ក្រចេះ: កងរាជអាវុធខេត្តក្រចេះពីម្សិលមិញបានបញ្ជូនខ្លួនជនសង្ស័យម្នាក់ ដែលជាអតីតមន្ត្រីយោធាទៅសាលាដំបូងខេត្តពាក់ព័ន្ធករណីឆបោកពលរដ្ឋចំនួន ៥ នាក់ ដោយសន្យាជួយរត់ការឱ្យចូលបម្រើការងារក្នុងក្របខ័ណ្ឌយោធានៅបញ្ជាការដ្ឋានទ័ពជើងគោក។
លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះបានថ្លែងពីម្សិលមិញថា សមត្ថកិច្ចជំនាញបានបញ្ជូនជនសង្ស័យឈ្មោះ ពៅ សុធារី ភេទប្រុស អាយុ ២១ ឆ្នាំមុខរបរលក់ដូរ និងជាអតីតយោធាកងពល ១២៨ នៅខេត្តស្ទឹងត្រែងរស់នៅស្រុកសំបូរទៅសាលាដំបូងខេត្តក្រចេះនៅល្ងាចថ្ងៃទី ១២ ខែវិច្ឆិកា។
ការបញ្ជូនខ្លួនជនសង្ស័យទៅតុលាការធ្វើឡើងបន្ទាប់ពីមន្ត្រីជំនាញ បានបញ្ចប់ការសាកសួររួចរាល់ពាក់ព័ន្ធករណីដើរបោកប្រាស់ប្រជាពលរដ្ឋតាមរយៈការភូតកុហករើសទ័ពដោយខុសច្បាប់។ ជននេះត្រូវបានកម្លាំងកងអាវុធហត្ថខេត្តក្រចេះចាប់ខ្លួនពីថ្ងៃទី ៩ ខែវិច្ឆិកា។
លោកបញ្ជាក់ថា៖ «ជនសង្ស័យជាប់ពាក់ព័ន្ធករណីឆបោកជ្រើសរើសកងទ័ពខុសច្បាប់កាលពីអំឡុងខែមីនា និងមេសា ឆ្នាំ ២០២០ គឺមានពលរដ្ឋជាជនរងគ្រោះចំនួន ៥ នាក់ហើយដែលចាញ់បោកគាត់។ គាត់បានសន្យាថា គាត់ជាអ្នករត់ការឱ្យចូលបម្រើការងារក្នុងក្របខ័ណ្ឌយោធានៅបញ្ជាការដ្ឋានទ័ពជើងគោកដោយយកប្រាក់ពីជនរងគ្រោះក្នុងម្នាក់ៗចាប់ពី ៤ ពាន់ដុល្លារឡើងទៅ»។
លោក ទីវ វុធធេន អ្នកនាំពាក្យសាលាដំបូងខេត្តក្រចេះថ្លែងពីម្សិលមិញថា លោកមិនទាន់ទទួលសំណុំរឿងពីមន្ត្រីកងរាជអាវុធហត្ថខេត្តនៅឡើយ។ លោកថា៖ «ប៉ុន្ដែប្រសិនបើគេបញ្ជូនមកដល់តុលាការ ខ្ញុំនឹងប្រាប់ព័ត៌មានជូន។ ខ្ញុំគិតថា ប្រហែលជាមន្ត្រីយើងគាត់កំពុងបញ្ជូនមកហើយតែមិនទាន់ដល់តុលាការ»។
លោក ម៉ៅ ផល្លា អ្នកនាំពាក្យកងទ័ពជើងគោកនៃអគ្គបញ្ជាការដ្ឋានកងយោធពលខេមរភូមិន្ទបានបដិសេធធ្វើអត្ថាធិប្បាយពីករណីនេះ ដោយលោកបានបង្វែរសំនួរទៅលោក ឈុំ សុជាត អ្នកនាំពាក្យក្រសួងការពារជាតិវិញ។ លោកបញ្ជាក់ថា៖ «ខ្ញុំអត់មានមតិយោបល់អ្វីទេ ព្រោះខ្ញុំមិនសូវបានដឹងរឿងច្បាស់លាស់»។
លោក ឈុំ សុជាត មិនទាន់អាចទាក់ទងសុំការបញ្ជាក់បន្ថែមជុំវិញករណីនេះបានទេពីម្សិលមិញ។ ចំណែកជនរងគ្រោះដែលបានចាញ់បោកអតីតមន្ត្រីយោធារូបនេះក៏មិនទាន់អាចស្វែងរកប្រភពទាក់ទងសុំការបញ្ជាក់បន្ថែមបានដែរ៕