The Phnom Penh Post Search

Search form




Logo of Phnom Penh Post newspaper Phnom Penh Post - អតីត​បុគ្គលិក​សណ្ឋាគារ Victoria Angkor តវ៉ា​សុំ​ចូល​ធ្វើ​ការ​វិញ

អតីត​បុគ្គលិក​សណ្ឋាគារ Victoria Angkor តវ៉ា​សុំ​ចូល​ធ្វើ​ការ​វិញ

Content image - Phnom Penh Post
បុគ្គលិក​ធ្វើ​ការ​តវ៉ា​ នៅ​មុខ​សណ្ឋាគារ Victoria Angkor Resort and Spa នៅ​ខេត្ត​សៀមរាប​កាលពី​ដើម​ខែ​នេះ។ រូបថត សហការី

អតីត​បុគ្គលិក​សណ្ឋាគារ Victoria Angkor តវ៉ា​សុំ​ចូល​ធ្វើ​ការ​វិញ

សៀមរាប៖ បុគ្គលិក​ប្រហែល​ ៧០ នាក់​គ្រោង​ធ្វើ​ការ​តវ៉ា​ជា​ថ្មី​ម្តង​ទៀត​នៅ​ថ្ងៃ​នេះ​ នៅ​មុខ​សណ្ឋាគារ Victoria Angkor Resort and Spa នៅ​ខេត្ត​សៀមរាប បន្ទាប់​ពី​ការ​ចរចា​ពុំ​ទទួល​បាន​ដំណោះ​ស្រាយ​។ នេះ​បើ​យោង​តាម​លោក ម៉ន រិទ្ធី ប្រធាន​សហព័ន្ធ​វិស័យ​ទេសចរណ៍​និង​សេវាកម្ម​កម្ពុជា​កាល​ពី​ម្សិល​មិញ។

បុគ្គលិក បាន​ធ្វើ​ការ​តវ៉ាឱ្យ​សណ្ឋាគារ​ទទួល​យក​កម្មករ​១៧ ​នាក់ ឲ្យ​ចូល​ធ្វើ​ការ​វិញ ដែល​ពួក​គេ​បាន​អះអាង​ថា ត្រូវ​បាន​​បញ្ឈប់​ទាំង​អយុតិ្តធម៌ កាល​ពី​​ខែកញ្ញា និង​ខែ​តុលា​ បន្ទាប់​​ពី​​មាន​ការ​បោះឆ្នោត​ជ្រើស​រើស​សហជីព ហើយ​បាន​ទាម​ទារ​ឲ្យ​បញ្ឈប់​អ្នក​គ្រប់​គ្រង​សណ្ឋាគារ ដែល​ពួកគេ​បន្ទោស​ថា ជា​អ្នក​បញ្ឈប់​កម្មករ​ទាំង​នោះ។

លោក រិទ្ធី បាន​ឱ្យ​ដឹង​ថា​ កាល​ពី​ខែ​មករា សណ្ឋាគារ​ក៏​ធ្លាប់​បាន​បញ្ឈប់​បុគ្គលិក ៦០ នាក់​រួច​មក​ហើយ​ដែរ។

លោក​បាន​បន្ថែម​ថា៖ ​«ការ​តវ៉ា [នៅ​ថ្ងៃ​អង្គារ​នេះ] គឺ​ដើម្បី​ទាមទារ​ឲ្យ​ម្ចាស់​សណ្ឋាគារ​ទទួល​យក​បុគ្គលិក​ ៦០ នាក់​ឲ្យ​ចូល​ធ្វើ​ការ​វិញ ក្រោយ​ពី​ពួក​គេ​ត្រូវ​បាន​បញ្ឈប់​ការ​ងារ​កាល​ពី​ខែ​មករា​ ដោយ​ទាម​ទារ​ឱ្យ [សណ្ឋាគារ] បើក​ប្រាក់​ឈ្នួល​ឲ្យ​ពួកគេ​ ចាប់​តាំង​ពី​ថ្ងៃ​ដែល​ពួក​គេ​ត្រូវ​បាន​គេ​បញ្ឈប់​ពី​ការ​ងារ​មក»។

លោក រិទ្ធី បាន​ឱ្យដឹ​ង​ទៀត​ថា ទោះបី​ជា​មាន​ការ​ចរចា​​ដោយ​មាន​ការ​ចូល​រួម​ពី​អាជ្ញាធរ​ខេត្ត​​ក៏​ដោយ ក៏​ប៉ុន្តែ​ពុំ​បាន​ឈាន​ដល់​ដំណោះ​ស្រាយ​ទេ។ លោក​ថា សណ្ឋាគារ​នេះ​បាន​​ប្រកាន់​ជំហរ​ថា​នឹង​ផ្តល់​​សំណង​ចំពោះ​ការ​បញ្ឈប់​ពី​ការងារ​ ប៉ុន្តែ​ក្រុម​អ្នកត​វ៉ា​ចង់​បាន​ទាំង​ការ​ងារ​របស់​​ខ្លួន​មក​វិញ​។

លោក កៅ ស៊ូផា មេធាវី​តំណាង​សណ្ឋាគារ បាន​ថ្លែង​ថា សណ្ឋាគារ​នឹង​មិន​ជួល​បុគ្គលិក​វិញ​ទេ។

លោក​បាន​បន្ថែម​ថា៖ «យើង​ពិត​ជា​ចង់​ដោះ​ស្រាយ​បញ្ហា​នេះ​ ប៉ុន្តែ​ក្រុម​អ្នក​តវ៉ា​តែង​តែ​បដិសេធ​អ្វី​ដែល​យើង​ផ្តល់​ឲ្យ។ អ្វីដែល​ពួកគេ​ចង់​បាន​គឺ​ឲ្យ​យក​បុគ្គលិក​​ទាំង ៧៧ នាក់​វិញ ​តែ​យើង​ពិត​ជា​មិន​អាច​ធ្វើ​បាន​ទេ»។

លោក ស៊ូផា បាន​បន្ថែម​ថា សណ្ឋាគារ​កំពុង​រង់ចាំ​ដំណឹង​ពី​តុលាការ​ទាក់​ទង​នឹង​បញ្ហា​នេះ៕

អត្ថបទគួរចាប់អារម្មណ៍