ភ្នំពេញៈ អតីតមន្ត្រីក្រឡាបញ្ជីសាលាឧទ្ធរណ៍ លោក ទេព ធីរិទ្ធ ដែលរងការចាប់ឃាត់ខ្លួនពីអង្គភាពប្រឆាំងអំពើពុករលួយ កាលពីថ្ងៃសុក្រនោះ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចដោះលែងឲ្យនៅក្រៅឃុំវិញហើយ កាលពីថ្ងៃអាទិត្យ ប៉ុន្តែបានដាក់ឲ្យស្ថិតនៅក្រោមការត្រួតពិនិត្យតាម ផ្លូវតុលាការ។
អ្នកនាំពាក្យនៃស្ថាប័នអយ្យការអមសាលាដំបូងរាជធានីភ្នំពេញ លោក គុជ គឹមឡុង បានប្រាប់ភ្នំពេញប៉ុស្តិ៍នៅថ្ងៃម្សិលមិញថា ក្រោយពីបញ្ចប់ការសាកសួរកាលពីល្ងាចថ្ងៃអាទិត្យ ជនសង្ស័យឈ្មោះ ទេព ធីរិទ្ធ អាយុ ៤៦ ឆ្នាំ ជាអតីតមន្ត្រីក្រឡាបញ្ជីសាលាឧទ្ធរណ៍ ត្រូវបានតំណាងអយ្យការសម្រេចចោទប្រកាន់ពីបទ «វីតិក្រម» តាមមាត្រា ៥៩៣ នៃក្រមព្រហ្មទណ្ឌ បទល្មើសដែលត្រូវអនុវត្តការផ្តន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លានរៀលទៅ ១០ លានរៀល។
លោកបានបញ្ជាក់ថា៖ «ប៉ុន្តែចៅក្រមស៊ើបសួរនៅក្នុងសំណុំរឿងនេះ បានសម្រេចដាក់ជនសង្ស័យឲ្យស្ថិតនៅក្រោមការត្រួតពិនិត្យតាមផ្លូវតុលាការ ហើយនៅពេលនេះជនសង្ស័យត្រូវបានដោះលែងឲ្យនៅក្រៅឃុំជាបណ្ដោះអាសន្ន»។
កាលពីថ្ងៃទី ៥ ខែ កក្កដា ឆ្នាំ ២០១៩ លោក ទេព ធីរិទ្ធ ត្រូវបានអង្គភាពប្រឆាំងអំពើពុករលួយ ឃាត់ខ្លួនដើម្បីសួរនាំ ពាក់ព័ន្ធនឹងអំពើពុករលួយ។ ទោះជាយ៉ាងណា រហូតមកទល់ថ្ងៃម្សិលមិញ លោក ឱម យិនទៀង ប្រធានអង្គភាពប្រឆាំងអំពើពុករលួយ នៅមិនទាន់ទម្លាយឲ្យដឹងអំពីព័ត៌មានលម្អិត ទាក់ទងនឹងអំពើពុករលួយ ដែលជនជាប់សង្ស័យឈ្មោះ ទេព ធីរិទ្ធ បានប្រព្រឹត្តនោះទេ។
អ្នកនាំពាក្យសាលាឧទ្ធរណ៍ និងមហាអយ្យការ បានគូសបញ្ជាក់ថា បុគ្គលឈ្មោះ ទេព ធីរិទ្ធ ជាអតីត ក្រឡាបញ្ជីសាលា ឧទ្ធរណ៍ ប៉ុន្តែឈ្មោះនេះត្រូវបានបញ្ឈប់ពីការងារតាំងពីថ្ងៃទី ២ ខែ មេសា ឆ្នាំ ២០១៩ មកម៉េ្លះ ដោយសារមិនទទួលយកការអប់រំណែនាំ ឬការកែតម្រូវនូវចំណុចអវិជ្ជមានរបស់ខ្លួន ពីថ្នាក់ដឹកនាំនៃសាលាឧទ្ធរណ៍។ ប្រភពដដែលបន្ថែមថា ទោះបីជាត្រូវបានបញ្ឈប់ពីការងារក៏ដោយ ក៏បុគ្គលរូបនេះ នៅតែឆ្លៀតយកតួនាទីជាក្រឡាបញ្ជី ទៅប្រព្រឹត្តអំពើខុសឆ្គង។
លោក ទូច ថារិទ្ធ អ្នកនាំពាក្យសាលាឧទ្ធរណ៍ បានប្រាប់ភ្នំពេញប៉ុស្តិ៍ថា កន្លងមកមានប្រជាពលរដ្ឋមួយចំនួន បានដាក់ពាក្យបណ្តឹង ប្ដឹងប្រឆាំងឈ្មោះ ទេព ធីរិទ្ធ មកអគ្គលេខាធិការដ្ឋានសាលាឧទ្ធរណ៍ដោយចោទប្រកាន់អតីតមន្ត្រីក្រឡាបញ្ជីរូបនេះថា បានយកលុយ ឬស៊ីដាច់លុយរបស់ពួកគេ។
លោកបញ្ជាក់ថា៖ «អតីតមន្ត្រីក្រឡាបញ្ជីរូបនោះ ធ្លាប់ត្រូវបានប្រជាពលរដ្ឋមួយចំនួនប្ដឹងចោទប្រកាន់ថា បានស៊ីដាច់លុយរបស់ពួកគេ ប៉ុន្តែក្នុងរឿងអ្វីឲ្យពិតប្រាកដនោះ ខ្ញុំមិនបានដឹងច្បាស់នោះទេ ព្រោះវាជារឿងបុគ្គល»៕