The Phnom Penh Post Search

Search form

Logo of Phnom Penh Post newspaper Phnom Penh Post - អង្គភាព​ប្រឆាំង​អំពើ​ពុករលួយ​រិះគន់​មូលនិធិ​សកល

អង្គភាព​ប្រឆាំង​អំពើ​ពុករលួយ​រិះគន់​មូលនិធិ​សកល

អង្គភាព​ប្រឆាំង​អំពើ​ពុករលួយ​រិះគន់​មូលនិធិ​សកល

ភ្នំពេញៈ អង្គភាព​ប្រឆាំង​អំពើ​ពុករលួយ​កម្ពុជា បាន​រិះគន់​អង្គការ​មូលនិធិ​សកល​ប្រយុទ្ធ​ប្រឆាំង​នឹង​ជំងឺ​អេដស៍ ជំងឺ​របេង និង​ជំងឺ​គ្រុន​ចាញ់ ចំពោះ​ការ​មិន​បញ្ជូន​លទ្ធផល​នៃ​ការ​ស៊ើប​អង្កេត​របស់​ខ្លួន ក្នុង​អំពើ​ពុករលួយ​ទាក់​ទង​នឹង​ប្រាក់​ជំនួយ​សុខាភិបាល។

លោក ឆាយ សាវុធ អនុ​ប្រធាន​អង្គភាព​ប្រឆាំង​អំពើ​ពុករលួយ បាន​ថ្លែង​ថា លោក​បាន​ទាក់​ទង​អង្គការ​មូលនិធិ​សកល​ដើម្បី​ស្នើ​សុំ​ភ័ស្តុតាង​អំពើ​ពុករលួយ​ដែល​អង្គការ​នេះ​រក​ឃើញ ក្នុង​ស្ថាប័ន​រដ្ឋាភិបាល អង្គការ​មិន​មែន​រដ្ឋាភិបាល និង​អ្នក​ម៉ៅការ​ឯកជន។ លោក​ថ្លែង​ថា៖ «រហូត​មក​ដល់​ពេល​នេះ យើង​មិន​ទទួល​បាន​ភ័ស្តុតាង ឬ​ឯកសារ​ដែល​ផ្ញើ​មក​អង្គភាព​ប្រឆាំង​អំពើ​ពុករលួយ​ទេ។ កុំ​ខ្លាច​សូម​យក​ភ័ស្តុតាង​មក​ឲ្យ​យើង»។

អង្គការ​មូលនិធិ​សកល បាន​ផ្សព្វ​ផ្សាយ​របាយ​ការណ៍​ពេញ​លេញ​មួយ​ដែល​អាច​ទាញ​យក​បាន ពី​គេហទំព័រ​របស់​ខ្លួន នៅ​ថ្ងៃ ទី១៣ ខែ វិចិ្ឆកា។

លោក សាវុធ បាន​ថ្លែង​ទៀត​ថា៖ «ប្រសិន​បើ​គេ​ថា គេ​រក​ឃើញ​អំពើ​ពុករលួយ ហេតុ​អ្វី​គេ​មិន​ដើរ​ចូល​មក​អង្គភាព​ប្រឆាំង​អំពើ​ពុករលួយ ហើយ​យក​ភ័ស្តុតាង​មក​បង្ហាញ​យើង​ថា គេ​បាន​រក​ឃើញ​មន្រ្តី​ក្រសួង សុខាភិបាល ប្រព្រឹត្ត​អំពើ​ពុករលួយ។ យើង​បើក​ទ្វារ ២៤ ម៉ោង ចាំ​ស្វាគមន៍​រឿង​ក្តី​ពុករលួយ​គ្រប់​ករណី»។

ក្នុង​អ៊ីមែល​ឆ្លើយ​តប​នឹង​ការ​អត្ថាធិប្បាយ​របស់​លោក សាវុធ លោក Seth Faison ប្រធាន​ទំនាក់​ទំនង​នៅ​អង្គការ​មូលនិធិ​សកល បាន​ថ្លែង​ថា៖ «យើង​កំពុង​ធ្វើ​ការ​ជាមួយ​នឹង​រដ្ឋាភិបាល​កម្ពុជា​លើ​បញ្ហា​ទាំង​នេះ»។

បន្ទាប់​ពី​មាន​ការ​ចេញ​ផ្សាយ​នូវ​របាយ​ការណ៍ កាល​ពី​ខែ វិច្ឆិកា លោក សាវុធ បាន​ថ្លែង​ថា មន្រ្តី​នៅ​មជ្ឈមណ្ឌល​ជាតិ​ប្រឆាំង​ជំងឺ​គ្រុន​ចាញ់ និង​មជ្ឈមណ្ឌល​ជាតិ​ប្រឆាំង​ជំងឺ​អេដស៍ សើ​ស្បែក និង​កាមរោគ បាន​ស្ថិត​ក្រោម​ការ​ស៊ើប​អង្កេត​របស់​អង្គភាព​ប្រឆាំង​អំពើ​ពុករលួយ។

លោក​ថ្លែង​ថា៖ «វា​មិន​មាន​ន័យ​ថា យើង​មិន​ចាត់​វិធានការ​លើ​រឿង​ក្តី​នេះ​នោះ​ទេ ប្រសិន​បើ​អង្គការ​មូលនិធិ​សកល​មិន​បាន​ដាក់​ពាក្យ​បណ្តឹង​នោះ។ ប៉ុន្តែ យើង​ឆ្ងល់​ថា ហេតុ​អ្វី​អង្គការ​នេះ ផ្សព្វ​ផ្សាយ​ថា មន្រ្តី​ក្រសួង សុខាភិបាល ប្រព្រឹត្ត​អំពើ​ពុករលួយ»។ លោក​បន្ថែម​ថា អង្គការ​នេះ​ត្រូវ​ស្នើ​ឲ្យ​អង្គភាព​ចាត់​វិធានការ។

លោក ម៉ម ប៊ុនហេង រដ្ឋ​មន្រ្តី ក្រសួង សុខាភិបាល លោក មាន ឈីវុន ប្រធាន​មជ្ឈមណ្ឌល​ជាតិ​ប្រឆាំង​ជំងឺ​អេដស៍ សើ​ស្បែក និង​កាមរោគ និង​លោក ច ម៉េងចួ ប្រធាន​មជ្ឈមណ្ឌល​ជាតិ​ប្រឆាំង​ជំងឺ​គ្រុន​ចាញ់​មិន​អាច​ទាក់ទង​សុំ​ការ​អត្ថាធិប្បាយ​បាន​ទេ កាល​ពី​ម្សិលមិញ។

ក្នុង​លិខិត​មួយ​ផ្ញើ​ជូន​លោក ប៊ុនហេង ចុះ​ថ្ងៃ ទី៩ ខែ ធ្នូ អង្គការ​មូលនិធិ​សកល​បាន​កំណត់​រយៈ​ពេល ៣០ ថ្ងៃ​ដល់​រដ្ឋាភិបាល​ឲ្យ​ប្រគល់​ប្រាក់​ជំនួយ​ដែល​ប្រើ​ប្រាស់​មិន​ត្រឹម​ត្រូវ​មក​វិញ បើ​មិន​ដូច្នោះ​ទេ អង្គការ​នេះ​នឹង​ផ្អាក​លុប​ចោល ឬ​កាត់​បន្ថយ​កម្មវិធី​ជំនួយ​ដែល​មាន​ទំហំ​ថវិកា​ជាង ១០០ លាន​ដុល្លារ៕ TK

អត្ថបទគួរចាប់អារម្មណ៍