.jpg)
លោកស្រី នាក់ ណាវី កំពុងសម្រាកព្យាបាលជំងឺនៅមន្ទីរពេទ្យ។ រូបថត សហការី
ព្រះសីហនុៈ លោកស្រី នាក់ ណាវី អាយុ ៥៥ ឆ្នាំ អតីតមន្ដ្រីនគរបាលក្រុងព្រះសីហនុដែលកំពុងមានជំងឺជាទម្ងន់បានស្នើទៅលោកនាយករដ្ឋមន្ដ្រី ហ៊ុន សែន និងលោក ស ខេង រដ្ឋមន្ដ្រីក្រសួងមហាផ្ទៃសូមឲ្យជួយអន្តរាគមន៍ទៅលោក គួច ចំរើន អភិបាលខេត្ដព្រះសីហនុឲ្យពិនិត្យលើភាពមិនប្រក្រតីនៃបញ្ហាវិវាទដីធ្លីរ៉ាំរ៉ៃជិត ១០ ឆ្នាំមកហើយ។
លោកស្រី ណាវី បច្ចុប្បន្នកំពុងស្នាក់នៅផ្ទះជួលក្នុងក្រុងព្រះសីហនុ និងមានកូន ៥ នាក់ (ប្រុស ៣ នាក់) ក្នុងបន្ទុកបានឲ្យដឹងថា លោកស្រី និងប្ដីមានតួនាទីជាមន្ដ្រីនគរបាលក្រុងព្រះសីហនុ ហើយកាលពីឆ្នាំ ១៩៩២ ប្រធានការិយាល័យភ័ស្ដុភារនៃស្នងការនគរបាលខេត្ដព្រះសីហនុ សហការជាមួយអាជ្ញាធរសង្កាត់លេខ ៣ បានបែងចែកដីចំនួន ៦៥ ម៉ែត្រ គុណ ៣០ ម៉ែត្រស្ថិតនៅភូមិ ១ សង្កាត់លេខ ៣ ក្រុងព្រះសីហនុឲ្យប្ដីប្រពន្ធលោកស្រីកាន់កាប់។
លោកស្រីបានដាក់ពាក្យសុំកាន់កាប់ប្រើប្រាស់ដីធ្លីលេខ ១៨៨ សក ៣ ចុះថ្ងៃទី ២៧ ខែ ១១ ឆ្នាំ ១៩៩៥ ដែលមានបង្កាន់ដៃបង់ប្រាក់សុំកាន់កាប់ប្រើប្រាស់ដីធ្លីលេខ ១៧៩៤ «ក» ចុះថ្ងៃទី ២៩ ខែ ១១ ឆ្នាំ ១៩៩៥ របស់ការិយាល័យកសិកម្មស្រុកផងដែរ។
លោកស្រីបញ្ជាក់ពីថ្ងៃទី ៣១ ខែឧសភាថា ក្រោយមកឈ្មោះ គង់ សាវុធ និងប្រពន្ធ ឈ្មោះ ឡាយ រម្មណី និងបក្ខពួកឈ្មោះ អៀង មន្ថា ឈ្មោះ ចឹក មុន្នី និងឈ្មោះ ជិន គឹម លី បានធ្វើរបងរំលោភបំពានចូលកាន់កាប់នៅលើទីតាំងដីលំនៅឋានអ្នកស្រី ទោះបីអ្នកស្រីរារាំងយ៉ាងណាក៏ពុំអាចទប់ស្កាត់ការរំលោភបំពាននេះបានដែរ ទើបអ្នកស្រីបានដាក់ពាក្យបណ្ដឹងទៅតុលាការលើវិវាទនេះ។
ក្រោយមកនៅឆ្នាំ ២០១១ សំណុំរឿងនេះបានទៅដល់ខុទ្ទកាល័យលោកនាយករដ្ឋមន្ដ្រី ហើយខុទ្ទកាល័យបានបញ្ជូនទៅក្រសួងយុត្ដិធម៌ឲ្យអន្តរាគមន៍។ ក្រសួងយុត្តិធម៌ក្រោយមកក៏បានបញ្ជូនសំណុំរឿងនេះទៅសាលាដំបូងខេត្ដព្រះសីហនុ ដើម្បីពិនិត្យដោះស្រាយឲ្យបានឆាប់ស្របតាមនីតិវិធីច្បាប់ ប៉ុន្ដែរហូតមកដល់បច្ចុប្បន្នសំណុំរឿងនេះនៅមិនទាន់ត្រូវបានដោះស្រាយបញ្ចប់នៅឡើយទេ។
