ភ្នំពេញៈ ប្រជាពលរដ្ឋរងគ្រោះដោយការរំលោភដីធ្លីដ៏រ៉ាំរ៉ៃនៅអតីតបុរីកីឡា និងបឹងកក់ប្រមាណ ៣០ នាក់ដែលតំណាងឲ្យជាង ២០ គ្រួសារបានប្រមូលផ្ដុំគ្នាហែក្បួន និងតវ៉ានៅមុខផ្ទះលោកស្រី ស៊ុយ សុផាន ដែលជាម្ចាស់ក្រុមហ៊ុន ផាន អ៊ីម៉ិច ពីម្សិលមិញដោយចោទថា បានឈូសឆាយបំផ្លាញផ្ទះសំបែងរបស់ពួកគេតាំងពីប្រមាណ ៦ ឆ្នាំមុនដោយជំរុញឲ្យក្រុមហ៊ុន សាលារាជធានីភ្នំពេញ និងភាគីពាក់ព័ន្ធដោះស្រាយជូនពួកគេឲ្យបានឆាប់។
អ្នកស្រី ភោគ សុភីន អ្នកដឹកនាំពលរដ្ឋរងគ្រោះដីធ្លីនៅបុរីកីឡា និងបឹងកក់បានរៀបរាប់ទាំងអួលដើមកថា ពលរដ្ឋជាង ២០ គ្រួសារនៅបុរីកីឡាដែលមិនទទួលបានសំណងនាំគ្នាមកតវ៉ានៅមុខផ្ទះលោកស្រី ស៊ុយ សុផាន និងទីស្តីការគណៈរដ្ឋមន្ត្រីជាថ្មីម្ដងទៀត ដើម្បីទាមទារឲ្យរដ្ឋាភិបាលជួយអន្តរាគមន៍ទៅសាលារាជធានីភ្នំពេញផ្តល់សំណងជូនពួកគាត់ឲ្យបានឆាប់ ខណៈបច្ចុប្បន្នពួកគាត់កំពុងមានជីវភាពខ្វះខាត។
អ្នកស្រីបញ្ជាក់ថា៖ «ជំហរពួកខ្ញុំនៅពេលចុងក្រោយនេះគឺស្នើសុំសំណងជាថវិកាចំនួន ២៥០០០ ដុល្លារដើម្បីយកទិញដី ឬ ផ្ទះនៅកន្លែងសម្រាប់រស់នៅ ប៉ុន្ដែបើអាជ្ញាធរសម្រេចឲ្យពួកខ្ញុំទៅរស់នៅភូមិអណ្ដូងវិញ ពួកខ្ញុំនឹងមិនទៅនៅទីនោះទេ ហើយបើសិនប្រគល់ដីឲ្យពួកខ្ញុំនៅកន្លែងផ្សេងទៀតនោះ ពួកខ្ញុំនឹងធ្វើការពិចារណាឡើងវិញ»។
ចំណែកអ្នកស្រី ស៊ា ណារ៉េត អ្នករងគ្រោះទំនាស់ដីធ្លីនេះដែរបានអះអាងថា ពលរដ្ឋធ្លាប់ដាក់ញត្តិជាច្រើនដងទៅសាលាក្រុង ក្រសួងដែនដី ខុទ្ទកាល័យនាយករដ្ឋមន្ត្រីជាច្រើនឆ្នាំមកហើយ ប៉ុនែ្តរហូតដល់ពេលនេះមិនទាន់មានដំណោះស្រាយនៅឡើយ។ អ្នកស្រីបញ្ជាក់ថា៖ «បើសិនជាអត់មានដំណោះស្រាយ ពួកខ្ញុំទាំងអស់គ្នានឹងបន្តតវ៉ាទៀតស្វែងរកដំណោះស្រាយ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានឲ្យដឹងថា សាលារាជធានីភ្នំពេញកំពុងយកចិត្តទុកដាក់ដោះស្រាយបញ្ហាសេសសល់ជូនសហគមន៍ទាំង ២ ក្នុងនោះមានរឿងខ្លះកំពុងដោះស្រាយ និងរឿងខ្លះទៀតសាលាក្រុង មិនអាចដោះស្រាយបានទេ ព្រោះផ្ទះខ្លះរស់នៅច្រើនគ្រួសារ ប៉ុន្តែលោកថា បើប្រជាសហគមន៍ទាំងនោះមានចម្ងល់អាចទាក់ទងទៅសាលារាជធានីដោយផ្ទាល់។
