ភ្នំពេញៈ អតីតបុគ្គលិកសន្តិសុខស្ថានទូតអាមេរិកនៅរាជធានីភ្នំពេញជាង ២០ នាក់បាននាំគ្នាមកតវ៉ានៅមុខស្ថានទូតកាលពីព្រឹកថ្ងៃម្សិលមិញដើម្បីប្រឆាំងនឹងការបញ្ឈប់ការងារ ពួកគេ ៣២ នាក់ក្រោមការចោទប្រកាន់ពីបទលួចមើលនិងចែកចាយរូបភាពអាសអាភាសរបស់កុមារជាអ្វីដែលមន្ត្រីទូតថា ជាការកេងប្រវ័ញ្ចលើកុមារធ្ងន់ធ្ងរ។
លោក ញឹម សុភ័ណ អាយុ ៤៥ ឆ្នាំដែលអះអាងថាធ្លាប់បានបម្រើការងារជាបុគ្គលិកផ្នែកសន្តិសុខនៅស្ថានទូតនៃប្រទេសមហាអំណាចមួយនេះអស់ ១៨ ឆ្នាំបានប្រាប់ភ្នំពេញប៉ុស្តិ៍ ខណៈកំពុងតវ៉ាថាពួកគាត់មិនអាចទទួលយកបានទេ ចំពោះអ្វីដែលស្ថានទូតអាមេរិកបានបញ្ឈប់ការងារពួកគាត់នាពេលថ្មីៗនេះ។
លោក សុភ័ណ បានបញ្ជាក់ថា៖ «ស្ថានទូតបានដកហូតយកទូរស័ព្ទដៃផ្ទាល់ខ្លួនរបស់យើងខ្ញុំទៅឆែកមើល ដោយមើលទាំង Facebook Group Messenger ផ្ទាល់ខ្លួនទៀតផង។ បន្ទាប់មកស្រាប់តែស្ថានទូតបញ្ឈប់ការងារដោយចោទយើងខ្ញុំថាបានលួចមើល និងចែកចាយរូបភាពអាសអាភាសរបស់ក្មេងស្រីក្រោមអាយុ ១០ ឆ្នាំ»។
បុគ្គលិកសន្តិសុខម្នាក់ទៀត គឺ លោក ជួន អ៊ីម បានចាត់ទុកទង្វើរបស់មន្ត្រីទូតអាមេរិកថា កំពុងរំលោភសិទ្ធិរបស់បុគ្គល។ លោកបានបន្តថាស្ថានទូតមានសិទ្ធិកាត់រំសាយការងារបុគ្គលិកតាមផ្នែកខ្លះដែលមិនចាំបាច់ដោយត្រូវទូទាត់សំណងសមរម្យតាមច្បាប់ការងារ មិនមែនបញ្ឈប់ដោយបង្ខំទាំងអយុត្តិធម៌បែបនេះទេ។
លោក អ៊ីម បានថ្លែងថា៖ «ពាក្យចោទប្រកាន់ទាំងអយុត្តិធម៌របស់ស្ថានទូតអាមេរិកមកលើយើងខ្ញុំនាពេលនេះគឺកំពុងតែសម្លាប់ការងារ ជីវិត និងក្រុមគ្រួសារយើងខ្ញុំ ព្រោះយើងខ្ញុំនឹងមិនអាចរកការងារល្អៗឯណាទៀតធ្វើសម្រាប់រកប្រាក់ផ្គត់ផ្គង់ជីវភាពគ្រួសារបានទេ»។
ជុំវិញករណីនេះលោក សុក សំអឿន មេធាវីនៃក្រុមមេធាវីអមរិន្ទបានថ្លែងថា ជាទូទៅនៅពេលថ្នាក់ដឹកនាំអង្គភាព ឬស្ថាប័នណាមួយស្នើសុំត្រួតពិនិត្យទូរស័ព្ទ ឬហ្វេសប៊ុកផ្ទាល់ខ្លួនរបស់បុគ្គលិក ឬមន្ត្រីខ្លួនគឺចាំបាច់ត្រូវមានការអនុញ្ញាតពីស្ថាប័នតុលាការមិនអាចសុំតែមាត់នោះទេ។
លោកបានបន្តថា៖ «បើមានការស្នើសុំយកទូរស័ព្ទផ្ទាល់ខ្លួនរបស់អ្នកទៅត្រួតពិនិត្យមើលគណនីហ្វេសប៊ុក ឬ អ្វីផ្សេងទៀតក្នុងទូរស័ព្ទអ្នកដោយមិនមានការបង្គាប់បញ្ជាពីតុលាការនោះ អ្នកអាចបដិសេធបាន បើទោះអ្នកដែលស្នើសុំជាថ្នាក់ដឹកនាំអង្គភាព ឬស្ថាប័នរបស់អ្នកក្ដី។ ដូច្នេះបើគេមកចាប់រឹបអូសយកពីដៃអ្នកទៅឆែកឆេរមានន័យថា គេរំលោភបំពានសិទ្ធិរបស់អ្នកគឺខុសច្បាប់ អ្នកអាចប្ដឹងតវ៉ាបាន»។