នៅថ្ងៃទី ២០ ខែកុម្ភៈ ឆ្នាំ ២០១៤ មហាអយ្យការអមសាលាឧទ្ធរណ៍ បានសម្រេចចេញ «អធិបញ្ជាចោទប្រកាន់» ដោយបង្ហាញថា ដីវិវាទនេះលោកស្រី នាក់ ណាវី មានឯកសារកាន់កាប់ដីស្របច្បាប់ទទួលស្គាល់ពីអាជ្ញាធរពិតប្រាកដនៅក្នុងឆ្នាំ ១៩៩៥ ថែមទាំងបញ្ជាក់ព្រំខាងត្បូងនៅជាប់ប្លង់ដីឈ្មោះ គួច ជាម៉ាក់ ផងដែរ។
ក្រុមអធិការកិច្ចរបស់ក្រសួងយុត្ដិធម៌បានយល់ឃើញថា ឈ្មោះ ចឹក មុន្នី និងឈ្មោះ អៀន មន្ថា បានចូលកាន់កាប់ដីរបស់លោកស្រី នាក់ ណាវី ដោយប្រើប្រាស់ឯកសារថតចម្លង ស-ខ្មៅ ៣ សន្លឹករួមគ្នា តែលិខិតនោះត្រូវបានប្រពន្ធលោក ឱ សារ៉ន (ស្លាប់) គឺអ្នកស្រី សយ សម្បត្ដិ ដែលមានព្រំដីជាប់គ្នាបានបដិសេធនៅសាលាដំបូងខេត្ដព្រះសីហនុផងដែរ។
មហាអយ្យការអមសាលាឧទ្ធរណ៍បានសម្រេចថា បដិសេធចោលជាអសារបង់ដីកាតម្កល់រឿងទុកឥតចាត់ការលេខ ២៤៥ អ.កចុះថ្ងៃទី ៦ ខែ កុម្ភៈ ឆ្នាំ ២០១៣ របស់អយ្យការអមសាលាដំបូងខេត្ដព្រះសីហនុ។ ចេញអធិបញ្ជាដល់ព្រះរាជអាជ្ញាអមសាលាដំបូងខេត្ដព្រះសីហនុធ្វើការចោទប្រកាន់លើឈ្មោះ ចឹក មុន្នី និងឈ្មោះ គង់ សាវុធ ពីបទ «ក្លែងឯកសារ ប្រើប្រាស់លិខិតក្លែង» និងឈ្មោះ អៀន មន្ថា ពីបទ «ប្រើប្រាស់លិខិតក្លែង» ប្រព្រឹត្តនៅក្រុងព្រះសីហនុតាំងពីឆ្នាំ ២០១១ រហូតមកតាមមាត្រា ៦២៦ ៦២៧ ៦២៨ នៃក្រមព្រហ្មទណ្ឌ។
លោកស្រី នាក់ ណាវី ឲ្យដឹងទៀតថា ប៉ុន្ដែនៅថ្ងៃទី ២៦ ខែមីនា ឆ្នាំ ២០២០ លោក អ៊ី ធារិន ប្រធានស្ដីទីអន្តរវិស័យក្រុងព្រះសីហនុបានធ្វើរបាយការណ៍ ដែលមិនមានឯកសារពាក់ព័ន្ធពេញលេញមិនកោះប្រជុំដោះស្រាយផ្ទាល់ជាមួយភាគីរងវិវាទ និងដោះស្រាយជាមួយគណៈកម្មការជាតិដោះស្រាយវិវាទដីធ្លីទេដោយលួចធ្វើរបាយការណ៍ដាក់ទៅក្រសួងបរិស្ថាន និងក្រសួងមហាផ្ទៃដែលមិនមែនជាស្ថាប័នមានសមត្ថកិច្ចទៅវិញ។
