ភ្នំពេញៈ អតីតអនុប្រធាននាយកដ្ឋានព្រហ្មទណ្ឌក្រសួងមហាផ្ទៃឈ្មោះ ឌួង ណាគ្រី ត្រូវបានតុលាការសម្រេចដាក់ពន្ធនាគារ ១០ ឆ្នាំក្នុងបទចោទ ២ ករណី «ប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត»។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញប្រាប់ពីម្សិលមិញថា ករណី អតីតអនុប្រធាននាយកដ្ឋានព្រហ្មទណ្ឌ ឈ្មោះ ឌួង ណាគ្រី ដែលត្រូវចៅក្រមនៃសាលាដំបូងរាជធានីភ្នំពេញកោះហៅឡើងជំនុំជម្រះកាលពីចុងខែធ្នូត្រូវបានតុលាការប្រកាសសាលក្រមកាលពីថ្ងៃទី ៣ មករា ឲ្យជាប់ពន្ធនាគារ ១០ ឆ្នាំក្នុង ២ បទចោទតាមបញ្ញត្តិមាត្រា ១៩៩ នៃក្រមព្រហ្មទណ្ឌ និងមាត្រា ២០ នៃច្បាប់ស្តីពីការគ្រប់គ្រងអាវុធ និងគ្រាប់រំសេវ។
លោកប្រាប់ថា៖ «គាត់ត្រូវបានចៅក្រម លោក កូយ សៅ ប្រធានក្រុមប្រឹក្សាជំនុំជម្រះ និងជាអនុប្រធានសាលាដំបូងរាជធានីភ្នំពេញចោទបទប៉ុនប៉ងឃាតកម្ម និងបទប្រើប្រាស់អាវុធដោយគ្មានការអនុញ្ញាត»។
កំណត់ហេតុតុលាការបង្ហាញថា ពាក់ព័ន្ធរឿងនេះកាលពីវេលាម៉ោង ១ ទៀបភ្លឺឈានចូលថ្ងៃទី ២ ខែឧសភា ឆ្នាំ ២០១៩ មានជនរងគ្រោះ ២ នាក់ប្តីប្រពន្ធបានបើករថយន្ត ១ គ្រឿងម៉ាកឡិចស៊ីស ពណ៌ស្លែតាមបណ្តោយផ្លូវព្រះមុនីវង្ស ហើយស្រាប់តែមានរថយន្តម៉ាកឡិចស៊ីសពណ៌ ស RX 350 ១ គ្រឿងទៀត (របស់ជនជាប់ចោទ) បើកដេញតាមពីក្រោយហើយបាញ់កាំភ្លើងខ្លីជាច្រើនគ្រាប់សំដៅរថយន្តជនរងគ្រោះដែលកំពុងជិះទាំង ២ នាក់ប្តីប្រពន្ធតែមិនបណ្តាលឲ្យជនរងគ្រោះ ឬម្នាក់ណារងរបួសទេ។
ប៉ុន្តែ ទោះជាមានការបាញ់បែបនេះក្តីក៏ជនរងគ្រោះទាំង ២ នាក់ប្តីប្រពន្ធនោះនៅតែបើករថយន្តបន្តរហូតដល់សង្កាត់ច្បារអំពៅទី ១ ខណ្ឌច្បារអំពៅ រាជធានីភ្នំពេញ។
កំណត់ហេតុបន្តថាលុះបើករថយន្តដល់ចំណុចក្បែរអធិការដ្ឋាននគរបាលខណ្ឌច្បារអំពៅ ជនរងគ្រោះឈ្មោះ ភូរិស្ស ស្តូរ៉ាន់ អាយុ ៣៤ ឆ្នាំបានចុះពីលើរថយន្តសួរនាំជនឈ្មោះ ឌួង ណាគ្រី ដែលមានលំនៅសង្កាត់បឹងកេងកងទី ៣ ខណ្ឌចំការមន រាជធានីភ្នំពេញ ហើយក៏មានការឈ្លោះប្រកែកគ្នាផង។ ពេលនោះជនជាប់ចោទបានបាញ់កាំភ្លើងឡើងលើម្តងទៀតហើយក៏ឡើងបើករថយន្តគេចខ្លួនបាត់។ បន្ទាប់ពីកើតហេតុជនរងគ្រោះបានដាក់ពាក្យប្តឹងទៅអធិការដ្ឋាននគរបាលខណ្ឌ៕