លោកថា៖ «បងប្អូនយើងទាំងបុរីកីឡាទាំងបឹងកក់ យើងកំពុងធ្វើការដោះស្រាយហើយ មានអ្នកខ្លះទទួលយក និងខ្លះទៀតក៏មិនព្រមទទួលយកដែរ ហើយសាលាក្រុងក៏អត់មានគោលនយោបាយអ្វីថ្មីសម្រាប់ផ្ដល់ឲ្យពួកគាត់ដែរ គឺដូចអ្វីដែលសាលាក្រុងធ្លាប់សន្យាផ្ដល់ជូនពួកគាត់»។
លោក ស៊ឹង សែនករុណា មន្ត្រីអង្កេតផ្នែកសិទ្ធិមនុស្សនៃសមាគមអាដហុក ADHOC ថ្លែងថាកន្លងមករដ្ឋាភិបាលបានដោះស្រាយបានច្រើនដែរ ប៉ុន្ដែគួរតែរកវិធីពន្លឿនការដោះស្រាយបញ្ចប់បញ្ហាដីធ្លីជូនប្រជាពលរដ្ឋបុរីកីឡា និងបឹងកក់ទាំងនោះឲ្យអស់ដោយថាបើមិនធ្វើការដោះស្រាយឲ្យអស់ទេជំងឺរុំារ៉ៃក្នុងសង្គមនៅតែបន្តកើតមាន។
លោកថា៖ «កន្លងមកយើងឃើញថា ដូចបុរីកីឡា ជាពិសេសបឹងកក់ មានការប្រើប្រាស់អំពើហិង្សាដើម្បីទប់ស្កាត់ការតវ៉ាមានការចាប់ខ្លួនជាបន្តបន្ទាប់។ បើសិនជាមិនបានដោះស្រាយបញ្ចប់ទេ បញ្ហាវាកើតឡើងបន្តទៀតអ្នកដែលរងគ្រោះគឺប្រជាពលរដ្ឋយើង»។
លោកស្រី ស៊ុយ សុផាន ម្ចាស់ក្រុមហ៊ុន ផាន អ៊ីម៉ិច កាលពីម្សិលមិញមិនទាន់អាចទាក់ទងសុំការបញ្ជាក់ជុំវិញការចោទប្រកាន់នេះទេ។
គួររំឭកថាកាលពីឆ្នាំ ២០១២ ក្រុមហ៊ុន ផាន អ៊ីម៉ិច របស់លោកស្រី ស៊ុយ សុផាន ទទួលបានសិទ្ធិពីរដ្ឋាភិបាលធ្វើការអភិវឌ្ឍនៅសហគមន៍បុរីកីឡាដោយសន្យាសង់អគារចំនួន ១០ ជូនប្រជាពលរដ្ឋ ១៧៧៦ គ្រួសារវិញ ប៉ុន្តែ ក្រុមហ៊ុនសង់បានតែ ៨ អគារក៏ផ្អាកដោយលើកហេតុផលថា ក្រុមហ៊ុនក្ស័យធន។
កាលពីឆ្នាំ ២០១១ រដ្ឋាភិបាលបានចេញអនុក្រឹត្យមួយកាត់ដីចំនួន ១២,៤៤ ហិកតាឲ្យពលរដ្ឋជាង ៧០០ គ្រួសារនៅតំបន់បឹងកក់។ ប៉ុន្តែពួកគេថាជិត ៧ ឆ្នាំនៅតែមិនទាន់មានដំណោះស្រាយ។
ក្រោយមកនៅក្នុងឆ្នាំ ២០១៧ លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ឲ្យអភិបាលរាជធានីភ្នំពេញថ្មីគឺលោក ឃួង ស្រេង ត្រូវដោះស្រាយបញ្ហាជម្លោះដីធ្លីនៅតំបន់បឹងកក់ឲ្យអស់ ខណៈបច្ចុប្បន្នតំណាងអ្នកមានជម្លោះដីធ្លីនៅតំបន់បឹងកក់ជាង ១៦០ គ្រួសារនៅតែអះអាងថាពួកគេមិនទាន់ទទួលបានយុត្តិធម៌នៅឡើយ៕