.jpg)
លោក នួន ជា អតីតមេដឹកនាំជាន់ខ្ពស់ខ្មែរក្រហម ពេលសម្រាកព្យាបាលនៅមន្ទីរពេទ្យ។ សហការី
ភ្នំពេញៈ អ្នកនាំពាក្យសាលាក្តីខ្មែរក្រហម លោក នេត្រ ភក្រ្តា បានថ្លែងពីម្សិលមិញថា អតីតមេដឹកនាំខ្មែរក្រហម លោក នួន ជា បានទទួលមរណភាពហើយពីម្សិលមិញ ក្រោយពីការព្យាបាលជំងឺតាំងពីថ្ងៃទី ២ ខែ កក្កដា នោះមក។
លោក ភក្ត្រា បញ្ជាក់ថា៖ «យើងអាចបញ្ជាក់ថា ចុងចោទ នួន ជា អាយុ ៩៣ ឆ្នាំ បានទទួលមរណភាពនៅល្ងាចនេះថ្ងៃទី ៤ ខែ សីហា ឆ្នាំ ២០១៩ នៅមន្ទីរពេទ្យមិត្តភាពខ្មែរសូវៀត។ គាត់ត្រូវបានផ្ទេរពីមន្ទីរឃុំខ្លួនរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ទៅមន្ទីរពេទ្យមិត្តភាពខ្មែរសូវៀតដើម្បីព្យាបាលជំងឺចាប់តាំងពីថ្ងៃទី ២ ខែ កក្កដា ឆ្នាំ ២០១៩»។
លោកបន្ថែមថា ជនជាប់ចោទ នួន ជា ត្រូវបានក្រុមគ្រូពេទ្យនៃសាលាក្តីខ្មែរក្រហមបញ្ជូនមកមន្ទីរពេទ្យមិត្តភាពខ្មែរសូវៀត កាលពីថ្ងៃទី ២ កក្កដា ដើម្បីសម្រាកព្យាបាលជំងឺ ហើយលោកបានស្លាប់នៅទីនោះ។ ប៉ុន្តែលោកមិនអាចបញ្ជាក់ថា លោក នួន ជា មានជំងឺអ្វីឡើយ ដោយសារតែព័ត៌មានអំពីសុខភាពគាត់ គឺជាព័ត៌មានសម្ងាត់បំផុតផ្ទាល់ខ្លួនគាត់។
ជនជាប់ចោទ នួន ជា អតីតប្រធានរដ្ឋសភារបបខ្មែរក្រហមរូបនេះត្រូវបាន អ.វ.ត.ក. សម្រេចផ្ដន្ទាទោសដាក់ពន្ធនាគារអស់ ១ ជីវិត ក្នុងសំណុំរឿង ០០២/០២ កាលពីខែវិច្ឆិកាឆ្នាំមុន ដូចគ្នានឹងលោក ខៀវ សំផន។
បើតាមសារព័ត៌មាន Fresh News ដែលបានដកស្រង់សម្ដីគ្រូពេទ្យម្នាក់សុំមិនបញ្ចេញឈ្មោះបានបញ្ជាក់ ដូច្នេះថា៖ «នៅរសៀលថ្ងៃទី ៤ ខែ សីហា ឆ្នាំ ២០១៩ នេះ ស្ថានភាពជំងឺ នួន ជា គឺស្ថិតក្នុងដំណាក់កាល ចុងក្រោយនៃជីវិតរបស់គាត់ហើយ»។
លោក ងី ម៉េង នាយកមន្ទីរពេទ្យមិត្តភាពខែ្មរសូវៀត បានបដិសេធអត្ថាធិប្បាយពីបញ្ហានេះដោយលោក បានបង្វែរសំណួរទៅកាន់លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម។
លោកស្រី Doreen Chen មេធាវីរបស់លោក នួន ជា បានបដិសេធអត្ថាធិប្បាយពីបញ្ហាសុខភាពរបស់លោក នួន ជា ដោយសារតែវាជាព័ត៌មានសម្ងាត់។
លោកស្រីបញ្ជាក់ថា៖ «សុខភាពរបស់លោក នួន ជា ចាត់ថ្នាក់ដោយសាលាក្តីថា បញ្ហាសម្ងាត់ខ្លាំង ហើយមេធាវីរបស់គាត់មិនធ្វើអត្ថាធិប្បាយលើបញ្ហានេះ»។