លោកស្រីថ្លែងថា៖ «ខ្ញុំសូមសំណូមពរទៅសម្ដេចតេជោនាយករដ្ឋមន្ត្រី និងសម្តេចក្រឡាហោម ស ខេង សូមធ្វើអន្តរាគមន៍ទៅខេត្ដព្រះសីហនុ ដើម្បីពិនិត្យ និងដោះស្រាយភាពអយុត្ដិធម៌ ជាពិសេសផ្ដោតទៅលើលិខិតរបស់លោក អ៊ី ធារិន ដែលបានរាយការណ៍ជូនសម្ដេចក្រឡាហោមកាលពីថ្ងៃទី ២៦ ខែមីនា ឆ្នាំ ២០២០ ធ្វើឲ្យមានភាពអយុត្ដិធម៌ដល់ប្រជាជន»។
លោកស្រីបន្តថា លោកស្រីសូមឲ្យមានការដោះស្រាយស្របទៅតាមច្បាប់ និងដោយតម្លាភាព ដើម្បីឲ្យភាគីម្ខាងៗអស់ចិត្ដ កុំឲ្យមានការដោះស្រាយដោយលាក់បាំង និងស្នើសុំអភិបាលខេត្តពិនិត្យឲ្យហ្មត់ចត់ឡើងវិញពីមន្ត្រីក្រោមឱវាទចំពោះការលាក់បាំងធ្វើឲ្យមានភាពអយុត្តិធម៌ដល់ប្រជាពលរដ្ឋ។ «រឿងនេះមានទាំងសេចក្ដីបំភ្លឺរបស់សាក្សីរបស់ភាគីម្ខាងៗ និងការរកឃើញរបស់ក្រុមការងារអធិការកិច្ចរបស់ក្រសួងយុត្ដិធម៌ផងដែរ»។
លោក អ៊ី ធារិន បានធ្វើរបាយការណ៍វិវាទដីធ្លីនេះទៅអភិបាលខេត្ដព្រះសីហនុ ដើម្បីដាក់មកក្រសួងមហាផ្ទៃកាលពីថ្ងៃទី ២៦ ខែ មីនា ឆ្នាំ ២០២០ ដោយបង្ហាញថា ករណីនេះត្រូវបានសាលាដំបូងខេត្ដព្រះសីហនុ និងសាលាឧទ្ធរណ៍ ចេញដីកាសម្រេចដូចជាសាលាដំបូងខេត្ដព្រះសីហនុចេញដីកាលើកចោលពាក្យសុំចេញដីកាសម្រេចរក្សាការពារចុះថ្ងៃទី ២៦ ខែ ឧសភា ឆ្នាំ ២០១១ របស់ឈ្មោះ នាក់ ណាវី។ ករណីមិនសុខចិត្ដ ម្ចាស់បំណុលមានសិទ្ធិប្ដឹងជំទាស់បានតាមមាត្រា ៥៤៤ នៃក្រមនីតិវិធីរដ្ឋប្បវេណី។
សាលាឧទ្ធរណ៍ចេញដីកាសម្រេចលេខ ៣ ដកស ចុះថ្ងៃទី ៦ ខែ មីនា ឆ្នាំ ២០១៣ វិនិច្ឆ័យសេចក្ដីច្រានចោលពាក្យបណ្ដឹងជំទាស់លេខ ១៨ ចុះថ្ងៃទី ១៤ ខែ កញ្ញា ឆ្នាំ ២០១២ របស់ឈ្មោះ នាក់ ណាវី ជាម្ចាស់បំណុល។ តម្កល់ដីកាសម្រេចលេខ ១៧៥ ត.រ/១២ ចុះថ្ងៃទី ១៣ ខែកញ្ញា ឆ្នាំ ២០១២ របស់សាលាដំបូងខេត្ដព្រះសីហនុទុកជាបានការ។
អតីតមន្ដ្រីនគរបាលកំពុងមានជំងឺមហារីកជាប់ខ្លួនរូបនេះមានបំណងចុងក្រោយអាចស្វែងរកភាពយុត្ដិធម៌ និងបន្សល់ទ្រព្យបន្តិចបន្តួចដល់កូនៗផងដែរ។ លោកស្រីបញ្ជាក់ថា៖ «ឯកឧត្ដម គួច ចំរើន អភិបាលខេត្ដព្រះសីហនុគឺជាក្ដីសង្ឃឹមតែ ១ គត់ ដែលរាជរដ្ឋាភិបាលផ្ដល់ការទុកចិត្ដ ក្នុងការដឹកនាំខេត្ដព្រះសីហនុលើគ្រប់រឿងរ៉ាវទាំងអស់។ ដូច្នេះសូមឯកឧត្ដមអភិបាលខេត្ដពិនិត្យ ការអនុវត្ដការងាររបស់កូនចៅជារាស្ដ្រ និងកូនចៅក្រោមឱវាទផង ដើម្បីដោះស្រាយវិវាទនេះប្រកបដោយភាពយុត្តិធម៌ទាំងសងខាង ស្របតាមយុទ្ធសាស្ដ្រឈ្នះៗគ្រប់ភាគីទាំងអស់»។
