.jpg)
អតីតយោធាខ្មែរក្រហមម្នាក់ស្លាប់បាត់បង់ជីវិត ក្រោយយកគ្រាប់ B40 មកកែច្នៃ បោកចាប់ត្រី។ រូបថត ក្រសួងព័ត៌មាន
ឧត្តរមានជ័យៈ អតីតយោធាខ្មែរក្រហមម្នាក់បានយកគ្រាប់ B40 មកកែច្នៃធ្វើជាគ្រាប់សម្រាប់បោកចាប់ត្រី តែខុសបច្ចេកទេសក៏បណ្ដាលឱ្យផ្ទុះដាច់ខ្លួនប្រាណជា ៣ បំណែកស្លាប់។ ហេតុការណ៍ដ៏រន្ធត់នេះបានកើតឡើងកាលពីល្ងាចថ្ងៃទី ៦ ខែ មីនា ឆ្នាំ ២០២១ នៅភូមិអូរស្រម៉រ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
លោក ផេង ហួត នាយនគរបាលប៉ុស្តិ៍ ត្រពាំងតាវបានប្រាប់ភ្នំពេញប៉ុស្តិ៍ពីម្សិលមិញថា ជនរងគ្រោះឈ្មោះ ស្រី ជៀន អាយុ ៦៦ ឆ្នាំ ជាអតីតយោធាខ្មែរក្រហមមានទីលំនៅក្នុងភូមិ-ឃុំកើតហេតុខាងលើ។ ជនរងគ្រោះធ្លាប់ត្រូវបានអាជ្ញាធរមូលដ្ឋានធ្វើការអប់រំណែនាំជាច្រើនលើកមកហើយ ពាក់ព័ន្ធករណីកែច្នៃគ្រាប់យុទ្ធភណ្ឌមិនទាន់ផ្ទុះ ដែលជាកាកសំណល់នៃសង្គ្រាមមកធ្វើជាគ្រាប់ផ្ទុះសម្រាប់បោកចាប់ត្រីនៅតាមដងស្ទឹង និងបឹងធម្មជាតិដោយខុសច្បាប់។
លោកថ្លែងថា៖ «គ្រាប់យុទ្ធភណ្ឌមិនទាន់ផ្ទុះ ដែលគាត់យកមកកែច្នៃធ្វើជាគ្រាប់ផ្ទុះសម្រាប់បោកចាប់ត្រី ភាគច្រើនជាប្រភេទគ្រាប់ ៦០ ម.ម និងគ្រាប់ B40។ គ្រាប់ទាំងនេះគឺគាត់ប្រមូលបានពីក្នុងដីស្រែរបស់គាត់»។
ចំណែក លោក ស៊ឹម វណ្ណៈ អធិការស្រុកអន្លង់វែងថ្លែងថា ក្រោយពីកើតហេតុ ក្រុមនគរបាលជំនាញបានចុះពិនិត្យកន្លែងកើតហេតុ ហើយបានឃើញសពជនរងគ្រោះដាច់ខ្ទាតចេញពីគ្នាជា ៣ បំណែក និងស្ថិតនៅក្នុងចម្ងាយជាង ១០ ម៉ែត្រពីគ្នា។
លោកបានបន្តថា នៅក្បែរបំណែកសាកសពជនរងគ្រោះដែលមានពីត្រឹមចង្កេះដល់ក្បាល សមត្ថកិច្ចបានរកឃើញបំណែកគ្រាប់ B40 ដែលទំនងជាត្រូវជនរងគ្រោះយកមកកែច្នៃធ្វើជាគ្រាប់ផ្ទុះខុសបច្ចេកទេស។ ក្រៅពីនេះ សមត្ថកិច្ចក៏បានរកឃើញសម្បកគ្រាប់ ៦០ ម.ម ចំនួន ១ ថែមទៀតនៅជាប់សំយាបផ្ទះជនរងគ្រោះផ្នែកខាងក្រោយ ដែលជាកន្លែងកែច្នៃគ្រាប់ផ្ទុះនោះផងដែរ។
លោក វណ្ណៈ បានថ្លែងថា៖ «វាពិតជាសំណាងណាស់ ដែលគ្មានសមាជិកក្រុមគ្រួសាររបស់គាត់ផ្សេងទៀតរងរបួស ឬស្លាប់នៅក្នុងហេតុការណ៍ដ៏អាក្រក់នេះ»។
បើតាមលោក វណ្ណៈ ចាប់តាំងពីឆ្នាំ ២០០២ មកដល់បច្ចុប្បន្ននេះនៅក្នុងឃុំត្រពាំងតាវមានពលរដ្ឋប្រមាណជិត ១០ នាក់បានស្លាប់ និងរងរបួសដោយករណីយកគ្រាប់យុទ្ធភណ្ឌមិនទាន់ផ្ទុះ ដែលភាគច្រើនជាក្បាលគ្រាប់ ៦០ ម.ម មកដំលេង បោះលេង និងកែច្នៃធ្វើជាគ្រាប់ផ្ទុះសម្រាប់បោកចាប់ត្រី។
គួររំឭកឡើងវិញផងដែរថា ស្រុកអន្លង់វែងជាអតីតសមរភូមិប្រយុទ្ធដ៏ស្រួចស្រាល់បំផុតមួយក្នុងភាគឧត្តរនៃប្រទេសកម្ពុជាក្នុងអំឡុងពេលជាង ២ ទសវត្សរ៍កន្លងមក។ ផ្ទៃដីស្រែភាគច្រើននៅក្នុងស្រុកនេះបានក្លាយជាចម្ការមីន និង គ្រាប់យុទ្ធភណ្ឌមិនទាន់ផ្ទុះដែលបង្កជាសោកនាដកម្មដល់ពលរដ្ឋរហូតមកដល់បច្ចុប្បន្ន៕