លោក ឆាំង យុ ប្រធានមជ្ឈមណ្ឌលឯកសារកម្ពុជា ថ្លែងថាជនរងគ្រោះក្នុងរបបរខ្មែរក្រហម ជាច្រើនចង់ឃើញលោក នួន ជា ទទួលទណ្ឌកម្មចំពោះអ្វីដែលលោកបានប្រព្រឹត្តបណ្តាលឲ្យមនុស្សជាច្រើនលានបានស្លាប់។ លោកចាត់ទុកជំងឺរបស់លោក នួន ជា ថាជាបាបកម្ម ដែលលោកបានធ្វើចំពោះជនរងគ្រោះក្នុងសម័យខ្មែរក្រហម។
លោកថា៖ «កាលដែលយើងឃើញរូបភាព (តាមសារព័ត៌មាន) វារាងធ្ងន់ធ្ងរដែរ។ ក្នុងផ្លូវច្បាប់យើងមិនទាន់អស់ចិត្តនូវអំពើ ដែលគាត់បានធ្វើពីព្រោះប្រជាជនស្លាប់ច្រើនលាននាក់ ហើយជនរងគ្រោះជាច្រើននៅតែមិនទាន់អស់ចិត្ត ចំពោះទណ្ឌកម្មដែលដាក់ទោសគាត់អស់ ១ ជីវិត។ តែគាត់ក៏មិនអាចគេចចេញពីកម្មពៀរដែលគាត់បានប្រព្រឹត្ត និងអំពើដែលគាត់បានប្រព្រឹត្តមកលើជនរងគ្រោះ។ ជំងឺរបស់គាត់នេះបញ្ជាក់ឲ្យឃើញនូវបាបកម្ម (របស់គាត់)»។
សូមបញ្ជាក់ថា កន្លងទៅសារព័ត៌មានបានដកស្រង់សម្ដីគ្រូពេទ្យម្នាក់សុំមិនបញ្ចេញឈ្មោះថា លោក នួន ជា មានដំបៅជាំខ្មៅលើម្រាមជើងទាំងសងខាង ហើយថាលោកក៏មានជំងឺត្បៀតសរសៃមិនអាចឲ្យឈាមរត់មកចិញ្ចឹមដល់ចុងជើងបាន ទើបដំបៅ។
កាលពីពាក់កណ្តាលខែ វិច្ឆិកា ឆ្នាំ ២០១៨ លោក នួន ជា ត្រូវបានផ្ដន្ទាទោសដាក់ពន្ធនាគារអស់ មួយជីវិតពីបទឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មប្រល័យពូជសាសន៍ ប្រឆាំងជនជាតិចាម និងជនជាតិវៀតណាម។
លោក ឆាំង យុ ថ្លែងថា៖ «ខ្ញុំគិតថា នេះជាបាបកម្មគាត់ដែរ ដែលស្លាប់ជាលក្ខណៈជរាពាធ ទោះបីជាគាត់ខំគេចចេញពីសំណាញ់ច្បាប់ក៏ដោយ។ ប៉ុន្ដែគាត់មិនអាចគេចចេញពីសំណាញ់បាបកម្ម ដែលយើងគិតថា ប្រជាពលរដ្ឋយើងមួយចំនួន គាត់អាចអហោសិកម្មឲ្យគាត់»។
លោកបន្តថា៖ «ខ្ញុំគិតថា គាត់ច្បាស់ជានៅកត់ត្រាទុកទង្វើ ឬសកម្មភាព ការពិតណាមួយហើយលាក់ទុកកន្លែងណាមួយទៀត ហើយក្នុងនោះគាត់ក៏អាចអនុញ្ញាតឲ្យនរណាម្នាក់ដឹងរឿងនេះដែរ ព្រោះខ្ញុំគិតថា គាត់ក៏មានវិប្បដិសារីដែរ ប៉ុន្ដែបញ្ហាចង់ឈ្នះ ចង់ចាញ់ ទើបបានជាជ្រុលខ្លួនទៅជាបែបនេះ។
លោកស្រី លី គឹមសេង ប្រពន្ធ លោក នួន ជា ធ្លាប់ប្រាប់ភ្នំពេញប៉ុសិ៍្តថា៖ «គាត់ (នួនជា) ប្រាប់ខ្ញុំ ប្រសិនបើគាត់ត្រូវបានរកឃើញថា គ្មានកំហុសគាត់នឹងទៅវត្ត ហើយបួសជាសង្ឃរហូតដល់ស្លាប់។ ឥឡូវនេះ គាត់អានសៀវភៅពីព្រះពុទ្ធសាសនានិងមានអារម្មណ៍ធូរស្បើយ»។
លោកស្រីថា៖ «គាត់ជាបុរសល្អ។ ក្នុងជីវិតរបស់គាត់ គាត់មិនដែលក្បត់ខ្ញុំ នៅជាមួយស្រីដទៃទៀតឡើយ។ គាត់គ្រាន់តែផ្តោតលើ ការងាររបស់គាត់សម្រាប់បក្ស និងប្រជាជន តែប៉ុណ្ណោះ»៕
