ភ្នំពេញៈ អតីតសហគមន៍បឹងកក់ចំនួន ៧ គ្រួសាររស់នៅភូមិ ១ សង្កាត់ស្រះចក រាជធានីភ្នំពេញដែលពុំទាន់ទទួលសំណងសមរម្យពីការបណ្តេញចេញកាលពីឆ្នាំ ២០០៧ កាលពីម្សិលមិញបានស្នើសុំកិច្ចអន្តរាគមន៍ពីប្រធានអង្គភាពប្រឆាំងអំពើពុករលួយឱ្យស៊ើបអង្កេតករណីអភិបាលរាជធានីភ្នំពេញមិនបានដោះស្រាយក្នុងរឿងជម្លោះដីធ្លីដោយពួកគេសង្ស័យថាមានការប្រព្រឹត្តអំពើពុករលួយនៅពីក្រោយរឿងនេះ។
ពាក្យសុំអន្តរាគមន៍ដែលបានដាក់ជូនប្រធានអង្គភាពប្រឆាំងអំពើពុករលួយលោក ឱម យ៉ិនទៀង បានស្នើឱ្យបើកការស៊ើបអង្កេតលើភាពមិនប្រក្រតីក្នុងការងាររបស់អភិបាលរាជធានីភ្នំពេញលោក ប៉ា សុជាតិវង្ស និងមន្ត្រីសាលារាជធានីភ្នំពេញមួយចំនួនទៀតដែលអាចពាក់ព័ន្ធនឹងអំពើពុករលួយ។
ក្នុងលិខិតបញ្ជាក់ថា «យើងខ្ញុំជាប្រជាពលរដ្ឋ ៧ គ្រួសាររស់នៅភូមិ ១ ដែលមិនទាន់ទទួលបានដំណោះស្រាយដីធ្លីពីសាលារាជធានីភ្នំពេញពីព្រោះតែឯកឧត្តម ប៉ា សុជាតិវង្ស និងមន្ត្រីមួយចំនួនទៀតដោះស្រាយដីធ្លីសម្រាប់យើងខ្ញុំ ៧ គ្រួសារដោយអយុត្តិធម៌ និងមានភាពមិនប្រក្រតី»។
អ្នកស្រី ហុង សុខហេង តំណាងឱ្យ ៧ គ្រួសារថ្លែងប្រាប់អ្នកសារព័ត៌មាននៅមុខអង្គភាពប្រឆាំងអំពើពុករលួយដោយដាក់ការសង្ស័យថាការដោះស្រាយដីធ្លីនាពេលកន្លងមកអាចមានអំពើពុករលួយទើបពួកគាត់ទាំង ៧ គ្រួសារពុំបានទទួលសំណងសមរម្យ។ អ្នកស្រីអះអាងថា «ខ្ញុំចង់ឱ្យលោក ឱម យ៉ិនទៀង ជួយរកថាមានអំពើពុករលួយឬអត់? ប៉ុន្តែខ្ញុំសង្ឃឹមថាអាចមានពាក់ព័ន្ធពុករលួយបានជាគាត់ (ប៉ា សុជាតិវង្ស) អត់ដោះស្រាយជូនពួកខ្ញុំបើសិនជាគាត់មានឆន្ទៈពិតប្រាកដគាត់នឹងដោះស្រាយបាន»។ អ្នកស្រីបន្ថែមថាប្រសិនបើអង្គភាពប្រឆាំងអំពើពុករលួយមិនមានចំណាត់ការណាមួយទេពួកគេនឹងបន្តដាក់ញត្តិសុំអន្តរាគមន៍ទៅខុទ្ទកាល័យនាយករដ្ឋមន្ត្រី រដ្ឋសភា និងទីស្តីការគណៈរដ្ឋមន្ត្រីនៅសប្តាហ៍ក្រោយៗទៀត។
ពលរដ្ឋរងគ្រោះម្នាក់ទៀតដែលអះអាងមានដីទំហំ ៩៧២ ម៉ែត្រការ៉េលោក ដួង ឈើត បានថ្លែងថាគាត់មិនអាចទទួលយកដំណោះស្រាយដែលផ្តល់ឱ្យត្រឹមតែ ៧២ ម៉ែត្រការ៉េនោះទេដោយចាត់ទុកថាមិនមានតម្លាភាព។ លោកចង់បានដំណោះស្រាយតាមរូបមន្ត ៥៣ ភាគរយដូចគ្រួសារដទៃទៀតដែលធ្លាប់ទទួលបានដំណោះស្រាយកន្លងមក។ លោកថា «គ្រួសារខ្ញុំជួបការលំបាកជិត ១០ ឆ្នាំហើយបន្ទាប់ពីគេបណ្តេញចេញតែឯកឧត្តម ប៉ា សុជាតិវង្ស គាត់ដោះស្រាយលក្ខណៈអយុត្តិធម៌ និងគ្មានតម្លាភាព»។
