ភ្នំពេញៈ អតីតបុគ្គលិកក្រុមហ៊ុនប្រមូលសំរាម ស៊ីនទ្រី ជាង ១០០ នាក់ បានយល់ព្រមទទួលយកប្រាក់សំណង ៥០ ភាគរយ ដែលផ្តល់ឲ្យដោយសាលារាជធានីភ្នំពេញសិន ហើយបញ្ចប់ការតវ៉ាចាប់តាំងពីក្រុមហ៊ុនបញ្ឈប់ពួកគេពីការងារ ក្រោយពីក្រុមហ៊ុននេះត្រូវរដ្ឋាភិបាលដកសិទ្ធិប្រមូលសំរាម។
ការឈានដល់កិច្ចព្រមព្រៀងបញ្ចប់ការតវ៉ានេះបានធ្វើឡើងកាលពីរសៀលថ្ងៃទី ៣ ខែកុម្ភៈ បន្ទាប់ពីអតីតបុគ្គលិកក្រុមហ៊ុននេះបានបន្តការតវ៉ាជាថ្មី នៅមុខក្រុមហ៊ុនជាបន្តបន្ទាប់តាំងពីថ្ងៃទី ២៨ មករារហូតដល់មានការបិទផ្លូវព្រះមុនីវង្សជាច្រើនលើកច្រើនសា ដើម្បីទាមទារសំណងចំនួន ២ ចំណុចគឺប្រាក់សំណង ១០០ ភាគរយ និងផ្ទេរពួកគេទៅធ្វើការដូចដើមនៅរដ្ឋាករស្វយ័តរាជធានីភ្នំពេញ។
លោក ញ៉ ប៊ុនថា ជាតំណាងអតីតបុគ្គលិក ស៊ីនទ្រី ប្រាប់ភ្នំពេញប៉ុស្តិ៍ពីថ្ងៃពុធថា សាលារាជធានីភ្នំពេញបានសម្រេចផ្តល់កញ្ចប់ថវិកា ដើម្បីសងជំនួសក្រុមហ៊ុនស៊ីនទ្រីដល់អតីតបុគ្គលិកទាំង ១០៦ នាក់ ដោយម្នាក់ៗទទួលបានថវិកាអាស្រ័យទៅតាមអតីតភាពការងារ។ លោកបន្តថា តាមកិច្ចព្រមព្រៀងនេះគឺបុគ្គលិកទាំងអស់បានទទួលប្រាក់ចំនួន ៥០ ភាគរយក្នុងខែកុម្ភៈនេះ ហើយចំពោះប្រាក់សំណង ៥០ ភាគរយទៀតសាលារាជធានីភ្នំពេញបានសន្យាថានឹងបើកជូននៅខែបន្ទាប់។
លោកបញ្ជាក់ថា៖ «នៅពេលមានការដោះស្រាយអ៊ីចឹងទៅយើងទាំងអស់គ្នា សប្បាយចិត្ត ព្រោះកន្លងទៅយើងតវ៉ាគ្មានអ្នកណាអើពើសោះដែលធ្វើឲ្យយើងនៅតែបន្តការតវ៉ា ហើយចំពោះដំណោះស្រាយនេះខ្ញុំអរគុណអាជ្ញាធររាជធានីភ្នំពេញដែលជួយពួកយើង ព្រោះបើគ្មានការអន្តរាគមន៍ពីអាជ្ញាធរទេនឹងមិនទទួលបានដំណោះស្រាយនេះដែរ»។
ទោះយ៉ាងណាលោក ប៊ុនថា អះអាងថាបុគ្គលិកទាំងអស់នឹងរង់ចាំទទួលសំណងចំនួន ៥០ ភាគរយនៅខែក្រោយ និងការសន្យារបស់សាលារាជធានីភ្នំពេញដែលអះអាងថានឹងទទួលយកពួកលោកឲ្យចូលធ្វើការនៅរដ្ឋាករស្វយ័តនៅពេលស្ថាប័ននេះដំណើរការក្នុងពេលខាងមុខ។
