.jpg)
សកម្មភាពលែងសត្វអណ្ដើកហ្លួងនៅខេត្តកោះកុងកន្លងទៅ។ ហេង ជីវ័ន
ព្រះសីហនុៈ អង្គការសមាគមអភិរក្សសត្វព្រៃ (WCS) និងរដ្ឋបាលជលផលនឹងលែងសត្វអណ្ដើកហ្លួងចំនួន ២០ ក្បាលនាថ្ងៃទី ២៦ ខែមេសាស្អែកនេះនៅក្នុងកម្មវិធីសម្ពោធគម្រោងទប់ស្កាត់ការជួញដូរសត្វព្រៃខុសច្បាប់ដែលធ្វើឡើងនៅភូមិបឹងត្រាច ឃុំចម្ការលួង ស្រុកកំពង់សិលា ខេត្តព្រះសីហនុ។
កម្មវិធីសម្ពោធនិងលែងសត្វអណ្ដើកហ្លួង ២០ ក្បាលនេះគឺមានចូលរួមពីលោក អេង ជាសាន ប្រតិភូរាជរដ្ឋាភិបាលទទួលបន្ទុករដ្ឋបាលជលផលមន្ទីរពាក់ព័ន្ធព្រះសង្ឃអាជ្ញាធរមូលដ្ឋានម្ចាស់ជំនួយសហគមន៍មូលដ្ឋានសិស្សនិងគ្រូបង្រៀនដែលកម្មវិធីនេះសហការរៀបចំដោយ WCS និងរដ្ឋបាលជលផល។
សេចក្ដីជូនដំណឹងមួយបានចុះផ្សាយថាកម្មវិធីសម្ពោធនិងលែងអណ្ដើកហ្លួងនាពេលនេះគឺមានបំណងដើម្បីអភិរក្សសត្វអណ្ដើកហ្លួងឬអណ្ដើកសរសៃ ដែលគេជឿថា បានផុតពូជអស់ហើយនៅកម្ពុជា ប៉ុន្តែមកដល់ឆ្នាំ ២០០០ រដ្ឋបាលជលផល និងអង្គការសមាគមអភិរក្សសត្វព្រៃកម្ពុជាបានរកឃើញសាជាថ្មីនូវប្រភេទអណ្ដើកនេះមួយចំនួនតូច នៅសេសសល់តាមដងព្រែកស្រែអំបិល។
សេចក្ដីជូនដំណឹងនេះបន្តថា «ចាប់តាំងពីពេលនោះមក អង្គការសមាគមអភិរក្សសត្វព្រៃនិងរដ្ឋបាលជលផល បានសហការគ្នាដើម្បីការពារប្រភេទសត្វអណ្ដើកនេះកុំឱ្យផុតពូជរួមមាន កម្មវិធីការពារសម្បុកអណ្ដើកហ្លួង ការចិញ្ចឹមថែទាំក្រោយពេលញាស់ ការទប់ស្កាត់ការជួញដូរខុសច្បាប់ ការពង្រឹងការអនុវត្តច្បាប់ ការ ពិនិត្យតាមដាន ការផ្សព្វផ្សាយនិងការគាំទ្រលើជីវភាពរស់នៅរបស់សហគមន៍»។
លោក សោម ស៊ីថា ទីប្រឹក្សា បច្ចេកទេសគម្រោងនៃអង្គការ WCS បានប្រាប់ភ្នំពេញប៉ុស្ដិ៍បន្ថែមកាលពីថ្ងៃ អង្គារថា ការសម្ពោធគម្រោងដើម្បីទប់ស្កាត់ការជួញដូរសត្វព្រៃខុសច្បាប់នេះគឺជាគម្រោងថ្មីមួយដែលសំដៅទៅដល់ការអភិរក្សសត្វព្រៃទាំងអស់នៅក្នុងប្រទេសកម្ពុជាមិនមែនត្រឹមតែសត្វអណ្ដើកហ្លួងនេះទេ ជាពិសេសគឺទប់ស្កាត់ការជួញដូរសត្វព្រៃឆ្លងដែន ចេញពីប្រទេសកម្ពុជាចេញទៅប្រទេសជិតខាង។
លោកបានបញ្ជាក់ថា៖ «គម្រោងទប់ស្កាត់ការជួញដូរសត្វព្រៃហ្នឹង គឺមានរយៈពេល ៤ ឆ្នាំ ពីឆ្នាំ ២០១៩ ដល់ឆ្នាំ ២០២២»។
លោក ស៊ីថា បន្តថា គម្រោងទប់ស្កាត់ការជួញដូរសត្វព្រៃនេះគឺឧបត្ថម្ភថវិកាដោយសហភាពអឺរ៉ុប ប៉ុន្តែលោកមិនបានដឹងអំពីទំហំទឹកប្រាក់នៅឡើយទេ។
លោកបន្ថែមថា ការលែងសត្វអណ្ដើកហ្លួងទាំង ២០ ក្បាលនេះ គឺជាការលែងទ្រង់ទ្រាយធំលើកទី ៣ ហើយ ដោយលើកទី ១ កាលពីឆ្នាំ ២០១៥ ខាង WCS និងរដ្ឋបាលជលផលលែង ២១ ក្បាល និងលើកទី ២ ក្នុងឆ្នាំ ២០១៧ បានលែងចំនួន ២៥ ក្បាល ហើយបច្ចុប្បន្ននេះ សត្វអណ្ដើកប្រភេទនេះគឺមានរស់នៅតែតាមដងព្រែកអំបិល ដែលស្ថិតក្នុងខេត្តព្រះសីហនុនិងខេត្តកោះកុងប៉ុណ្ណោះ។
ចំណែកលោក អេង ជាសាន ប្រតិភូរាជរដ្ឋាភិបាលទទួលបន្ទុករដ្ឋបាលជលផលបានប្រាប់ភ្នំពេញប៉ុស្ដិ៍ដែរថា សព្វថ្ងៃសត្វអណ្ដើកហ្លួងត្រូវការពារតាមរយៈការទប់ស្កាត់កុំឱ្យមានការបូមខ្សាច់ដែលជាទីជម្រករបស់វាស្ថិតក្នុងព្រែកស្រែអំបិល និងការផ្សព្វផ្សាយទៅដល់អ្នកនេសាទឱ្យស្គាល់អំពីប្រភេទសត្វអណ្ដើកនេះ ដើម្បីការពារកុំឱ្យពួកគាត់ចាប់យកទៅបរិភោគនៅពេលនេសាទបាន។
លោកបានបញ្ជាក់ថា៖ «អណ្ដើកហ្នឹងយើងលែងគឺដើម្បីការពារ ព្រោះអាហ្នឹងវាជាប្រភេទជិតផុតពូជ»៕