បើតាមពលរដ្ឋរងគ្រោះសុទ្ធតែអះអាងថាកន្លងទៅប្រធានរដ្ឋសភាលោក ហេង សំរិន និងរដ្ឋមន្ត្រីក្រសួងមហាផ្ទៃលោក ស ខេង បានចេញលិខិតអន្តរាគមន៍ទៅសាលារាជធានីភ្នំពេញឱ្យដោះស្រាយជូនប្រជាពលរដ្ឋដែលនៅសល់ដោយសន្តិវិធីតាមរូបមន្ត ៥៣ ភាគរយ។
ភ្នំពេញប៉ុស្តិ៍មិនអាចសុំការអត្ថាធិប្បាយពីប្រធានអង្គភាពប្រឆាំងអំពើពុករលួយលោក ឱម យ៉ិនទៀង បាននៅឡើយទេ។ តែមន្ត្រីដែលធ្វើការនៅអង្គភាពនេះឈ្មោះ ស្រីរ័ត្ន ដែលបានចុះហត្ថលេខាទទួលលិខិតអន្តរាគមន៍អះអាងថានឹងដាក់ជូនថ្នាក់លើ។ នេះបើតាមការបញ្ជាក់ពីអ្នកស្រី ហុង សុខហេង។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ ប្រាប់ភ្នំពេញប៉ុស្តិ៍ថាសុំមិនអត្ថាធិប្បាយចំពោះការចោទប្រកាន់នេះទេដោយទុកឱ្យអង្គភាពប្រឆាំងអំពើពុករលួយបើកការស៊ើបអង្កេតដោយខ្លួនឯង។ លោកថា « ខ្ញុំអត់មានអីត្រូវឆ្លើយទេតែទុកឱ្យគាត់ (៧ គ្រួសារ) ប្តឹងទៅហើយស្ថាប័នដែលទទួលហ្នឹងធ្វើការស៊ើបអង្កេតហើយពិនិត្យតាមហ្នឹងទៅ។ យ៉ាងណាក៏ដោយលោកថាសាលារាជធានីនឹងបន្តរកដំណោះស្រាយជូន ៧ គ្រួសារដែលនៅសេសសល់ដោយផ្តល់ដីទំហំ ១ ឡូត៍ទទឹងប្រវែង ៤ ម៉ែត្រគុណ ១៨ ម៉ែត្រសម្រាប់សង់ផ្ទះបានតែលោកថានឹងបន្តសិក្សាបន្ថែមលើស្ថានភាពគ្រួសារជាក់ស្តែង។
នាយកលេខាធិការដ្ឋាននៃក្រុមការងារពិសេសសិទ្ធិលំនៅឋានលោក សៀ ភារម្យ ថ្លែងថាសាលារាជធានីគួរផ្តល់ដំណោះស្រាយសមរម្យជូនពលរដ្ឋ ៧ គ្រួសារដើម្បីឈានដល់ការបញ្ចប់ជម្លោះដីធ្លីដែលអូសបន្លាយជិត ១០ ឆ្នាំមកនេះ។ លោកថា «បើយើងនិយាយពីគោលការណ៍ដោះស្រាយតាមបែបប្រជាធិបតេយ្យគឺត្រូវដោះស្រាយយ៉ាងណាឱ្យប្រជាពលរដ្ឋពេញចិត្តតែបើសិនដោះស្រាយតាមបែបធ្វើម៉េចឱ្យតែរដ្ឋពេញចិត្តហើយរាស្ត្រមិនពេញចិត្តគឺដំណោះស្រាយនោះមិនអាចបញ្ចប់បានទេ»។ តែបើតាមមន្ត្រីឃ្លាំងមើលរូបនេះយល់ថាសាលារាជធានីគួរស្វែងរកចំណុចរួមមួយមិនគួរទុកដំណោះស្រាយដែលពលរដ្ឋមិនទទួលនៅនឹងថ្កល់នោះទេ៕