លោកស្រី ហង្ស បូរី ប្រធានអង្គការសហគមន៍អន្តរជាតិនៃកម្ពុជា (International Communities Organization of Cambodia) ដែលបានតាមដាន និងអង្កេតលើករណីវិវាទនេះតាំងពីដំបូងរហូតមកបានថ្លែងពីថ្ងៃទី ៣១ ខែឧសភា ថា លោក អ៊ី ធារិន ដែលជាអ្នកធ្វើរបាយការណ៍នៃករណីវិវាទនេះ មិនបានលើកឡើងពេញលេញនូវលិខិតពាក់ព័ន្ធសំខាន់ៗ ពិសេសអត្ថន័យលម្អិតក្នុងអធិបញ្ជារបស់ក្រសួងយុត្ដិធម៌ ដែលបានសម្រេចចោទប្រកាន់នោះទេទើបធ្វើឲ្យភាគីជនរងគ្រោះរងភាពអយុត្តិធម៌។
លោកស្រីថ្លែងថា៖ «ករណីវិវាទនេះមានឯកសារពាក់ព័ន្ធទាំងអស់ អ្នកធ្វើរបាយការណ៍មិនគួរធ្វើមិនគ្រប់ជ្រុងជ្រោយជូនទៅថ្នាក់ដឹកនាំនោះទេ វានាំឲ្យរងភាពអយុត្ដិធម៌ដល់ភាគីទាំង ២»។
លោក ម៉ែន វន្ធី ពលរដ្ឋមានព្រំប្រទល់ដីជាប់លោកស្រី ណាវី ថ្លែងថា សំណុំរឿងវិវាទដីធ្លីនេះលោកស្រី ណាវី បានបន្តប្តឹងទៅក្រសួងយុត្ដិធម៌ទើបក្រសួងឲ្យក្រុមការងារអធិការកិច្ចសហការជាមួយសាលាឧទ្ធរណ៍ចុះមកពិនិត្យលើករណីនេះចំនួន ២ លើកទើបរកឃើញថា ខាងតុលាការខេត្តតម្កល់រឿងទុកមិនដោះស្រាយ និងធ្វើរបាយការណ៍មិនត្រឹមត្រូវ។
លោកថ្លែងថា៖ «ក្រុមការងារអធិការកិច្ចក្រោយពីពិនិត្យសព្វគ្រប់ទើបបានចេញអធិបញ្ជាចោទប្រកាន់លើករណីវិវាទដីនេះ ហើយអធិបញ្ជានេះគឺវាគ្របដណ្ដប់លើសេចក្ដីសម្រេចផ្សេងៗទៀតទាំងអស់ និងបញ្ជាក់សេចក្ដីច្បាស់ណាស់»។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងថា លោកមិនទាន់ប្រមូលព័ត៌មានបានគ្រប់គ្រាន់ចំពោះរឿងនេះទេ ហើយលោកឲ្យសាកសួរព័ត៌មានបន្ថែមទៅលោក អ៊ី ធារិន។ ប៉ុន្ដែលោក អ៊ី ធារិន នាយកស្ដីទីអន្តរវិស័យក្រុងខេត្ដព្រះសីហនុមិនអាចសុំការបកស្រាយលើករណីនេះបានទេ ដោយលោកមិនទទួលទូរស័ព្ទ៕
