.jpg)
លោក សន សំនៀង ត្រូវបានកងរាជអាវុធហត្ថខេត្តកំពង់ធំ ឃាត់ខ្លួនកាលពីថ្ងៃទី ១៥ ខែកក្កដា ឆ្នាំ ២០១៨។ រូបថត ហ្វេសប៊ុក
កំពង់ធំៈ អ្នកនាំពាក្យកងរាជអាវុធហត្ថលើផ្ទៃប្រទេស បានប្រកាស កាលពីម្សិលមិញថា កងរាជអាវុធហត្ថ បានឃាត់ខ្លួនអតីតមន្ត្រីកងរាជអាវុធហត្ថរងស្រុកបារាយណ៍ម្នាក់ ឈ្មោះ សន សំនៀង ក្នុងករណីផ្សាយព័ត៌មានមិនពិត ដែលធ្វើឲ្យប៉ះពាល់ដល់កិត្តិយសអាវុធហត្ថខេត្តកំពង់ធំ។
ការឃាត់ខ្លួននេះ ធ្វើឡើងក្រោយពេលអតីតមន្ត្រីកងរាជអាវុធហត្ថរូបនេះ បានបង្ហោះព័ត៌មានតាមហ្វេសហ៊ុកឈ្មោះ«យមរាជ លោកិយ៍» រៀបរាប់អំពីអ្វីដែលខ្លួនអះអាងថា ជាភាពអយុត្តិធម៌របស់ខ្លួន ក្នុងការបំពេញការងារ និងរហូតដល់មានការដកតួនាទី។ ឈ្មោះ សន សំនៀង បានលើកឡើងពីករណីខ្លួនចាប់ឡានដឹកកញ្ឆាក្រៀម ១៧២ គីឡូក្រាម និងឡានដឹកឈើគ្រញូង និងបកស្រាយករណីបណ្ដឹងមួយចំនួនទៀត ដែលលោកត្រូវបានប្តឹង។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានប្រកាសកាលពីម្សិលមិញថា៖«បុគ្គលឈ្មោះសន សំនៀង នេះ ត្រូវបានឃាត់ខ្លួន នៅល្ងាចថ្ងៃទី ១៥ ខែកក្កដា ឆ្នាំ២០១៨ ដោយកងរាជអាវុធហត្ថខេត្តកំពង់ធំ មានការដឹកនាំនិងសម្របសម្រួល ដោយតំណាងអយ្យការអមសាលាដំបូងខេត្តកំពង់ធំ។ ខណៈនេះ មន្ត្រីនគរបាលយុត្តិធម៌នៃកងរាជអាវុធហត្ថខេត្តកំពង់ធំ កំពុងធ្វើការស្តាប់ចម្លើយនិងបន្តនីតិវិធី»។
លោក អេង ហ៊ី ថ្លែងថា ឈ្មោះសន សំនៀង ត្រូវបានលុបឈ្មោះចេញពីក្របខ័ណ្ឌកងរាជអាវុធហត្ថលើផ្ទៃប្រទេសកាលពីឆ្នាំ ២០១៧ ដោយឈ្មោះនេះ បានប្រព្រឹត្តខុសជាបន្តបន្ទាប់ រួមមានការបង្កគ្រោះថ្នាក់ ធ្វើឲ្យមានមនុស្សស្លាប់ និងការបាញ់បោះសេរី ជាដើម។
ទោះជាយ៉ាងណា មុនពេលចាប់ខ្លួន ឈ្មោះសន សំនៀង បានផ្សាយផ្ទាល់តាមហ្វេសប៊ុកជាច្រើនដង ពន្យល់អំពីដំណើរការដែលឈានដល់ការចាប់ខ្លួននេះ ដោយលោកបដិសេធការចោទប្រកាន់នានា របស់អាវុធហត្ថ។ លោកបានអះអាងថា លោកបានចូលធ្វើជាអាវុធហត្ថ នៅស្រុកបារាយណ៍ ដោយការទិញឈ្មោះគេ។
តាមឯកសារដែលលោកបង្ហោះ កាលពីឆ្នាំ២០១៣ បញ្ជាក់ថា លោកបានទទួលបញ្ជាទៅបង្ក្រាបគ្រឿងញៀនមួយករណី ដោយឃាត់ឡានកាម៉ារីគូថស្វិតដឹកអេតចាយ និងបង្កប់កញ្ឆាក្រៀម ១៧២ គីឡូក្រាម។ ប៉ុន្តែក្នុងប្រតិបត្តិការនេះ ម្ចាស់ឡាន ត្រូវបានមនុស្សពីរនាក់ចាប់យកទៅបង្ខាំងទុក ដើម្បីទារប្រាក់។
ក្នុងករណីនេះ ឈ្មោះ សន សំនៀង ត្រូវបានចោទប្រកាន់ថា ជាអ្នកចាប់ជំរិតទារប្រាក់ ប៉ុន្តែក្រោយមក តុលាការបានសម្រេចទម្លាក់បទចោទក្រោយពេលរកឃើញថា ឈ្មោះនេះ មិនពាក់ព័ន្ធ។ នៅក្នុងឆ្នាំ ២០១៣ ដែរ សំនៀង បានឃាត់ឡានដឹកឈើគ្រញូងមួយគ្រឿង ដោយឃាត់បានឈើគ្រញូងខុសច្បាប់ចំនួន ៩០ ដុំ។
លោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ បានថ្លែងថា៖ «រឿងនេះ មិនមែនបរិហារកេរ្តិ៍តែមួយមុខទេ នេះចូលញុះញង់បំបែកបំបាក់។ យើងឃាត់ខ្លួនគាត់បណ្តោះអាសន្នសិន ដើម្បីសួរនាំគាត់ ថាតើហេតុអីគាត់ចេះតែឡាយផ្តេសផ្តាស តើមានដឹងថា ប៉ះពាល់ដល់គេដែរឬទេ»។
លោកថ្លែងបន្តថា៖«នៅពេលដែលគេស្តាប់ទៅ មើលទៅ វាអាក្រក់ស្តាប់។ មនុស្សដែលខំធ្វើការបែរទៅជាអស់បុណ្យអស់ស័ក្តិអស់តួនាទី…វាអយុតិ្តធម៌សម្រាប់ខ្ញុំជាមេអង្គភាពដែរ។ អ្នកឯកស្រែករកយុត្តិធម៌ដូច្នេះ ខ្ញុំក៏ទាមទាររកយុត្តិធម៌វិញដែរដូចជារឿងគ្រឿងញៀន តើគ្រឿងញៀន ១៧២ គីឡូពីណា វាគឺជាកញ្ឆាទេ។ ចាប់គេហើយដាក់ខ្នោះ និងច្រវាក់គេដើម្បីទារលុយគេ និងវាបានលាក់នៅផ្ទះវា។ ហេតុអ្វីក៏វាមិននិយាយ»។
ករណីឈើគ្រញូង លោក ហង្ស ថុល ថ្លែងថា ក្រោយពេលចាប់បានហើយ ឈ្មោះ សន សំនៀង បានយកទៅទុកនៅផ្ទះម្តាយរបស់គេ ដោយមិនយកទៅអង្គភាព។
លោកអះអាងថា គិតត្រឹមថ្ងៃម្សិលមិញ មិនទាន់មានការចោទប្រកាន់ដោយតុលាការនៅឡើយទេ៕
