចំណែក លោក ស៊ូ អារ៉ាហ្វាត់ អភិបាលរងខេត្តបាត់ដំបង ដែលត្រូវបានដឹងថា ធ្លាប់ជាប្រធានគណៈកម្មការថ្នាក់ខេត្តដោះស្រាយវិវាទដីធ្លី នៅស្រុកគាស់ក្រឡត្រូវបាននាំខ្លួនមកកាន់ស្នាក់ការ ACU នៅរាជធានីភ្នំពេញនៅព្រលប់ថ្ងៃទី ១ ខែកក្កដា ឆ្នាំ ២០២០ ពាក់ព័ន្ធនឹងសំណុំរឿងនោះដូចគ្នា។
ជុំវិញករណីអំពើពុករលួយនេះលោកនាយករដ្ឋមន្ត្រី ហ៊ុន សែន កាលពីថ្ងៃទី ២៧ ខែមិថុនា ក៏បានចេញអនុក្រឹត្យបញ្ចប់មុខតំណែងលោក ម៉ៅ សុចាន់ ពីអភិបាលនៃគណៈអភិបាលស្រុកគាស់ក្រឡ ខេត្តបាត់ដំបងផងដែរ។ ប៉ុន្តែលោកមិនត្រូវបានចោទប្រកាន់ ឬនាំខ្លួនមកសួរនាំនោះទេ។
លោក យិន ម៉េងលី មន្ត្រីសម្របសម្រួលសមាគមអាដហុកប្រចាំខេត្តបាត់ដំបងបានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា វាគឺជារឿងប្រសើរដែល ACU បានបំបែកសំណុំរឿងនេះដោយចង់ឲ្យនីតិវិធីនៃការស៊ើបអង្កេត ប្រព្រឹត្តទៅឲ្យបានឆាប់រហ័ស និងស្វែងរកអ្នកពាក់ព័ន្ធជុំវិញអំពើពុករលួយនេះយកមកផ្តន្ទាទោសតាមច្បាប់។
លោកបញ្ជាក់ថា៖ «ខ្ញុំចង់ឲ្យស៊ើបអង្កេតឲ្យបានលឿនពាក់ព័ន្ធនឹងអំពើពុករលួយនេះ ហើយបង្ហាញភ័ស្តុតាងឲ្យបានច្បាស់ថាមានភ័ស្តុតាងអ្វីខ្លះ ដែល ACU មាននៅក្នុងរឿងក្តីនេះ? យើងចង់ឲ្យ ACU ចាត់ការលើករណីនេះឲ្យដូចនឹងករណីដែល ACU បានធ្វើឡើងពាក់ព័ន្ធនឹងមន្ត្រីមុនដែលបានឃាត់ខ្លួន។ ចង់ឲ្យបង្ហាញករណីនេះដល់មតិជាតិ អន្តរជាតិ សូម្បីតែសម្តេចក៏បានលើកឡើងដែរ»។
លោក ម៉េងលី បន្តថា ទាក់ទងបញ្ហាពុករលួយដីធ្លីនេះក៏ព្រោះតែលោកអភិបាលរងខេត្តបាត់ដំបង និងលោកឧកញ៉ា សង ថន ធ្លាប់មានទំនាស់ជាមួយគ្នា រយៈពេលកន្លះឆ្នាំកន្លងមកនេះដោយមានការចុះផ្សាយ និងល្បីទូទាំងខេត្តក្នុងករណីដែលឧកញ៉ា សង ថន បានប្រគល់ដីមួយចំនួនមកលោកអភិបាលរងខេត្តរៀបចំនីតិវិធីសុំទៅថ្នាក់លើដើម្បីទុកជាសម្បត្តិរបស់រដ្ឋ ដោយស្នើឲ្យផ្តល់ប្លង់កម្មសិទ្ធិដីសេសសល់ដែលគាត់បានកាន់កាប់។
ក្នុងពេលនោះ ភាគីទាំង ២ ក៏ឈានដល់ការប្តឹងផ្តល់គ្នាករណីដែលអភិបាលរង លោក ស៊ូ អារ៉ាហ្វាត់ បានក្លែងឯកសារពីចំនួនដីមិនបានត្រឹមត្រូវដាក់ទៅថ្នាក់លើ ខណៈដីដែលលោកឧកញ៉ា កំពុងកាន់កាប់ប្រមាណ ៥ ០០០ ហិកតា ក្នុងស្រុកនេះកំពុងមានវិវាទជាមួយប្រជាពលរដ្ឋជាច្រើនរយគ្រួសារផងដែរ។
ភ្នំពេញប៉ុស្តិ៍មិនអាចទាក់ទង លោក ឱម យ៉ិនទៀង ប្រធាន ACU និងលោក យ៉ិនទៀង ពុទ្ធារិទ្ធ ជំនួយការផ្ទាល់របស់លោកកាលពីម្សិលមិញបានទេ ដោយទូរស័ព្ទ និងតេឡេក្រាមរបស់គាត់មិនមានការឆ្លើយតប។ ចំណែកលោក នួន បូផល អនុប្រធាន ACU បានបញ្ជាក់យ៉ាងខ្លីតាមទូរស័ព្ទថា លោកជាប់រវល់៕
វីដេអូ៖