The Phnom Penh Post Search

Search form




Logo of Phnom Penh Post newspaper Phnom Penh Post - អតីត​អ្នកកាសែត​ចេញ​ផ្សាយ​សៀវភៅ

អតីត​អ្នកកាសែត​ចេញ​ផ្សាយ​សៀវភៅ

លោក ឯក ថា ពេល​ផ្តល់​បទសម្ភាស​ដល់​ភ្នំពេញប៉ុស្តិ៍​។
លោក ឯក ថា ពេល​ផ្តល់​បទសម្ភាស​ដល់​ភ្នំពេញប៉ុស្តិ៍​។ ម៉ៃ វីរៈ

អតីត​អ្នកកាសែត​ចេញ​ផ្សាយ​សៀវភៅ

ភ្នំពេញៈ ក្នុង​រយៈពេល​២៥ ឆ្នាំ​ចុងក្រោយ​នេះ លោក ឯក ថា បាន​កាន់​តំណែង​ជាច្រើន ដូចជា​អ្នក​បកប្រែ​អង្គការ​សហប្រជាជាតិ អ្នក​សារព័ត៌មាន​កាសែត Reuters អ្នកនាំពាក្យ​រដ្ឋាភិបាល និង​អ្នក​ជឿជាក់​លើ​ជីវិត​ក្រៅ​ភពផែនដី​។

ឥឡូវ​នេះ លោក​បាន​បន្ថែម​មុខ​ងារ អ្នកនិពន្ធ​សៀវភៅ​មួយ​ទៀត​ក្នុង​បញ្ជី​មុខ​តំណែង​របស់​លោក។ លោក ថា អាយុ ៤៤ ឆ្នាំ ដែល​គេ​ស្គាល់​ថា ឯក ម៉ាដ្រា នៅពេល​លោក​ធ្វើការ​ជា​អ្នកសារព័ត៌មាន​ពេញ​ម៉ោង​បាន​សរសេរ​សៀភៅ​មួយ​ហើយ​បាន​ចេញ​ផ្សាយ​កាលពី​សប្តាហ៍​មុន ដែល​សៀវភៅ​នេះ​ពិនិត្យ​ពី​ប្រទេស​កម្ពុជា ក្នុង​សង្គ្រាម​ត្រជាក់​ច្រើន​ទសវត្សរ៍ ដែល​នាំ​ទៅ​រក​របប​ខ្មែរក្រហម។ ខណៈ​ដែល​ប្រធាន​បទ​នេះ មិនមែន​ជា​ប្រធានបទ​ថ្មី​លោក​ថា សង្ឃឹម​ថា នឹង​ផ្តល់​នូវ​ទស្សនៈ​របស់​កម្ពុជា អំពី​អ្វី​ដែល​បាន​កើតឡើង​ក្នុង​អំឡុង​ទសវត្សរ៍​ដែល​ទទួល​បាន​ការសិក្សា​ច្រើន​នោះ ដោយ​គ្មាន​ភាព​លម្អៀង​ខាង​នយោបាយ ដែល​លោក​ថា ជា​ញឹកញាប់ បាន​លាប​ពណ៌​អត្ថបទ​ក្នុង​ស្រុក ស្តីពី​ប្រវតិ្តសាស្រ្ត​ថ្មីៗ​របស់​ព្រះរាជាណាចក្រ​កម្ពុជា។

លោក​បាន​ឲ្យ​ដឹង​ក្នុង​បទសម្ភាស​កាលពី​ចុងសប្តាហ៍​មុន​ថា៖ «​ខ្ញុំ​ចង់​បញ្ជាក់​ដល់​ទស្សនិកជន​លើ​ពិភពលោក​ថា កាលពី​មុន អស់​ច្រើន​ទសវត្សរ៍​អ្នកនិពន្ធ​បរទេស​ជាច្រើន​បាន​សរសេរ​សៀវភៅ​ពី​ប្រវតិ្តសាស្រ្ត​កម្ពុជា ហើយ​ឥឡូវ​នេះ​ជា​ពេលវេលា​ដែល​កម្ពុជា ត្រូវ​ប្រាប់​ពី​វប្បធម៌​នយោបាយ​របស់​យើង​វិញ»។

ខណៈ​ដែល​លោក ថា នៅ​តែ​បន្ត​ធ្វើការ​ជា​អនុប្រធាន​ព័ត៌មាន​នៅ​ទីស្តីការ​គណៈរដ្ឋមន្រ្តី លោក​បាន​ទទូច​ថា ស្នាដៃ​របស់​លោក ដែល​មាន​លក់​នៅ​ហាង Monument Books គឺជា​ស្នាដៃ​ឯករាជ្យ និង​មិន​លម្អៀង បើ​ទោះបី​មាន​ការវិភាគ​ពី​ការ​វិវត្ត​ក្នុង​សម័យ​ថ្មី​ក៏ដោយ។ លោក​បញ្ជាក់​ថា៖ «​ខ្ញុំ​មិនមែន​ជា​សមាជិក​របស់​គណបក្ស​នយោបាយ​ណា​ទេ។ ខ្ញុំ​គឺជា​អ្នកស្រាវជ្រាវ​ឯករាជ្យ.ខ្ញុំ​ព្យាយាម​នាំ​មក​នូវ​ការពិត​»។

