.jpg)
លោក គង់ បូរ៉ា ត្រូវបានតែងតាំងជាអនុរដ្ឋលេខាធិការក្រសួងមហាផ្ទៃ។ រូបថត សហការី
ភ្នំពេញៈ អតីតតំណាងរាស្ត្រមណ្ឌលខេត្តព្រៃវែងលោក គង់ បូរ៉ា ដែលស្ថិតក្នុងចំណោមអតីតមន្ត្រីជាន់ខ្ពស់ ១១៨ នាក់ របស់អតីតគណបក្សសង្គ្រោះជាតិ ដែលជាប់បម្រាមធ្វើនយោបាយរយៈពេល ៥ ឆ្នាំ ត្រូវបានតែងតាំងជាអនុរដ្ឋលេខាធិការក្រសួងមហាផ្ទៃបន្ទាប់ពីលោកបានចូលរួមរស់ជីវភាពនយោបាយជាមួយគណបក្សប្រជាជន។
ការតែងតាំងនេះកើតមានឡើង បន្ទាប់ពីលោក គង់ បូរ៉ា ត្រូវបានប្រកាសទទួលស្គាល់ជាផ្លូវការជាសមាជិកគណបក្សប្រជាជនកាលថ្ងៃទី ១០ ខែ តុលា ឆ្នាំ ២០១៩ នាទីស្នាក់ការគណបក្សប្រជាជនកម្ពុជារាជធានីភ្នំពេញក្រោមអធិបតីភាពលោក សក់ សេដ្ឋា សមាជិកគណៈកម្មាធិការកណ្តាលគណបក្សប្រជាជនកម្ពុជា។
បើយោងតាមព្រះរាជក្រឹត្យដែលចុះថ្ងៃទី ២៦ ខែ តុលា ឆ្នាំ ២០១៩ បានឲ្យដឹងថា លោក គង់ បូរ៉ា អតីតតំណាងរាស្ត្រ មណ្ឌលខេត្តព្រៃវែងរបស់អតីតគណបក្សសង្គ្រោះជាតិត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ចេញព្រះរាជក្រឹត្យ តែងតាំងជាអនុរដ្ឋលេខាធិការក្រសួងមហាផ្ទៃ បន្ទាប់ពីមានសំណើរបស់លោកនាយករដ្ឋមន្ត្រី ហ៊ុន សែន។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានថ្លែងថា លោករដ្ឋមន្ត្រីក្រសួងមហាផ្ទៃនឹងធ្វើការសម្រេចបែងចែកភារកិច្ចជូនលោក គង់ បូរ៉ា បន្ទាប់ពីលោកត្រូវបានតែងតាំង។
លោកបានបញ្ជាក់ថា៖ «លិខិតហ្នឹងគឺផ្លូវការហើយពិធីប្រកាសក្រសួងនឹងរៀបចំក្រោយទៀត។ គណបក្សណាក៏ដោយ ហើយអ្នកណាក៏ដោយ ដែលចង់ចូលគណបក្សប្រជាជន យើងស្វាគមន៍។ យើងមិនមានការរើសអើងដោយសារតែគោលការណ៍ គណបក្សប្រជាជនយើងបង្រួបបង្រួមកម្លាំងស្នេហាជាតិទាំងអស់ដោយមិនប្រកាន់ពណ៌សម្បុរ និងនិន្នាការនយោបាយ ហើយបើគាត់គ្រប់លក្ខណសម្បត្តិយើងបញ្ចូលគាត់»។
លោក គង់ បូរ៉ា បានថ្លែងអំណរគុណចំពោះព្រះមហាក្សត្រ នរោត្តម សីហមុនី ដែលចេញព្រះរាជក្រឹត្យតែងតាំងរូបលោក។
