មណ្ឌលគិរី: នគរបាលខេត្តមណ្ឌលគិរីនឹងបញ្ជូនអតីតសង្ឃអាយុ ៧៣ ឆ្នាំម្នាក់ ទៅសាលាដំបូងខេត្តមណ្ឌលគិរីនៅថ្ងៃនេះពាក់ព័ន្ធនឹងបទល្មើសចាប់រំលោភសេពសន្ថវៈលើកុមារីអាយុ ១២ ឆ្នាំម្នាក់ ជាបន្តបន្ទាប់អស់រយៈពេល ៣ ខែមកហើយ បន្ទាប់ពីក្រុមគណៈសង្ឃនាយកខេត្តបានផ្សឹក ហើយសមត្ថកិច្ចបានចាប់ឃាត់ខ្លួនយកមកសាកសួរកាលពីថ្ងៃទី ១ ខែតុលា។
លោក ឡោ សុខា ស្នងការខេត្តមណ្ឌលគិរីប្រាប់ភ្នំពេញប៉ុស្ដិ៍ពីម្សិលមិញថា សមត្ថកិច្ចជំនាញគ្រោងនឹងបញ្ជូនខ្លួនអតីតសង្ឃអាយុ ៧៣ ឆ្នាំរូបនេះទៅសាលាដំបូងខេត្តមណ្ឌលគិរីនៅថ្ងៃទី ៣ តុលានេះ ដើម្បីចាត់ការតាមនីតិវីធីច្បាប់ បន្ទាប់ពីមន្ត្រីជំនាញបានសាកសួររួចរាល់។
លោកបន្តថា មុនពេលឃាត់ខ្លួន ឪពុកកុមារីរងគ្រោះបានមកប្ដឹងសមត្ថកិច្ចមូលដ្ឋានថា សង្ឃមួយអង្គនេះបានចាប់រំលោភកូនស្រីរបស់គាត់ជាច្រើនលើកខណៈដែលកុមារីវ័យ ១២ ឆ្នាំរូបនេះ បានទៅធ្វើការងារជាមួយឪពុកនៅក្នុងវត្តដែលសង្ឃគង់នៅ។ ក្រោយពីរំលោភច្រើនលើក កុមារីរងគ្រោះបានប្រាប់ឪពុកពីហេតុការណ៍ទាំងអស់នោះទើបឪពុកមកប្ដឹងសមត្ថកិច្ច។
លោក សុខា បញ្ជាក់ថា៖ «ឥឡូវនេះគឺយើងបានចាប់ផ្សឹកព្រះសង្ឃរូបនេះហើយ ដោយមន្ត្រីជំនាញយើងបាននិងកំពុងបន្តសាកសួរហើយប្រហែលនៅថ្ងៃទី ៣ តុលានេះយើងនឹងបញ្ជូនទៅតុលាការហើយ។ ចំណែកកុមារីរងគ្រោះយើងបានប្រគល់ជូនទៅអង្គការ CPU និងមណ្ឌលសង្គមកិច្ចខេត្តមណ្ឌលគិរីជាអ្នកទទួលខុសត្រូវ»។
លោកស្រី សោម វឌ្ឍនា ប្រធានផ្នែកផ្តល់សេវាកម្មគាំពារកុមារទូទាំងប្រទេសនៃអង្គភាពការពារកុមារ (CPU) បានថ្លែងថា ខណៈនេះកុមារីរងគ្រោះបាននិងកំពុងស្នាក់នៅក្នុងអង្គភាពការពារកុមារ ដើម្បីសម្រាក និងព្យាបាលរបួសបន្ទាប់ពីមន្ត្រីជំនាញ CPU និងអាជ្ញាធរពាក់ព័ន្ធបានធ្វើកោសល្យវិច័យ ក៏ដូចជាពិនិត្យលើសំណុំរឿងនេះ។
លោកស្រីបន្តថា ស្ថានភាពកុមារីរងគ្រោះនាពេលនេះមិនមានបញ្ហាអ្វីកើតឡើងទេ ដោយស្មារតីរបស់គាត់មិនមានការភិតភ័យ ឬតក់ស្លុតផងដែរ។ លោកស្រីបន្តថា៖ «កុមារីជាជនរងគ្រោះគឺយើងបានយកគាត់មកមើលថែនៅអង្គភាពការពារកុមារ (CPU) រួចហើយ ឥឡូវនេះគាត់មានសុវត្ថិភាព គ្មានបញ្ហាអ្វីទៀតទេ រីឯព្រះសង្ឃហ្នឹង សមត្ថកិច្ចចាប់ផ្សឹក និងកំពុងសាកសួរ»។
ទាំងមន្ត្រីនគរបាលខេត្តមណ្ឌលគិរី និងភ្នាក់ងារ CPU បានបដិសេធប្រាប់ឈ្មោះជនសង្ស័យ និងទីកន្លែងដែលជននេះបានស្នាក់នៅដោយគ្រាន់តែឲ្យដឹងថា CPU បានសហការជាមួយមន្ត្រីនគរបាលខេត្តមណ្ឌលគិរីបានធ្វើការឃាត់ខ្លួនសង្ឃមួយអង្គព្រះជន្ម ៧៣ វស្សាពីបទល្មើសរំលោភ និងបំពានទៅលើកុមារីម្នាក់អាយុ ១២ ឆ្នាំ អស់រយៈពេល ៣ ខែមកហើយ ដោយទើបតែបែកការនៅថ្ងៃបុណ្យភ្ជុំបិណ្ឌចុងក្រោយនេះ៕