បើ​ទោះបី​ជា​មនុស្ស​មួយ​ចំនួន​អាច​យល់​ថា វា​ពិបាក​ក្នុង​ការ​ជឿជាក់ ពី​មន្រ្តី​រដ្ឋាភិបាល​បច្ចុប្បន្ន​ក៏ដោយ ក៏​ប៉ុន្តែ សៀវភៅ ដែល​បោះពុម្ព​ដោយ​ខ្លួនឯង​របស់​លោក​ថា ដែល​មាន​ចំណង​ជើង The Factors Contributing to Cambodia's Civil War 1950s-1980s-Lessons Then & Now ខុស​ពី​ខ្សែបន្ទាត់​គណបក្ស​កាន់​អំណាច លើ​បញ្ហា​ជាច្រើន។ លោក​បាន​សំដៅ​លើ​ការ​ប្រយុទ្ធ​កាលពី​ឆ្នាំ ១៩៩៧ ថា ជា «​រដ្ឋប្រហារ» បើ​ទោះបី​ជា​មាន​ការ​ប្រឆាំង​ពី​សំណាក់​រដ្ឋាភិបាល​ជា​យូរ​មក​ហើយ​ក៏ដោយ។

លោក​បាន​អះអាង​ថា «​អំពើ​ពុករលួយ​ជាទូទៅ»​ក្រោម​របប​សម្តេច សីហនុ ក្នុង​ទសវត្សរ៍​ឆ្នាំ​១៩៦០ បន្ត​កើត​មាន​ដល់​សព្វថ្ងៃ​នេះ។

ក្នុង​ផ្នែក​រូបភាព និង​ការ​អត្ថាធិប្បាយ ដែល​ជា​ផ្នែក​នៃ​សេចក្តី​បញ្ចប់ លោក​បង្ហាញពី​គំនិត​ផ្ទុយ​លើ​បញ្ហា​មួយ​ចំនួន​ដូចជា គម្រោង​តាំង​លំនៅ​ជនភៀសខ្លួន​ដ៏ចម្រូងចម្រាស​រវាង​កម្ពុជា និង​អូស្រ្តាលី។ លោក​ថ្លែង​ថា ការ​និរទេសជន​ជាតិ​អ៊ូហ្គើរ អ្នក​ស្នើសុំ​សិទិ្ធ​ជ្រកកោន ចំនួន ២០ នាក់​ទៅ​ចិន​វិញ​កាលពី​ឆ្នាំ ២០០៩ គឺ​ដើម្បី​«ទទួល​បាន​ការ​គាំទ្រ​ពី​ទីក្រុង​ប៉េកាំង»។

ក្នុង​ផ្នែក​ពិភាក្សា​ពី​តួនាទី​ដែល​អ៊ីនធឺណិត​ដើរ ក្នុង​ការ​បះបោរ Arab Spring និង​សេចក្តី​ព្រាង​ច្បាប់​ប្រឆាំង​ឧក្រិដ្ឋកម្ម​លើ​អ៊ីនធឺណិត លោក ថា បាន​ថ្លែង​ថា៖ «​ប្រសិន​បើ​មេដឹកនាំ​អះអាង​ថា ជា​អ្នក​ប្រជាធិបតេយ្យ ពួកគេ​ត្រូវ​ធ្វើឲ្យ​គេ​ឃើញ​ថា ខ្លួន​ជា​អ្នក​ប្រជាធិបតេយ្យ»។ លោក​បាន​បញ្ជាក់​ថា នេះ​គឺជា​ការ​អត្ថាធិប្បាយ​ជាទូទៅ មិនមែន​តម្រង់​លើ​គណបក្ស​ប្រជាជន​ទេ។

លោក ថា បាន​បន្ត​ថា ក្នុង​សៀវភៅ​បន្ត​បន្ទាប់ លោក​នឹង​លើក​បញ្ហា​កាប់​ឈើ ការ​បណ្តេញ​ចេញ និង​អំពើ​ពុករលួយ។ ប៉ុន្តែ លោក បាន​ទទូច​ថា​«​ការ​ស្រាវជ្រាវ​ផ្ទាល់​ខ្លួន» នេះ គឺ​ដាច់​ដោយឡែក​ពី​ការងារ​ផ្នែក​ព័ត៌មាន​របស់​រដ្ឋាភិបាល​។ «​ខ្ញុំ​គ្មាន​ភ័យខ្លាច​អ្វី​ទេ.ប៉ុន្មាន​ឆ្នាំ​មក​នេះ ឯក ថា នៅ​តែ​ជា​ឯក ម៉ាដ្រា»៕ TK

អត្ថបទគួរចាប់អារម្មណ៍