ភ្នំពេញៈ មេធាវីអតីតអ្នកកាសែតវិទ្យុអាស៊ីសេរី ២ នាក់ដែលត្រូវបានចោទប្រកាន់ពីបទ «ចារកម្ម» បានថ្លែងកាលពីព្រឹកថ្ងៃព្រហស្បតិ៍ម្សិលមិញថា ពួកគេត្រូវបានចោទមួយបទល្មើសបន្ថែមទៀតគឺពីបទផលិតរូបភាពអាសអាភាសដែលទំនងជាពាក់ព័ន្ធនឹងរូបថត ដែលត្រូវបានចែកចាយយ៉ាងទូលំទូលាយ ដែលបង្ហាញរូបម្នាក់ក្នុងចំណោមពួកគេក្នុងលក្ខណៈបែបសិចស៊ី។
លោក កែវ វាន់នី ដែលជាមេធាវីតំណាងឲ្យអតីតអ្នកកាសែតវិទ្យុអាស៊ីសេរី ២ នាក់លោក អ៊ួន ឈិន និងលោក យាង សូធារិន បានថ្លែងថាពួកគេត្រូវបានចោទប្រកាន់កាលពី ២ សប្តាហ៍មុនពីបទផលិតរូបភាពអាសអាភាសពាក់ព័ន្ធនឹងរូបថតដែលត្រូវបានចេញផ្សាយភ្លាមៗ បន្ទាប់ពីការចាប់ខ្លួនពួកគេ ដោយសារព័ត៌មានគាំទ្ររដ្ឋាភិបាលកាលពីខែវិច្ឆិកា។
រូបថតទាំងនោះបានបង្ហាញថា បុរសម្នាក់ដែលគេថាជាលោក ឈិន កំពុងធ្វើកាយវិការ និងថតលក្ខណៈបែបសិចស៊ី បើទោះបីជាបុរសម្នាក់ទៀតនៅក្នុងរូបថតមិនអាចត្រូវបានកំណត់អត្តសញ្ញាណច្បាស់លាស់ក្តី។ អ្នកទាំង ២ នេះត្រូវបានសួរកាលពីដើមខែនេះ ពាក់ព័ន្ធនឹងរូបថតនេះ។
លោក វាន់នី បានថ្លែងថា៖ «ខ្ញុំបានទទួលព័ត៌មានអំពីការចោទប្រកាន់នេះពីតុលាការកាលពីថ្ងៃពុធ»។ «តាមរយៈការពិភាក្សារបស់ខ្ញុំជាមួយពួកគេ ពួកគេបាននិយាយថាពួកគេមិនបានធ្វើទេ»។
លោក វាន់នី បានថ្លែងថាលោកមិនប្រាកដអំពីការចោទប្រកាន់ជាក់លាក់ ប៉ុន្តែថាវាអាចជាមាត្រា ៣៩ នៃច្បាប់ស្តីពីការបង្ក្រាបការជួញដូរមនុស្ស និងកេងប្រវ័ញ្ចផ្លូវភេទដែលអាចជាប់ពន្ធនាគាររហូតដល់ ១ ឆ្នាំពីបទផលិតរូបភាពអាសអាភាស។
កាលពីល្ងាចម្សិលមិញលោក វាន់នី បានថ្លែងថាលោកនៅមិនទាន់ប្រគល់ឲ្យនូវឯកសារសំណុំរឿងនៅឡើយទេដោយសារចៅក្រមស៊ើបសួរមិនទាន់ត្រូវបានចាត់តាំងនៅឡើយ ដូច្នេះលោកនៅមិនទាន់ប្រាកដអំពីសេចក្តីលម្អិតនៃសំណុំរឿងនេះនៅឡើយទេ។ លោកបានថ្លែងបន្តថា៖ «យើងបានដាក់ពាក្យសុំឯកសារ ប៉ុន្តែត្រូវបានច្រានចោលដោយរដ្ឋបាលរបស់តុលាការ»។
លោក សូធារិន និងលោក ឈិន កំពុងប្រឈមមុខនឹងការចោទប្រកាន់ពីបទ «ចារកម្ម» បន្ទាប់ពីត្រូវបានចោទប្រកាន់ថា ប៉ុនប៉ងបន្តរាយការណ៍ព័ត៌មានទៅវិទ្យុអាស៊ីសេរីដែលមានមូលដ្ឋាននៅអាមេរិក បន្ទាប់ពីវិទ្យុនេះបានបិទប្រតិបត្តិការរបស់ខ្លួននៅក្នុងប្រទេសកម្ពុជានៅចំពេលមានការបង្ក្រាបពីរដ្ឋាភិបាលទៅលើប្រព័ន្ធផ្សព្វផ្សាយឯករាជ្យ។
ប្រសិនបើត្រូវបានកាត់ទោសពួកគេអាចប្រឈមនឹងការជាប់ពន្ធនាគារពី ៧ ទៅ ១៥ ឆ្នាំ។
អ្នកនាំពាក្យតុលាការលោក អ៊ី រិន គ្រាន់តែបញ្ជាក់ថាចៅក្រមស៊ើបសួរកំពុងពិនិត្យមើលសំណុំរឿងនេះ ប៉ុន្តែបានបដិសេធផ្តល់សេចក្តីលម្អិតអំពីការចោទប្រកាន់ជាក់លាក់ ឬឈ្មោះព្រះរាជអាជ្ញាដែលកាន់សំណុំរឿងនេះ។
សមាជិកម្នាក់របស់គ្រួសារលោក ឈិន ដែលសុំមិនបញ្ចេញឈ្មោះបានថ្លែងថា បទចោទប្រកាន់ទាំងនេះគឺត្រូវបានរៀបចំឡើង ហើយថាការស៊ើបអង្កេតទាំងមូល រួមទាំងការចោទប្រកាន់ពីបទចារកម្មរហូតមកដល់ពេលនេះមិនមានភ័ស្តុតាងដាក់បន្ទុកទេ។
សមាជិករូបនេះបានបន្តថា៖ «វាអស់រយៈពេលជាង ៤ ខែហើយ ពួកគេមិនទាន់រកឃើញឯកសារ ឬភ័ស្តុតាងណាមួយបង្ហាញពីកំហុសរបស់ពួកគេទេ ប៉ុន្តែឥឡូវនេះវាលេចឡើងនូវបទចោទប្រកាន់មួយទៀត»៕ PS