.jpg)
លោក ឱម យិនទៀង នៅក្នុងកិច្ចប្រជុំមួយ នាពេលកន្លងមក។ ភ្នំពេញ ប៉ុសិ៍្ត
ភ្នំពេញៈ កាលពីអំឡុងខែឧសភា អង្គភាពប្រឆាំងអំពើពុករលួយ (ACU) ទទួលបានពាក្យបណ្ដឹងចំនួន ៣១ ពាក់ព័ន្ធករណី ប្រព្រឹត្តអំពើពុករលួយ ប៉ុន្តែក្នុងចំណោមពាក្យបណ្ដឹងទាំងនោះ រកពុំឃើញមានអំពើពុករលួយឡើយ។ នេះបើតាមសេចក្ដីជូនដំណឹងស្ដីពីកិច្ចប្រជុំលើកទី៤៦ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយកាលពីថ្ងៃទី ៣១ ខែ ឧសភា។
លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយបានដឹកនាំកិច្ចប្រជុំនៅថ្ងៃទី ៣១ ឧសភា ដើម្បីពិនិត្យ និងអនុម័តកំណត់ហេតុកិច្ចប្រជុំក្រុមប្រឹក្សាជាតិប្រឆាំងអំពើពុករលួយលើកទី៤៥ អាណត្តិទី២ និងដើម្បីស្ដាប់របាយការណ៍របស់លោក ឱម យិនទៀង ប្រធានអង្គភាពប្រឆាំងអំពើពុករលួយអំពីសកម្មភាពការងាររបស់ ACU អំឡុងខែឧសភា។
បើតាមលោក ឱម យិនទៀង ការងារជាអាទិ៍ ដែលអង្គភាពប្រឆាំងអំពើពុករលួយបានធ្វើកាលពីអំឡុងខែឧសភាដូចជាការប្រកាសទ្រព្យសម្បត្តិ និងបំណុលមានចំនួន ២១ រូប ទទួលបានការតែងតាំងថ្មីចំនួន ១៣១ រូប បញ្ឈប់មុខតំណែងចំនួន ៣២ រូប និងបានបើកឯកសារប្រកាសទ្រព្យសម្បត្តិ និងបំណុលចំនួន ៦ តាមតម្រូវការស៊ើបអង្កេត។
រីឯពាក្យបណ្ដឹងក្នុងខែឧសភាមាន ៣១ ពាក្យបណ្ដឹង ដែល ១២ ពាក្យបណ្ដឹង គឺជារបស់ជនអនាមិក ប៉ុន្តែក្នុងចំណោមពាក្យបណ្តឹងទាំងនោះ ACU រកមិនឃើញអំពើពុករលួយឡើយ និងបានឆ្លើយតបទៅម្ចាស់បណ្ដឹងវិញចំនួន ២៤ បណ្ដឹង។
ក្នុងនោះ ការចុះពិនិត្យស៊ើបបញ្ជាក់ទៅលើក្រុមហ៊ុន ១៨ ក្រុមហ៊ុន និងស្រាវជ្រាវអត្តសញ្ញាណក្រុមហ៊ុនចំនួន ៩៤ ក្រុមហ៊ុន។
ទោះជាយ៉ាងណា អង្គភាពប្រឆាំងអំពើពុករលួយមិនទាន់បង្ហាញអំពីលទ្ធផលស្រាវជ្រាវរបស់ខ្លួនជុំវិញករណីសង្ស័យប្រព្រឹត្តអំពើពុករលួយដោយលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី និងលោក ស្រេង សុខា ស្នងការរងនគរបាលខេត្តកណ្ដាលនៅឡើយទេ ថ្វីដ្បិត ACU បានបញ្ជាក់តាំងពីខែកុម្ភៈថា ខ្លួនបានបញ្ចប់ការស៊ើបអង្កេតលើទ្រព្យសម្បត្តិលោក គឹម រស្មី និងកំពុងបន្តស៊ើបអង្កេតលោក ស្រេង សុខា ក្ដី។
កាលពីថ្ងៃម្សិលមិញ លោក ឱម យិនទៀង បានប្រាប់ភ្នំពេញប៉ុស្ដិ៍ថា លោកមិនចង់និយាយអំពីករណីរបស់លោក គឹម រស្មី និងលោក ស្រេង សុខា តាមទូរស័ព្ទឡើយ។
លោកបញ្ជាក់ថា៖ «ខ្ញុំមិនសម្ភាសតាមទូរស័ព្ទទេ ព្រោះខ្ញុំមិនដឹងថា ប្អូនឯងមកពីភ្នំពេញប៉ុស្ដិ៍ពិតឬអត់? បើប្អូនឯងចង់សម្ភាស ដាក់លិខិតសុំសម្ភាសមក»។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាលើកឡើងថា សំណុំរឿងអំពើពុករលួយ អាចជារឿងស្មុគស្មាញមួយ ហើយរឿងខ្លះទៀតអាចប្រព្រឹត្តឡើងជាលក្ខណៈប្រព័ន្ធ ប៉ុន្តែលោកយល់ថា ជុំវិញការលេចធ្លាយទ្រព្យសម្បត្តិរបស់លោក គឹម រស្មី កាលពីដើមខែកុម្ភៈកន្លងទៅ គឺ ACU អាចស៊ើបអង្កេតរកឃើញតែក្នុងរយៈពេលខ្លីប៉ុណ្ណោះដើម្បីលាតត្រដាងការពិតប្រាប់មហាជន ប្រសិនបើមានឆន្ទៈពិតប្រាកដ។
លោកថា៖ «ការលេចធ្លាយអំពីទ្រព្យសម្បត្តិ គ្រាន់តែជាផ្នែកមួយតូចទេ មន្ត្រីកម្រិតនេះ ទ្រព្យសម្បត្តិទំនងជាមានច្រើនជាងនេះ។ អ៊ីចឹងវាអត់ពិបាកអីច្រើនទេ បើបទល្មើសអីផ្សេងទៀត ដូចជាបទល្មើសរំលោភអំណាច វាត្រូវការពេលវេលាស៊ើបច្រើន»។
ជុំវិញនឹងបញ្ហានេះ ភ្នំពេញប៉ុស្ដិ៍នៅតែមិនអាចសុំការបកស្រាយបានពីលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី ដោយសារលេខទូរស័ព្ទលោកខលចូលជាច្រើនលើក តែគ្មានអ្នកទទួលកាលពីថ្ងៃម្សិលមិញ៕
