ភ្នំពេញៈ លោក លៀម ប៊ុនរឿន អតីតប្រធានមន្ទីរសុរិយោដីខេត្តពោធិ៍សាត់នៅថ្ងៃទី ២១ តុលា នេះ បានសុំឱ្យតុលាការកំពូលបន្ថយទោសបន្ទាប់ពីសាលាឧទ្ធរណ៍រក្សាទោស៨ឆ្នាំតាមអំណាចសាលក្រមសាលាដំបូងរាជធានីភ្នំពេញ ពាក់ព័ន្ធនឹងសំណុំរឿងកិបកេងលុយខុសច្បាប់ជាង ២៧ ម៉ឺនដុល្លារ ប្រព្រឹត្តអំឡុងពេលកាន់តំណែងចន្លោះឆ្នាំ ២០១៦-២០១៨។
នៅក្នុងបន្ទប់សវនាការនៃតុលាការកំពូលនៅថ្ងៃនេះ ជនជាប់ចោទឈ្មោះ លៀម ប៊ុនរឿន បានឆ្លើយប្រាប់ចៅក្រមលោក យូ យុត្ថារ៉ា ថា លោកធ្លាប់ជាអនុប្រធានមន្ទីរសុរិយោដីខេត្តបន្ទាមានជ័យមុនឆ្នាំ ២០១៦។ លុះដល់ឆ្នាំ ២០១៦ លោកក៏បានផ្លាស់មកទទួលតំណែងជាប្រធានមន្ទីរសុរិយោដីខេត្តពោធិ៍សាត់ រហូតដល់ឆ្នាំ ២០១៩។
ក្នុងអំឡុងកាន់តំណែងបានជាង ៣ ឆ្នាំ លោកទទួលបានប្រាក់សេវាពីប្រភពផ្សេងៗជាកញ្ចប់ប្រមាណ ២៧ ម៉ឺនដុល្លារ ប៉ុន្តែប្រាក់នេះ លោកបានចំណាយលើការចុះបេសកម្មតាមមូលដ្ឋាននិងប្រាក់មួយផ្នែកទៀតចំណាយលើការងារគណបក្ស។
លោកបញ្ជាក់ថា៖ «ខ្ញុំទទួលស្គាល់ថានៅចន្លោះពេលដែលខ្ញុំកាន់តំណែងនៅខេត្តពោធិ៍សាត់ខ្ញុំរកលុយក្រៅបានក្នុងចន្លោះពី ៧ ទៅ ៨ ម៉ឺនដុល្លារទេ។ ចំពោះថាប្រាក់លើសពីនេះគឺគ្មានទេ»។
ជនជាប់ចោទរូបនេះបន្តថា កាលនៅជាអនុប្រធានមន្ទីរសុរិយោដីនៅខេត្តបន្ទាយមានជ័យ គឺលោកបានទិញផ្ទះបង់រំលស់នៅបុរីប៉េងហួតក្នុងតម្លៃជាង ១៧ ម៉ឺនដុល្លារ ហើយបានបង់រំលស់ចប់ និងទទួលយកប្លង់ផ្ទះមកកាន់កាប់ក្នុងឆ្នាំ ២០១៨។ ក្រៅពីនេះគាត់មានរថយន្តផ្ទាល់ខ្លួនម៉ាកឡង់គ្រីស័រ ១ គ្រឿង និងរថយន្តម៉ាក KIA ១ គ្រឿងទៀត ជាកម្មសិទ្ធិរបស់ភរិយា និងដីផ្ទះនៅក្រុងពោធិ៍សាត់ ១ កន្លែងទៀត។ នៅថ្ងៃសមត្ថកិច្ចចាប់ខ្លួន គឺលោកបានយករថយន្តភរិយាជិះ ប៉ុន្តែសមត្ថកិច្ចយល់ថារថយន្តនោះជាកម្មសិទ្ធិរបស់លោកហើយក៏បានរឹបអូសយក។
លោកបញ្ជាក់ប្រាប់ចៅក្រមថា៖ «សូមតុលាការផ្តល់ផ្ទះនៅបុរីប៉េងហួត និងរថយន្តម៉ាក KIA ឲ្យប្រពន្ធខ្ញុំវិញផង។ ខ្ញុំមានជំងឺទឹកនោមផ្អែម និងជំងឺបេះដូង ដូច្នេះសូមបន្ថយទោសដល់ខ្ញុំ ដើម្បីឆាប់បានចេញទៅរកស៊ីចិញ្ចឹមកូនតូចៗ ៣ នាក់ និងលុបចោលសំណង»។
លោក ជុំ សំបាន តំណាងមហាអយ្យការបានសន្និដ្ឋានថាតាមដែលលោកបានសិក្សាលើសំណុំរឿងនេះឃើញថាការសម្រេចសេចក្ដីរបស់សាលាឧទ្ធរណ៍ដែលតម្កល់សាលក្រមតាមសាលាដំបូងរាជធានីភ្នំពេញដាក់ពន្ធនាគារលើជនជាប់ចោទ៨ឆ្នាំនោះគឺជាការត្រឹមត្រូវតាមច្បាប់ហើយ។
