.jpg)
គណបក្សហ៊្វុនស៊ិនប៉ិច ហែរក្បួនថ្ងៃចុងក្រោយនៃការបោះឆ្នោត កាលពីខែកក្កដា។ ហេង ជីវ័ន
ភ្នំពេញៈ អតីតអគ្គលេខាធិការរងគណបក្សហ៊្វុនស៊ិនប៉ិចលោក សួង ផល្លី បានសម្រេចប្ដឹងមន្ដ្រីជាន់ខ្ពស់គណបក្សហ៊្វុនស៊ិនប៉ិច ៥ រូបទៅសាលាដំបូងរាជធានីភ្នំពេញដោយទារជំងឺចិត្ដចំនួន ១០០០ លានរៀលពីបទចោទថាបានផ្តួចផ្តើម និងសមគំនិតធ្វើលិខិតរដ្ឋបាលទុច្ចរិតមិនស្របតាមលក្ខន្ដិកៈ និងបញ្ចប់សមាជិកភាពលោកពីបក្ស។
លោកបានប្រាប់ភ្នំពេញប៉ុស្ដិ៍ពីម្សិលមិញថា មន្ដ្រីទាំង ៥ រូបដែលលោកប្ដឹងកាលពីថ្ងៃ ១៣ សីហានោះរួមមាន លោក យូ ហុកគ្រី, លោក ប៉ោ ប៊ុនស្រ៊ឺ, លោក ញ៉េប ប៊ុនជិន, លោក នុត សុខុម និងលោក យឹម សាវី ដែលជាគណៈកមា្មធិការនៃគណបក្សហ៊្វុនស៊ិនប៉ិច។
លោក ផល្លី អះអាងថា៖ «ខ្ញុំដាក់ពាក្យប្ដឹងនេះព្រោះពួកគាត់ចាត់តាំងការងារមិនត្រូវស្ដង់ដារតាមគោលការណ៍ និងលក្ខន្ដិកៈរបស់បក្ស។ មនុស្សមិនដែលធ្វើការងារអីផងស្រាប់តែជ្រើសរើសតំណាងរាស្ដ្រ...វាធ្វើឲ្យបាត់បង់កិត្ដិយសសេចក្ដីថ្លៃថ្នូរដែលយើងខំធ្វើការងារតាំងពីយូរមកហើយជារឿងអយុត្ដិធម៌សម្រាប់ខ្ញុំ»។
លោកថា៖ «ខ្ញុំប្ដឹងគណៈកម្មាធិការទាំង ៥ ដែលបានចាត់ចែងខ្ញុំ អ៊ីចឹងអ្នកប្រឹងប្រែងធ្វើការមិនបានអីបែរជាអ្នកមិនធ្វើការមកចាំត្រងយក។ អ៊ីចឹងខ្ញុំប្ដឹងទារជំងឺចិត្ដ ១០០០ លានរៀល»។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចដែលរងការប្ដឹងម្នាក់ដែរនោះបានថ្លែងថា លោកមិនយល់ពីអ្វីដែលលោក ផល្លី កំពុងធ្វើនេះទេ ដោយលោកថាជាការរំខាន ប៉ុន្តែលោកថានឹងរៀបចំមេធាវីធ្វើការករណីនេះ។
លោកថា៖ «ខ្ញុំមិនសប្បាយចិត្ដចំពោះមនុស្សម្នាក់ហ្នឹងមកដើររំខានគេ រំខានឯង។ ខ្ញុំកំពុងរកមេធាវីដើម្បីគិតគូរចំពោះការរំខាននេះ»។
លោក ញ៉េប ប៊ុនជិន បានលើកឡើងថាលោកមិនបានដឹងចំពោះការតែងតាំង ឬការដកចេញអ្វីទេ ករណីប្ដឹងនេះលោកមិនបានដឹងឮទេ៕
