ភ្នំពេញៈ អតីតនាយកអង្គការសុវណ្ណកុមារលោក សុធា អរុណ បដិសេធចំពោះការចោទប្រកាន់ថា លោកបានរំលោភបំពានធ្វើទារុណកម្មលើកុមារ យាយីផ្លូវភេទ និងក្លែងបន្លំប្រាក់អង្គការជាង ១ លានដុល្លារអាមេរិក ក្នុងពេលលោកនៅជានាយកអង្គការ។ លោកអះអាងថា ការចោទនេះគឺមានជននៅពីក្រោយខ្នងឃុបឃិតគ្នា ដើម្បីដណ្តើមអង្គការនេះ។
ការអះអាងបែបនេះបន្ទាប់ពីអង្គការ សុវណ្ណកុមារ (Sovann Komar) ដែលជាអង្គការក្រៅរដ្ឋាភិបាលអន្តរជាតិស្ថិតក្នុងភូមិផ្សារតាកុយ សង្កាត់វាលស្បូវ ខណ្ឌមានជ័យ រាជធានីភ្នំពេញបានដាក់ពាក្យប្តឹងលោក សុធា អរុណ និងអតីតបុគ្គលិកនៅអង្គការសុវណ្ណកុមារកាលពីខែតុលា ឆ្នាំ ២០១៩ ជុំវិញបទរំលោភបំពានលើកុមារធ្ងន់ធ្ងរ និងបទក្លែងបន្លំប្រាក់របស់អង្គការប្រមាណ ១,៤ លានដុល្លារ។
លោក សុធា អរុណ ប្រាប់ភ្នំពេញប៉ុស្តិ៍ថ្ងៃទី ៨ មិថុនា ថាលោកបានបង្កើតអង្គការជិត ២០ ឆ្នាំ ជាមួយសហស្ថាបនិកចំនួន ៣ នាក់ទៀតដែលជាជនជាតិបរទេសរស់នៅសហរដ្ឋអាមេរិក។
លោកបន្តថា អង្គការនេះបានដំណើរការដោយរលូន ដោយអាចចិញ្ចឹមកុមារកំព្រាប្រមាណ ១០០ នាក់ និងបុគ្គលិកចំនួន ៣០ នាក់ដោយចំណាយប្រាក់ប្រមាណ ៤ ម៉ឺនដុល្លារក្នុង ១ ខែ។ ប៉ុន្តែក្រោយមកអង្គការក៏ចាប់ផ្តើមមានបញ្ហារកាំរកូសផ្ទៃក្នុងរហូតមានការបណ្តេញបុគ្គលិកជិត ២០ នាក់ រួមទាំងលោកចេញពីអង្គការ បន្ទាប់ពីសហស្ថាបនិកម្នាក់ដែលជនជាតិអាមេរិកបានស្លាប់ទៅ។
លោកបញ្ជាក់ថា៖ «ដល់ពេលសហស្ថាបនិក ១ នាក់ស្លាប់ទៅនៅសល់តែខ្ញុំ ២ នាក់ប្អូនប្រុសរបស់គាត់។ ស្រាប់តែលេចចេញបុគ្គលម្នាក់ទៀតដែលមិនមែនជាប្អូនប្រុសហ្នឹងចេញមក គាត់ថាគាត់មកគ្រប់គ្រងអង្គការសុវណ្ណកុមារនេះបន្តពីខ្មោច។ ដល់ពេលអ៊ីចឹង យើងភាំងដែរ ប៉ុន្តែយើងទុកចិត្តខាងហ្នឹង ក៏បន្តធ្វើការជាមួយគ្នា។ ដល់ពេលឆ្នាំ ២០១៨ ហ្នឹង ក៏តម្រូវឲ្យខ្ញុំ ដូរមេធាវី ដែលធ្លាប់ការពារប្រមាណ ១៦ ឆ្នាំមកហើយ ក៏ដាក់មេធាវីថ្មីមក»។
លោកបន្តថា៖ «ដល់ពេលនេះមានរឿងរហូតមក គេចោទថាយើងកិបកេងលុយគេ អ៊ីចឹងហើយយើងបានស្នើសុំថា យើងគួរតែធ្វើសវនកម្មផ្ទៃក្នុងសិនទៅ។ ប៉ុន្តែភាគីផ្សេងទៀត មិនព្រមដោយយកតែសម្តីបុគ្គលិកម្នាក់ ២ នាក់ដែលមិនសប្បាយចិត្តនឹងថ្នាក់ដឹកនាំមកសំអាង។ គេចោទខ្ញុំថា ធ្វើឲ្យបាត់លុយរាប់លាន បាត់រាប់លានយ៉ាងម៉េច បើការចាយលុយលុះត្រាមានការយល់ព្រមពីសមាជិកដល់ទៅ ៣ នាក់»។
លោក Kara Heide សមាជិកក្រុមប្រឹក្សា សុវណ្ណកុមារ ដែលមកគ្រប់គ្រងអង្គការនេះថ្មី និងជាដើមបណ្តឹងនៃជម្លោះមិនអាចស្វែងរកប្រភពសុំអត្ថាធិប្បាយបានទេ។