លោកថ្លែងថា៖ «ខ្ញុំមានសេចក្តីរីករាយបំផុត បន្ទាប់ពីទទួលបានការតែងតាំងជាអនុរដ្ឋលេខាធិការក្រសួងមហាផ្ទៃ។ មូលហេតុដោយសារតែខ្ញុំមិនចង់មានឈ្មោះនៅក្នុងគណបក្សសង្គ្រោះជាតិដែលបច្ចុប្បន្នគណបក្សនេះ ដែលជាពិសេសលោក សម រង្ស៊ី បានប្រើប្រាស់បដិវត្តន៍ពណ៌ដើម្បីបង្កភាពវឹកវរ និងចលាចលដូច្នេះហើយមានតែការចូលរួមជាមួយគណបក្សប្រជាជនដែលការពារជាតិ សាសនា និងព្រះមហាក្សត្រ»។
ប្អូនប្រុសលោក គង់ បូរ៉ា គឺលោក គង់ មុនីកា ដោយមានការជួយគាំទ្រពីលោក គង់ គាំ ជាឪពុករបស់លោកដែលជាអតីតមន្ត្រីជាន់ខ្ពស់គណបក្សសង្គ្រោះជាតិបានបង្កើតគណបក្សថ្មីមួយឈ្មោះគណបក្សឆន្ទៈខ្មែរ។
នៅពេលដែលសួរថា ហេតុអ្វីបានជាលោកមិនចូលរួមជាមួយគណបក្សប្អូនប្រុសរបស់លោក លោក បូរ៉ា ថ្លែងថា៖ «ខ្ញុំក៏ដូចជាប្រជាពលរដ្ឋខ្មែរទូទៅដែរ ចង់ចូលរួមជីវភាពនយោបាយជាមួយគណបក្សប្រជាជនគឺជាជម្រើស និងវប្បធម៌ថ្មីសម្រាប់គ្រួសារខ្ញុំ។ ខ្ញុំចង់ចូលរួមជាមួយកម្លាំងអ្នកស្នេហាជាតិ ដែលមាននៅក្នុងគណបក្សប្រជាជន។ យើងមិនមានទេ (ទំនាស់ជាមួយប្អូន) ដោយសារតែគ្រួសារខ្ញុំ តែងតែបើកទូលាយ ជាពិសេសលោកឪពុករបស់ខ្ញុំ។ មិនមានការគាបសង្កត់ណាមួយផ្នែកផ្លូវចិត្តនោះទេ»។
លោកបានបន្តថា៖ «ខ្ញុំបានពិនិត្យ និងយល់ច្បាស់ថា គណបក្សឆន្ទៈខ្មែររបស់គេមានស្រទាប់យុវជនជាច្រើន និងធនធានគ្រប់ខេត្ត និងរចនាសម្ព័ន្ធរបស់គេគ្រប់គ្រាន់។ និយាយរួមគេមានលទ្ធភាពនឹងប្រកួតប្រជែងក្នុងការបោះឆ្នោតជាមួយនឹងគណបក្សដទៃផ្សេងទៀត»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានស្វាគមន៍ការដែលលោក បូរ៉ា ត្រូវបានតែងតាំងជាអនុរដ្ឋលេខាធិការក្រសួងមហាផ្ទៃ។ លោកថ្លែងថា ការចាកចេញរបស់ បូរ៉ា អាចធ្វើឲ្យមន្ត្រី និងសកម្មជនអតីតគណបក្សសង្គ្រោះជាតិចោទប្រកាន់ថា លោក បូរ៉ា អាចលក់ខ្លួនទៅឲ្យគណបក្សប្រជាជន។
លោកបញ្ជាក់ថា៖ «នេះជាការសម្រេចចិត្តរបស់បុគ្គល ហើយប្រជាពលរដ្ឋជាអ្នកមើលឃើញថា ការដើរចេញរបស់លោក (បូរ៉ា) គឺជាការដើរចេញ ដើម្បីបម្រើផលប្រយោជន៍ប្រជាពលរដ្ឋ ឬផលប្រយោជន៍បុគ្គលផ្ទាល់ខ្លួន។ សម្រាប់ប្រទេស កម្ពុជា ដែលមិនទាន់មានលទ្ធិប្រជាធិបតេយ្យរឹងមាំ ហើយវាអាចឆ្លុះបញ្ចាំងបុគ្គលមួយមានជំហរមិនច្បាស់លាស់»៕