លោកបន្តថា៖ «ក្នុងការទៅធ្វើការនៅរដ្ឋាករស្វយ័តនោះសាលារាជធានីបានសុំឲ្យពួកយើងរង់ចាំ ព្រោះតែរដ្ឋាករស្វយ័តនេះមិនទាន់ដំណើរការហើយឲ្យយើងចាំសិន។ លទ្ធផលយ៉ាងណាទៀត យើងមិនទាន់ដឹងទេ ប៉ុន្តែយើងត្រូវតែប្រកាន់ជំហរទាមទារប្រាក់ ៥០ ភាគរយបន្ថែមទៀត និងការរង់ចាំទៅធ្វើការនៅរដ្ឋាករស្វាយ័ត»។
លោក ម៉េត មាសភក្តី អ្នកនាំពាក្យសាលារាជធានីប្រាប់ភ្នំពេញប៉ុស្តិ៍ពីថ្ងៃពុធថា ដើម្បីបញ្ចប់ការតវ៉ារបស់អតីតបុគ្គលិកស៊ីនទ្រីសាលារាជធានីបានផ្ដល់ជូនប្រាក់សំណងបញ្ចប់ការងារដល់ពួកគេជំនួសក្រុមហ៊ុនស៊ីនទ្រីជាបណ្តោះអាសន្ន។ ប៉ុន្តែលោកមិនបានបញ្ជាក់ទេថា ចំនួនទឹកប្រាក់សរុបដែលផ្តល់ជូនបុគ្គលិក ស៊ីនទ្រី មានចំនួនប៉ុន្មាននោះទេ ដោយគ្រាន់តែអះអាងថា បុគ្គលិកទាំងអស់ពេញចិត្តចំពោះដំណោះស្រាយទាំងនេះ។
លោកបញ្ជាក់ថា៖ «បញ្ហាទំនាស់បុគ្គលិកក្រុមហ៊ុន ស៊ីន ទ្រី ១០៦ នាក់ត្រូវបានដោះស្រាយបញ្ចប់ហើយ ដូចជាមិនមានអ្វីចោទជាបញ្ហានោះទេ។ ពួកគាត់ បងប្អូនទាំងអស់ជាង ១០០ នាក់គាត់ពេញចិត្តនឹងទទួលយកបានដំណោះស្រាយនេះ»។
លោក មឿន តុលា នាយកប្រតិបត្តិសម្ព័ន្ធភាពការងារ និងសិទ្ធិមនុស្សបានសាទរចំពោះដំណោះស្រាយទាំងនេះ ប៉ុន្តែលោកមិនច្បាស់ថា សាលារាជធានីពិតជាបានទូទាត់ប្រាក់សំណងដល់បុគ្គលិកទាំងនោះ ត្រឹមត្រូវទៅតាមច្បាប់ឬយ៉ាងណា? ចំពោះការទូទាត់ប្រាក់សំណងជូនកម្មករជាពីរដំណាក់កាលនេះ បើយោងតាមច្បាប់គឺមិនត្រឹមត្រូវទេ។
លោក តុលា បានបញ្ជាក់ថា៖ «បើបុគ្គលិកទាំងអស់ព្រមដូច្នេះ វាជារឿងមួយប៉ុន្តែបើតាមផ្លូវច្បាប់គឺមិនត្រូវទេព្រោះកាលណាបញ្ឈប់គេគឺត្រូវទូទាត់លុយទាំងអស់នេះក្នុងរយៈពេល ៤៨ ម៉ោងមិនមែនទុករាប់ខែអ៊ីចឹងទេ។ គ្រាន់តែថា សិទ្ធិរបស់បុគ្គលិក ហើយគាត់មានសិទ្ធិទាមទាររហូតដល់ ៣ ឆ្នាំឯណោះដែលពួកគាត់នៅតែអាចទាមទារបន្តទៀតបាន»។
ការតវ៉ារបស់អតីតបុគ្គលិកក្រុមហ៊ុនស៊ីនទ្រីជាង ១០០ នាក់បានធ្វើឡើងបន្ទាប់ពីក្រុមហ៊ុនប្រកាសបញ្ឈប់ពួកគាត់កាលពីថ្ងៃទី ៣០ ខែធ្នូ ឆ្នាំ ២០១៩ ក្រោយពីក្រុមហ៊ុននេះត្រូវបានរដ្ឋាភិបាលដកហូតសិទ្ធិប្រមូលសំរាមក្នុងរាជធានីភ្នំពេញ ដើម្បីប្រគល់ជូនសាលារាជធានីជាអ្នកគ្រប់គ្រងការប្រមូលសំរាមបណ្ដោះអាសន្ន៕