លោកបានបញ្ជាក់ថា៖ «ខ្ញុំមិនដឹងអំពីព្រឹត្តិការណ៍នោះទេ។ ប៉ុន្តែជាធម្មតានៅពេលគេរកឃើញថា មានរូបភាពខុសច្បាប់គឺគេអាចចោទប្រកាន់យើងបាន ហើយក្នុងករណីធ្ងន់ធ្ងរគឺគេអាចបណ្ដេញយើងពីក្របខ័ណ្ឌការងារដោយមិនផ្ដល់សំណង ឬអត្ថប្រយោជន៍ការងារអ្វីទាំងអស់»។
ក្រៅពីអតីតបុគ្គលិកសន្តិសុខជាង ២០ នាក់ដែលមកតវ៉ានោះគេក៏ឃើញមានវត្តមានក្រុមគ្រួសាររបស់ក្រុមអ្នកតវ៉ាទាំងនោះផងដែរដោយពួកគាត់បានកាន់បដា ទង់ជាតិប្រទេសទាំង ២ និងរូបប្រធានាធិបតីអាមេរិក លោក ដូណាល់ត្រាំ និងរូបភាព លោកនាយករដ្ឋមន្ត្រី ហ៊ុន សែន។
អ្នកស្រី សយ ស៊ីវញៀត អាយុ ៤២ ឆ្នាំដែលថាមកគាំទ្រប្ដីឈ្មោះ ឡុង សេងគឹមហុង អាយុ ៥២ ឆ្នាំបានចូលរួមទាមទារឲ្យលោក ដូណាល់ ត្រាំ ជួយផ្ដល់យុត្តិធម៌ និងដំណោះស្រាយបញ្ហាបញ្ឈប់បុគ្គលិកសន្តិសុខទាំង ៣២ នាក់ឲ្យបានសមស្រប។
អ្នកស្រីបន្តថា៖ «ប្ដីខ្ញុំ គាត់មិនចូលចិត្តថតរូប ឬមើលរឿងអាសអាភាសស្អីគេនោះទេ។ ខ្ញុំជឿជាក់លើគាត់ ខ្ញុំសំណូមពរឲ្យស្ថានទូតទទួលយកប្ដីខ្ញុំចូលបម្រើការងារឡើងវិញ ពីព្រោះជីវភាពគ្រួសាររបស់ខ្ញុំពឹងតែលើប្រាក់ខែប្ដីខ្ញុំម្នាក់គត់»។
បើតាមលោក ឡុង សេងគឹមហុង ការតវ៉ានេះគឺពួកគាត់ទាមទារឲ្យស្ថានទូតបង្ហាញភ័ស្ដុតាង និងប្រភពពិតប្រាកដនៃរូបភាពអាសអាភាសនោះ និងទាមទារឲ្យស្ថានទូតទូទាត់ប្រាក់អត្ថប្រយោជន៍ការងារស្របតាមច្បាប់ការងាររបស់កម្ពុជា។
នៅក្នុងអំឡុងពេលតវ៉ានោះមានមន្ត្រីសន្តិសុខស្ថានទូតជនជាតិអាមេរិកម្នាក់បានចេញមកទទួលញត្តិពីក្រុមអ្នកតវ៉ា ប៉ុន្តែបានបដិសេធផ្ដល់អត្ថាធិប្បាយដល់ក្រុមអ្នកសារព័ត៌មាន។
យ៉ាងណាក្ដីនៅពេលទទួលយកញត្តិរួចភ្លាម មន្ត្រីសន្តិសុខជនជាតិអាមេរិករូបនោះបានប្រាប់ទៅក្រុមអ្នកតវ៉ាថា គាត់នឹងនាំញត្តិនោះទៅដាក់ជូនថ្នាក់លើដើម្បីពិនិត្យ និងសម្រេច។
អ្នកនាំពាក្យសា្ថនទូតអាមេរិកលោក David Josar បានប្រាប់ភ្នំពេញប៉ុស្តិ៍តាមរយៈសារអេឡិចត្រូនិកកាលពីព្រឹកម្សិលមិញថារដ្ឋាភិបាលអាមេរិកចាត់វិធានការទាក់ទងនឹងរូបភាពអាសអាភាសរបស់កុមារ ប៉ុន្តែគោរពការទាមទារដោយសន្តិវិធី។
លោកថា៖ «យើងគោរពសិទ្ធិអ្នកដែលមកតវ៉ាទាមទារអ្វីមួយដោយសន្តិវិធីរួមទាំងអតីតបុគ្គលិកសន្តិសុខទាំងនេះផង។ រដ្ឋាភិបាលអាមេរិកចាត់វិធានការពាក់ព័ន្ធនឹងរូបអាសអាភាសរបស់កុមារ និងការកេងប្រវ័ញ្ចយ៉ាងធ្ងន់ធ្ងរលើកុមារ។ យើងមិនធ្វើអត្ថាធិប្បាយអំពីបញ្ហាបុគ្គលិកផ្ទៃក្នុងទេ»៕