ភ្នំពេញៈ សាលាដំបូងរាជធានីភ្នំពេញបានសម្រេចផ្តន្ទាទោសលោក នួន ប៉ុក អតីតប្រធានមន្ទីររៀបចំដែនដី នគរូបនីយកម្ម និងសំណង់ខេត្តព្រះសីហនុ ដាក់ពន្ធនាគារ ៧ ឆ្នាំ ពិន័យជាប្រាក់ចូលថវិការដ្ឋ ១០០ លានរៀល និងរឹបអូសដីចំនួន ៣ កន្លែង របស់លោកមកធ្វើជាសម្បត្តិរដ្ឋវិញ។
លោក នួន ប៉ុក ត្រូវបានអង្គភាពប្រឆាំងអំពើពុករលួយឃាត់ខ្លួនពីថ្ងៃទី ១ ខែមីនា នៅផ្ទះរបស់លោកស្ថិតក្នុងខេត្តព្រះសីហនុ និងបានបញ្ជូនទៅតុលាការកាលពីថ្ងៃ ៤ មីនា ២០២០។
លោក គុជ គឹមឡុង ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញប្រាប់ភ្នំពេញ-ប៉ុស្តិ៍ពីម្សិលមិញថា តុលាការបានសម្រេចផ្តន្ទាទោសលើលោក នួន ប៉ុក កាលពីថ្ងៃទី ១៧ វិច្ឆិកា លើបទចោទចំនួន ៣ ករណីគឺបទរំលោភអំណាច បទបំពានធនធានធម្មជាតិ និងបទផ្តល់ និងប្រើប្រាស់ឯកសារក្លែងដោយអាជ្ញាធរ។
លោកបញ្ជាក់ថា៖ «សាលក្រមនេះបានទុកសិទ្ធិឱ្យជនជាប់ចោទប្តឹងឧទ្ធរណ៍តាមការកំណត់ដោយច្បាប់ក្នុងករណីកើតទុក្ខមិនសុខចិត្តនឹងសេចក្តីសម្រេចនេះ»។
លោក នួន ប៉ុក អាយុ ៤៥ ឆ្នាំបានកាន់តំណែងជាប្រធានមន្ទីរដែនដីខេត្តព្រះសីហនុចាប់ពីឆ្នាំ ២០១៦ ដល់ឆ្នាំ ២០១៨។
បើតាមលិខិតបំភ្លឺរបស់អង្គភាពប្រឆាំងអំពើពុករលួយ ការចាប់ខ្លួនអតីតប្រធានមន្ទីររូបនេះ ធ្វើឡើងបន្ទាប់ពីស្ថាប័ននេះបានទទួលពាក្យបណ្តឹងពីជនរងគ្រោះដែលបានចោទលោក នួន ប៉ុក ថា បានយកកម្រៃសេវាក្រៅច្បាប់ ពីការធ្វើបណ្ណដីក្នុង ១ ប្លង់តម្លៃ ១ ៦០០ ដុល្លារ និងការកាត់ឈ្មោះផ្ទេរកម្មសិទ្ធិ ក្នុង ១ ប្លង់តម្លៃ ១ ០០០ ដុល្លារ។
បន្ថែមពីនេះលោក ប៉ុក ក៏ត្រូវបានចោទប្រកាន់ថា ទទួលបានតំណែងជាប្រធានមន្ទីររៀបចំដែនដីដោយការសូកប៉ាន់ ហើយក្នុងអំឡុងពេលកាន់តំណែងលោកបានស្នើដកតំណែងមន្ត្រីក្រោមឱវាទដោយមិនមានមូលហេតុច្បាស់លាស់ផងដែរ។ ប៉ុន្តែតាមការឆ្លើយបំភ្លឺជាមួយអង្គភាពប្រឆាំងអំពើពុករលួយ លោក នួន ប៉ុក បានបដិសេធរាល់ការចោទប្រកាន់ខាងលើនេះទាំងអស់។
លោក ស៊ឹង សែនករុណា អ្នកនាំពាក្យសមាគមអាដហុកបានសាទរចំពោះចំណាត់ការរបស់តុលាការទៅមន្ត្រីពុករលួយរូបនេះ។ លោកចង់ឃើញមានចំណាត់ការបន្ថែមទៀតទៅលើមន្ត្រីពុករលួយដទៃទៀត ដែលមានបានដោយអំពើខុសច្បាប់ និងខុសប្រក្រតីដែលទទួលរងការរិះគន់ពីសំណាក់ប្រជាពលរដ្ឋ។
លោកបន្តថា ជាការពិតបើក្នុងករណីដែលមានការចាត់វិធានការទៅលើមន្ត្រីពុករលួយទាំងនោះកាន់តែច្រើននោះនឹងធ្វើឱ្យប្រជាពលរដ្ឋមានការពេញចិត្ត ហើយវាក៏នាំឱ្យទ្រព្យសម្បត្តិរបស់រដ្ឋរក្សាបានត្រឹមត្រូវ មិនមានការរំលោភបំពានពីសំណាក់មន្ត្រី ឬជនខិលខូចព្រោះតែមន្ត្រីទាំងនោះ មានការខ្លាចរអា លែងហ៊ានប្រព្រឹត្តនូវអំពើពុករលួយបន្តទៀត។
លោកបញ្ជាក់ថា៖ «គួរតែមានការស៊ើបអង្កេត និងស្រាវជ្រាវ ហើយចាត់វិធានការឱ្យបានត្រឹមត្រូវថែមទៀត ព្រោះនេះគឺជាការងារមួយដែលខាងពលរដ្ឋ និងខាងសង្គមស៊ីវិល ចង់ឃើញការអនុវត្តបែបហ្នឹង»។ បើតាមលោក ករុណា ចំណាត់ការលើអតីតមន្ត្រីរូបនេះក៏អាចជាផ្នែកមួយនៃការអនុវត្តច្បាប់ផងដែរ ព្រោះវាជាការពង្រឹងគុណភាពសេវាកម្មរបស់រដ្ឋឱ្យបានល្អត្រឹមត្រូវឡើងវិញ និងបង្កើនជំនឿចិត្តពីសាធារណជនឱ្យមានជំនឿចិត្តលើការអនុវត្តច្បាប់របស់មន្ត្រីរដ្ឋាភិបាល។
កាលពីថ្ងៃទី ២៧ ខែកុម្ភៈ សាលាដំបូងរាជធានីភ្នំពេញក៏បានសម្រេចផ្ដន្ទាទោសលោក លឿម ប៊ុនរឿន អតីតប្រធានមន្ទីរដែនដីខេត្តពោធិ៍សាត់ រួមទាំងអនុប្រធានមន្ទីរ និងមន្ត្រីមន្ទីរម្នាក់ទៀតពីបទសម្អាតប្រាក់ រំលោភអំណាច និងវីតិក្រមដោយដាក់ពន្ធនាគារចំនួន ៨ ឆ្នាំផងដែរ។ អតីតមន្ត្រីមន្ទីរដែនដីទាំង ៣ នាក់ ត្រូវបានចាប់ខ្លួនដោយអង្គភាពប្រឆាំងអំពើពុករលួយនៅខេត្តពោធិ៍សាត់កាលពីខែកក្កដា ឆ្នាំ ២០១៩៕