លោកថ្លែងថា៖«ខ្ញុំយល់ថាតុលាការថ្នាក់ក្រោមទាំង ២ ថ្នាក់សម្រេចសេចក្តីត្រឹមត្រូវ។ ដូច្នេះសូមក្រុមប្រឹក្សាជំនុំជម្រះពិចារណាតាមច្បាប់»។
ទោះយ៉ាងណា លោក នូ ចន្ថា ជាមេធាវីការពារសិទ្ធិឲ្យជនជាប់ចោទក៏ធ្វើសេចក្តីសន្និដ្ឋានដែរថាមូលហេតុដែលកូនក្តីលោកប្តឹងសារទុក្ខមកតុលាការកំពូលគឺដោយសារគាត់មិនសុខចិត្តនឹងទណ្ឌកម្មទោសធ្ងន់ពេក។ ម៉្យាងទៀតពាក់ព័ន្ធនឹងទ្រព្យសម្បត្តិផងដែរ។ ចំពោះផ្ទះនៅបុរីប៉េងហួតនិងរថយន្តម៉ាក KIA គឺជាកេរដែលកូនក្តីលោករកបានមុនចូលកាន់តំណែងនៅខេត្តពោធិ៍សាត់ទៅទៀត។
លោកមេធាវីបន្តថា ម៉្យាងទៀតតុលាការគួរពិចារណាផងដែរព្រោះកូនក្តីលោកបានបម្រើជាតិតាំងពីឆ្នាំ ១៩៨០ មកម្ល៉េះ ហើយកូនក្តីលោកគួរតែទទួលបានការយោគយល់ពីតុលាការអំពីគុណសម្បត្តិបម្រើជាតិនេះ។
លោកថ្លែងថា៖ «កូនក្តីខ្ញុំសុំបន្ថយទោសសុំឲ្យតុលាការប្រគល់ទ្រព្យសម្បត្តិខ្លះមកវិញ និងសុំលុបចោលសំណងពិន័យ។ សូមតុលាការពិចារណាទ្រព្យដែលពាក់ព័ន្ធនឹងបទល្មើស និងបង្វិលសំណុំរឿងទៅឧទ្ធរណ៍វិញ»។
តាមកំណត់ហេតុតុលាការកំពូលបង្ហាញថាជនជាប់ចោទត្រូវសមត្ថកិច្ចឃាត់ខ្លួនកាលពីថ្ងៃទី ២៧ ខែ កក្កដា ឆ្នាំ ២០១៩ តាមបណ្តឹងរបស់ជនរងគ្រោះម្នាក់ពាក់ព័ន្ធករណីទារប្រាក់ខុសច្បាប់ចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់ទីតាំងក្រុមហ៊ុន។
បើតាមកំណត់ហេតុដដែល ជនជាប់ចោទឈ្មោះ លៀម ប៊ុនរឿន មានផ្ទះនៅបុរីប៉េងហួតប៉ុស្តិ៍វិទ្យុស្ទឹងមានជ័យរាជធានីភ្នំពេញចំនួន ១ ផ្ទះនៅខេត្តពោធិ៍សាត់ចំនួន ២ និងមានរថយន្ត ២ គ្រឿង ដោយ ១ គ្រឿងម៉ាក Lexus 570 ពណ៌មាសស៊េរីឆ្នាំ ២០១០ និងរថយន្ត ១ គ្រឿងទៀតម៉ាក KIA Morning ពណ៌ស សេរីឆ្នាំ ២០១២។
ក្នុងសំណុំរឿងនេះ លោក លៀម ប៊ុនរឿន ត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២៧ ខែ កុម្ភៈ ឆ្នាំ ២០២០ ផ្តន្ទាទោសដាក់ពន្ធនាគារ ៨ ឆ្នាំ ចោទពីបទវិតិក្រម បទរំលោភអំណាច និងបទសម្អាតប្រាក់ និងពិន័យប្រាក់ចំនួន ៨ លានរៀលចូលថវិការដ្ឋ។
យ៉ាណាក្ដី ក្រោយពីសវនាការនៅតុលាការកំពូល លោកប្រធានក្រុមប្រឹក្សាជំនុំជម្រះ យូ យុត្ថារ៉ា ថ្លែងថា សាលដីកាសំណុំរឿងនេះនឹងប្រកាសនៅថ្ងៃទី ២៨ តុលា ខាងមុខ៕