.jpg)
គ្រូពេទ្យលើកបង្ហាញវ៉ាក់សាំងស៊ីណូវ៉ាក់ នៅក្រសួងព័ត៌មានកាលពីថ្ងៃទី ១១ មេសា។ ហុង មិនា
ភ្នំពេញ៖ ស្របពេលដែលចំនួនអ្នកឆ្លងកូវីដមានការកើនឡើងកាន់តែគួរឱ្យព្រួយបារម្ភអង្គភាពព័ត៌មាន និងប្រតិកម្មរហ័ស នៅរសៀលថ្ងៃទី ១៣ ខែមេសានេះ បានផ្សាយចេញនូវវីដេអូថ្មីមួយ មានចំណងជើងថា «វ៉ាក់សាំងកាតព្វកិច្ច ដើម្បីការពារអាយុជីវិតយើង គ្រួសារយើង និងអ្នកនៅជុំវិញខ្លួនយើង» ដែលជាការជំរុញឱ្យពលរដ្ឋទៅចាក់វ៉ាក់សាំង។
វីដេអូដែលមានរយៈពេលជាង ១៦ នាទីនេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រីបានលើកឡើងថា ការផ្សាយចេញនូវវីដេអូនេះ ធ្វើឡើងក្នុងគោលបំណងបន្តអប់រំសាធារណៈមតិ និងលើកទឹកចិត្តប្រជាពលរដ្ឋក្នុងការបង្ការ ទប់ស្កាត់ជំងឺកូវីដ ១៩ ជាពិសេសមន្ត្រីរាជការ និងកងកម្លាំងប្រដាប់អាវុធ ដែលត្រូវមានកាតព្វកិច្ចចាក់វ៉ាក់សាំង ត្រូវចូលរួមអនុវត្តតាមសេចក្តីសម្រេចរបស់រាជរដ្ឋាភិបាលឱ្យបានត្រឹមត្រូវក្នុងការទៅទទួលការចាក់វ៉ាក់សាំងប្រឆាំងកូវី ១៩ ឱ្យបានគ្រប់ៗគ្នា។
នៅក្នុងខ្លឹមសារវីដេអូបានបង្ហាញពីបច្ចុប្បន្នភាពនៃការចាក់វ៉ាក់សាំងបង្ការជំងឺកូវីដ ១៩ ថា ជាមធ្យោបាយចុងក្រោយមួយបន្ថែមទៀត ដើម្បីកាត់ផ្តាច់ការឆ្លងរាលដាលនៃជំងឺកូវីដ ១៩ ដ៏កាចសាហាវ និងដែលជាសត្រូវលាក់មុខ។
ក្រៅពីនេះ វីដេអូក៏បានបញ្ជាក់ផងដែរថា រាជធានីភ្នំពេញ និងខេត្តកណ្តាល ដែលជាទីតាំងមានអ្នកឆ្លងច្រើនជាងគេ ត្រូវបានរាជរដ្ឋាភិបាលផ្តល់អាទិភាព សម្រាប់ការចាក់វ៉ាក់សាំងប្រឆាំងកូវីដ ១៩។
វីដេអូនេះ ថែមទាំងបានរំលេចឡើងវិញនូវប្រសាសន៍របស់លោកនាយករដ្ឋមន្ត្រី ហ៊ុន សែន ដែលបានថ្លែងថា៖ «រាជរដ្ឋាភិបាល និងចាក់ជូនទៅតាមលំដាប់អាទិភាពនៅពេលដែលវ៉ាក់សាំងមកដល់ យើងនឹងពិនិត្យក្រុមណាដែលត្រូវចាក់មុន ក្រុមណាដែលត្រូវចាក់ក្រោយ ហើយយើងក៏មានការបែងចែកប្រភេទអ្នកណាត្រូវទទួល អាយុប៉ុន្មានត្រូវទទួល។ អាយុ ៥៩ ឆ្នាំចុះ ទទួលស៊ីណូហ្វាម SARS-CoV2 (Sinopharm) អាយុពី ១៨ ឡើងលើទទួលស៊ីណូវ៉ាក់ (Sinovac) អាយុ ៦០ ឆ្នាំឡើងលើទទួល CovShield (Astra Zeneca) នេះជាផែនការមេរបស់យើង»។
លោក ហ៊ុន សែន ថ្លែងទៀតថា ក្នុងន័យនេះ ការស្វះស្វែងរកវ៉ាក់សាំងដើម្បីចាក់ជូនមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋមិនមែនជាការងាយស្រួលនោះឡើយ ហើយថា កម្ពុជាជាប្រទេសតូច តែអាចចាត់ទុកជាប្រទេសមានភ័ព្វសំណាងមួយ ដែលបានទទួលវ៉ាក់សាំងបង្ការកូវីដ ១៩ ជាបន្តបន្ទាប់ ទាំងក្នុងក្របខ័ណ្ឌជំនួយទ្វេភាគី ពីសំណាក់សាធារណរដ្ឋប្រជាមានិតចិន ទាំងជំនួយតាមរយៈយន្តការកូវ៉ាក់របស់អង្គការសុខភាពពិភពលោក និងជំនួយពីភាគីដែលជាដៃគូពាក់ព័ន្ធផ្សេងៗទៀត រួមទាំងការបញ្ជាទិញដោយផ្ទាល់ពីសំណាក់រាជរដ្ឋាភិបាល។
អង្គភាពព័ត៌មាន និងប្រតិកម្មរហ័សបានកត់សម្គាល់ថា រាជរដ្ឋាភិបាលបានប្រើប្រាស់ថវិកាយ៉ាងច្រើន ដើម្បីប្រយុទ្ធប្រឆាំងជាមួយជំងឺកូវីដ ១៩ រាប់ទាំងថវិកាសម្រាប់ទិញវ៉ាក់សាំងផងដែរ។ «មានសប្បុរសជន ក៏ដូចជាបណ្តាប្រទេសជាមិត្តជាច្រើនទៀតក៏បានចូលរួមចំណែកជាថវិកា ជាមួយរាជរដ្ឋាភិបាល ដើម្បីទិញវ៉ាក់សាំងបង្ការជំងឺកូវីដ ១៩ យកមកចាក់ជូនមន្ត្រីរាជការ កម្លាំងប្រដាប់អាវុធ និងប្រជាពលរដ្ឋដោយឥតគិតថ្លៃ។ កូវីដ ១៩ ក៏នៅតែបន្តរំខាន និងបង្កផលប៉ះពាល់ដល់ជីវភាពគ្រួសារយើងក្នុងរយៈពេលវែងបន្តទៀត ប្រសិនបើយើងមិនអាចយកឈ្នះវាបានទេនោះ»។
អង្គភាពព័ត៌មាន និងប្រតិកម្មរហ័ស ជំរុញឱ្យប្រជាពលរដ្ឋខ្មែរគ្រប់រូបត្រូវរួមគ្នាទៅទទួលវ៉ាក់សាំងប្រឆាំងកូវីដ ១៩ តាមការកំណត់របស់រាជរដ្ឋាភិបាលផង រួមគ្នាបន្តអនុវត្ត ៣ ការពារ និង ៣ កុំផង ដើម្បីខ្លួនយើង គ្រួសារយើង និងសង្គមជាតិយើង។ «យើងត្រូវមានក្តីសង្ឃឹមជឿជាក់យ៉ាងមុតមាំលើខ្លួនយើងថា ខ្មែរពិតជាអាចធ្វើបាន»៕