លោក Bradley Gordon តំណាងផ្នែកច្បាប់របស់អង្គការសុវណ្ណកុមារ ប្រាប់ភ្នំពេញប៉ុស្តិ៍កាលពីថ្ងៃទី ៨ មិថុនាថា អង្គការមានភ័ស្តុតាងប្រឆាំងនឹងលោក សុធា អរុណ ដោយរួមមានទាំងរូបថត អ៊ីមែល របាយការណ៍ និងសក្ខីកម្មជាច្រើនពីសាក្សីចំពោះអំពើល្មើសរបស់គាត់។
លោកបន្តថា៖ «បណ្តឹងនេះឥឡូវស្ថិតនៅជាមួយចៅក្រមស៊ើបសួរ។ ក្នុងនាមកូនក្តី ខ្ញុំសូមស្នើទៅកាន់តុលាការឲ្យពន្លឿនរឿងក្តីនេះទៅមុខ និងស្វែងរកយុត្តិធម៌»។
លោក Bradley បន្ថែមថា រយៈពេល ៨ ខែចុងក្រោយនេះលោក សុធា ប៉ុនប៉ងបង្វែរយុត្តិធម៌ដោយបញ្ចុះបញ្ចូលមន្ត្រីជាន់ខ្ពស់រដ្ឋាភិបាលឱ្យជ្រៀតជ្រែកក្នុងនីតិវិធីរបស់តុលាការប្រឆាំងនឹងរូបលោក។ លោកក៏បានចោទមេធាវី សុវណ្ណកុមារបកវិញពីបទប្លន់ប្រដាប់អាវុធ និងដណ្តើមកាន់កាប់អង្គការសុវណ្ណកុមារថែមទៀតផង។
យុវជនកំព្រាឈ្មោះ ស៊ីអូ វ័យ ១៩ ឆ្នាំដែលត្រូវបានបណ្តេញចេញពីសាលាសុវណ្ណកុមារក្រោយតវ៉ាប្រាប់ពីថ្ងៃទី ៨ មិថុនា ថាបន្ទាប់ពីរកាំរកូសរហូតមានការបណ្តេញឪពុកម្តាយចិញ្ចឹមនៅមណ្ឌលកុមារកំព្រានេះមកធ្វើឲ្យប៉ះពាល់ដល់ការសិក្សារបស់ខ្លួន។ យុវជនរូបនេះបន្តថា នៅពេលមានការតវ៉ា ករណីនេះខ្លួនក៏ត្រូវបានបណ្តេញចេញ ខណៈកុមារកំព្រាដទៃទៀតក៏កំពុងរងសម្ពាធពីការគ្រប់គ្រងរបស់អ្នកដឹកនាំថ្មីផងដែរ។
ស៊ីអូ បន្តថា៖ «មួយរយៈក្រោយនេះគឺក្មេងៗនៅក្នុងអង្គការនេះគឺតាំងពីពេលប្រធានចាស់ និងម៉ាក់ប៉ាដែលត្រូវគេដកចេញហ្នឹង គឺចាប់ផ្តើមខូចចិត្តយ៉ាងខ្លាំង និងឈប់រៀនតែម្តងដូចមានបញ្ហាផ្លូវអារម្មណ៍ខ្លាំង។ ព្រោះមនុស្សយើង គ្រប់គ្នាត្រូវការគ្រួសារនៅជិតយើង ហើយយើងបានបែកគ្រួសារយើងម្តងរួចហើយ ដែលបានមករស់នៅជាមួយគ្នាតាំងពីតូចមកនៅទីនេះ ដល់ពេលនេះដូចឲ្យយើងនៅម្នាក់ឯងម្តងទៀត»។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា ប្រាប់ពីថ្ងៃទី ៨ មិថុនាថាករណីនេះក្រសួងធ្លាប់ធ្វើការសម្របសម្រួលហើយ។ ប៉ុន្តែមិនទទួលបានដំណោះស្រាយនោះទេ ខណៈភាគីទាំង ២ បានប្តឹងទៅតុលាការ ដែលជាហេតុនាំឲ្យផុតដែនសមត្ថកិច្ចរបស់ក្រសួង។
លោកថា៖ «រឿងចោទប្រកាន់នេះ ខ្ញុំមិនដឹងថា ពិតមិនពិតខ្ញុំមិនដឹងទេ ព្រោះខ្ញុំមិនអាចវាយតម្លៃថា ខាងណាខុសខាងណាត្រូវទេ អាស្រ័យលើតុលាការធ្វើការស្រាវជ្រាវទៅ ព្រោះពីមុនមកយើងបានអនុវត្តនីតិវិធីតាមធម្មតា ក្រោមការគ្រប់គ្រងរបស់អង្គការគឺក្រសួងតែងធ្វើការចុះត្រួតពិនិត្យ ហើយវាយតម្លៃ។ ប៉ុន្តែកន្លងមកយើងមិនឃើញមានបញ្ហាអ្វីទេហើយក្រោយមកក៏មានបាតុភាពទំនាស់ផ្ទៃក្នុងចោទប្រកាន់គ្នាចុះឡើង»៕